Read TAITA BIBLE – Biblia Ilagho Jiboie Kwa Wandu Wose MITALO 8 Bible Online

MITALO 8 - TAITA BIBLE – Biblia Ilagho Jiboie Kwa Wandu Wose bible

MITALO 8

¹BWANA ukamzera Musa,

²“Mzere Haruni kukaia iji wakawikiria iro taa mfungade, uriwikirie aighu ya kinara cha taa, ripate kuwonyera mwengere naimbiri.”

³Haruni ukabonya wokoni; ukariwikiria taa aighu ya kinara charo ripate kuwonyera mwengere naimbiri, sa iji koni BWANA oremlaghirieghe Musa.

⁴Na icho kinara cha taa cherekoghe cha dhahabu ichanilo; kufuma kishawalata charo cha nandonyi andu komangia kwaro, hata andu kowikiria taa; cherechaniloghe karakara na ugho mfwano BWANA oremmbonyereghe Musa.

⁵Nao BWANA ukamzera Musa,

⁶“Wada Walawi aghadi ya wandu wa Israeli, kuwieleshe.

⁷Kukakawielesha kubonye huwu: kuwimichire machi gheinja kaung'a, nawo wiare mimbi yawo, na kuoghosha nguwo rawo, na kukuelesha weni.

⁸Nao wiwade mwanwanjau, na kizongona charo cha viro cha mufu ghudendere ghuranganyiro na mavuda, na oho kuchawada mwanwanjau umu sena, ukaie kizongona kwa wundu ghwa kaung'a.

⁹Niko kuwirede Walawi imbiri ya Hema ekwania na kukwanya izungu jose ja wandu wa Israeli chiaimweri.

¹⁰Hata iji kwawiwika Walawi imbiri ya BWANA, wandu wa Israeli wichawiwikiria mikonu;

¹¹na Haruni uchawifunya Walawi kwa BWANA wikaie kizongona chesughuswa chafunywa ni wandu wa Israeli; eri wudumiki ghwa kazi ya BWANA ghupate kukaia ghwa Walawi.

¹²Niko Walawi wichawikiria mikonu yawo aighu ya vongo va iro njau, na oho kuchafunya imu ikaie kizongona kwa wundu ghwa kaung'a, na imu ikaie kizongona chekora kwa BWANA, na kubonya wupatanisho kwa wundu gha Walawi.

¹³“Aho kuchawifunya Walawi wikaie kizongona chesughuswa kwa BWANA, na kuwiwika wikaie aisi ya Haruni na wana wake.

¹⁴Kwa chia ihi kuchawitanya Walawi na wandu wa Israeli, na Walawi wichakaia wapo.

¹⁵Nyuma ya kuwielesha Walawi, na kuwifunya wikaie kizongona chesughuswa, wichangia na kubonya wudumiki andenyi ya Hema ekwania.

¹⁶Angu nawinekwa putu ni wandu wa Israeli, wulalo ghwa wavalwa wa imbiri wose wa wandu wa Israeli; nani nawiwusa wipate kukaia wapo weni.

¹⁷Angu wavalwa wa imbiri wose wa womi wa wandu wa Israeli na wa nyamandu wori ni wapo; werewurieghe wapo jija ituku nerewibwaghieghe wavalwa wa imbiri wose wa isanga ja Misri;

¹⁸nani nameria kuwiwusa Walawi wulalo ghwa awo wavalwa wa imbiri wa wandu wa Israeli.

¹⁹Nameria kumneka Haruni na wana wake awo Walawi wikaie inosi kufuma kwa wandu wa Israeli; wipate kuwidumikia wandu wa Israeli andenyi ya Hema ekwania, na kubonya wupatanisho kwa wundu ghwa wandu wa Israeli, eri wisechepata ikabo jingi aghadi kwawo iji wadengwa wasoghoda kaavui na Andu kwa Wueli.”

²⁰Huwo niko Musa na Haruni na wandu wose wa Israeli werewibonyereghe Walawi, kunughana na malaghiro ghose BWANA oremlaghirieghe Musa aighu ya Walawi.

²¹Nao Walawi wikakuelesha weni na kukutanya na kaung'a, wikaoghosha nguwo rawo, na Haruni ukawifunya kwa BWANA, wikaie kizongona chesughuswa; ukabonya wupatanisho kwa wundu ghwawo na kuwielesha.

²²Nyuma ya agho, Walawi wikangia andenyi Hemenyi ekwania, wipate kubonya wudumiki ghwawo ghwa kuwitesia Haruni na wana wake; sa iji koni BWANA oremlaghirieghe Musa.

²³Nao BWANA ukamzera Musa,

²⁴“Walawi wibonyeghe huwu: Mundu uo ose uko wa irika ja miaka mirongo iwi na misanu na kuchumba, uchangia kubonya kazi andenyi ya Hema ekwania;

²⁵na kuvikia miaka mirongo misanu, wichasigha kazi ya wudumiki putu;

²⁶ela wiwitesieghe waruna kuzighana kazi andenyi ya Hema ekwania, ela awo weni wisebonye kazi. Huwo niko kuchaabonya kukakawineka Walawi kazi rawo.”