Read TAITA BIBLE – Biblia Ilagho Jiboie Kwa Wandu Wose MITALO 9 Bible Online

MITALO 9 - TAITA BIBLE – Biblia Ilagho Jiboie Kwa Wandu Wose bible

MITALO 9

¹Nao mori ghwa imbiri, mwaka ghwa kawi nyuma ya kufuma isanga ja Misri, BWANA ukaghora na Musa uko kireti cha Sinai ukighamba,

²“Lindia kukaia wandu wa Israeli wibonyeghee Pasaka kwa ngelo yaro.

³Ituku ja ikumi na inya ja ughu mori luma lwa kenyi, muibonye kwa ngelo yaro, karakara na malaghiro, na sharia raro.”

⁴Niko Musa ukawighoria wandu wa Israeli kukaia, wiibonye Pasaka.

⁵Wikaibonya iyo Pasaka kireti cha Sinai, luma kwa kenyi lwa ituku ja ikumi na inya ja mori ghwa imbiri; wandu wa Israeli wikabonya malagho ghose karakara na seji BWANA oremlaghirieghe Musa.

⁶Ituku ijo, wandu wamu werekoghe wakulusha kwa kuwada gharia; nawo ndeweredimieghe kuibonya Pasaka. Niko wikacha kwa Musa na Haruni,

⁷wikamzera Musa, “Isi daalua kwa kuwada gharia ya mundu, kwaki dighirilwagha kumfunyira BWANA mafunyo andwamweri na wandu wa Israeli kwa ngelo ilaghirilo?”

⁸Musa ukawizera, “Weserenyi nisikire seji BWANA uchaaghora aighu ya malagho ghenyu.”

⁹Niko BWANA ukamzera Musa, “Ghora na wandu wa Israeli kuwizere,

¹⁰Ngera mndungi onyu angu wa kivalwa chenyu walua kwa kuwada gharia, angu ooka charonyi kula, ubonye Pasaka ya BWANA.

¹¹Wiibonye luma lwakenyi lwa ituku ja ikumi na inya ja mori ghwa kawi; wiije na mkate ghusewadie chachu, chiaimweri na mbogha ra malemba ghiwawie.

¹²Wisesighe kindo chingi chilale hata nakesho, sena wisechikanye indi jingi, wiibonye Pasaka karakara na malaghiro gharo ghose.

¹³Ela mundu uelie, nao ndeko charonyi, ukalegha kubonya Pasaka, uo mundu utanyo na wandu wake kwa kukaia ndefunyire ifunyo ja BWANA kwa ngelo yaro; na mundu uo uchaduka kaung'a rake moni.

¹⁴Na ngera mundu mghenyi waidia mzenyu, nao wakunda kubonya Pasaka karakara na sharia raro na malaghiro gharo, ndebonye wokoni mchakaia na sharia imweri kwa muisanga na kwa mghenyi.”

¹⁵Ituku Hema ekwania idungilo, iwingu jerefinikireghe iyo Hema; ela luma lwa kenyi, ijo iwingu jerekoghe sa modo aighu ya Hema; jikakaia hata luma lwa nakesho.

¹⁶Ilagho ijo jerekoghe jikibonyeka woruwo toe; nadime iyo Hema erekoghe ikifinikirwa ni iwingu, na nakio ijo iwingu jikawoneka sa modo.

¹⁷Ngelo iwingu jerewusiroghe nokoighu kufuma Hemenyi, wandu wa Israeli werekueghe kambi na kughenda; na andu iwingu jereseagha, weredungieghe kambi.

¹⁸Kwa momu ghwa BWANA, wandu wa Israeli werekoghe wikizoya charo, na kwa momu ghwa BWANA, weredungieghe kambi, wikakaia ahoeni kambinyi ngelo rose iwingu jerekoghe aighu ya Hema.

¹⁹Hata ngera iwingu jerekaieghe luma aighu ya Hema, wandu wa Israeli ndeweredimieghe kughenda anduangi, angu wereghiwadieghe malaghiro gha BWANA.

²⁰Ngelo rimu iwingu jerekaieghe aighu ya Hema kwa matuku matini, nawo wikakaia kambinyi kunughana na momu ghwa BWANA; kwa momu ghwa BWANA, werezoeghe charo.

²¹Ngelo rimu ijo iwingu jerekaieghe kufuma luma lwa kenyi, hata luma lwa kesho, na iji jereinjiroghe nakesho, wandu werezoeghe charo; angu wikakaia kufuma nadime, hata nakio, nao iwingu jiwusiro, wichazoya charo.

²²Ikakaia ni matuku awi, angu mori mlazi, angu mwaka, iwingu jakaia aighu ya Hema, wandu wa Israeli ndeweredimagha kughenda, wadakaia kambinyi; na iji iwingu jikainjwa wadazoya charo.

²³Kwa momu ghwa BWANA, wikadunga kambi; na kwa momu ghwa BWANA, wikazoya charo; wikawadia seji koni BWANA orekoghe ukilaghira kwa kumtumia Musa.