Read TAITA BIBLE – Biblia Ilagho Jiboie Kwa Wandu Wose MIKA 5 Bible Online

MIKA 5 - TAITA BIBLE – Biblia Ilagho Jiboie Kwa Wandu Wose bible

MIKA 5

¹Wandu wa Jerusalemu, tumbanyenyi majeshi ghenyu! Darughailwa; waawuyamkaba kilongozi wa Israeli.

²BWANA waghamba, “Bethlehemu Efrata, koko mtini putu aghadi ya mizi yose ya Juda; ela nichawusira m'bonyi nguma kufuma kwako, nao uchakaia m'bonyi nguma wa Israeli ufumagha kwa kichuku icheni cha kala.”

³Kwa huwo BWANA uchawikumba Waisraeli mikonunyi kwa wamaiza wawo, hata ivike ngelo ya uo uchamva uo mwana, na wamzawo wiko wubarishonyi kuwadanishwa na wambao.

⁴Ngelo uchagha, uchawibonyera nguma wandu wake kwa ndighi ra BWANA, na kwa nguma ya BWANA Mlungu moni. Wandu wake wichakaia banana, kwa kukaia wandu wose wurumwengunyi wichaghutala wubaa ghwake.

⁵Mundu uo uchareda sere. Muashuri ukawada isanga jedu, na kuchikanya mawurighenyi kodu, dichamdumia vilongozi viwadie ndighi kumchumba wilo nao.

⁶Wichamsima Muashuri, ijo isanga ja Nimrodi, nawo wichadikira disekabo ni Waashuru iji wangia isangenyi kodu.

⁷Masighariko gha Waisraeli wichakaia sa mami gharedwa ni BWANA kwa wundu ghwa mbari nyingi, sa mshushure aighu ya miwalwa. Nawo wichamsuwiria Mlungu uekeri.

⁸Wandu wisigharikagha wa Israeli aghadi ya iro mbari zima, wichakaia sa shimba ilolagha vindo akilembenyi, nayo yadangiria ng'ondi na kurirashua viluponge, hata isuwirio jingi jekia jisoweke.

⁹Israeli ichawisima wamaiza wake na kuwitotesha wose.

¹⁰BWANA waghamba, “Ituku ijo nichariinja nambai farasi rako, na kughinona magare ghako.

¹¹Nichaitotesha mizi ya isanga jako na kuchikanya mawurigha ghako.

¹²Nichainja wusawi ghwako, hata ndemchaakaia na wandu wangi wemghoria malagho sena anduangi.

¹³Nichainona milimu yako na nguro rako ra magho retasa; hata ndekuchaatasa kilambo chingi kuchibonyere anduangi.

¹⁴Nicharitotesha putu fwana ra mlungu ghwako ghwa waka Ashera isangenyi kwako na kuitotesha mizi yako.

¹⁵Nichalipa ngenga aighu ya mizi yose isenisikire kwa machu ghapo mabaa.”