Read TAITA BIBLE – Biblia Ilagho Jiboie Kwa Wandu Wose NAHUMU 1 Bible Online

NAHUMU 1 - TAITA BIBLE – Biblia Ilagho Jiboie Kwa Wandu Wose bible

NAHUMU 1

¹Agha ni mawono aighu ya Nineve ghiwonelo ni Nahumu ufumie Elkoshi.

²BWANA ni Mlungu wa iriso ulipiagha kisasi. Wadawikaba awo wimtangalagha, na kuwibonyera machu wamaiza wake.

³BWANA ndekaiagha wa shwa-shwa kubonya machu, ela wawadie kudima. Ndemsighagha mkosi usemkabie; wadasela andenyi ya kikulughulu na kiremba; mawingu ni teri yawusirwa ni maghu ghake.

⁴Wadaidokia bahari na kuiomera, wadaomera meda yose. Mbuwa ra Bashani ranyaya, na Mghondi ghwa Karmeli ghwaoma. Maua gha Lebanoni ghasia.

⁵Mighondi yasughusika imbiri ya BWANA. Mighondi mitini yasagha imbiri yake. Ndoenyi kwasughusika imbiri yake; wurumwengu na vose viko andenyi yaro wori vasughusika.

⁶Nani udimagha kukaia moyo ukajokwa ni machu? Nani udimagha kughirumaghia machu ghake ghibirie? Machu ghake ghadilwa sa modo, na magho ghabarika imbiri yake.

⁷BWANA waboie; wadawilindia wandu wake ngelo ya wasi. Wadawilindia awo wimrumiriagha.

⁸Ela uchawimeria wamaiza wake putu sa kudwalwa ni machi mengi; uchawighenja wamaiza wake cha kifonyi.

⁹Ni njamaki mbiwi mwawuyam'bonyera BWANA? Uchamtotesha putu. Ndekabagha wandu kawi.

¹⁰Inyo wawongeri, mkeduaranganywa sa minjwa na matasa, mchakorwa na modo mmerelo.

¹¹Mundu ubonyere njama mbiwi aighu ya BWANA oofuma kwako ee Nineve, uo ubonyere mipango ya wuwiwi.

¹²BWANA wawizera wandu wake Israeli huwu, “Hata ngera Waashuru weko wengi, wiwadie ndighi, wichatoteshwa na kusoweka. Nerekubonyereghe kukakorongeka, ela sichaakubonya huwo sena.

¹³Nichawimeria Wasiria, na kuiinja minyororo erekufungieghe.”

¹⁴BWANA wafunya itangazo huwu aighu yako ee Ashuru, “Ndekuchaakaia na kivalwa chewika irina jako. Nichainona milimu iko andenyi ya hekalu yako. Nichakubonyera kaburi angu isefwane kukaie moyo.”

¹⁵Wona mdumwa waawuyacha aighu mghondinyi na malagho mecha; waawuyachaghora malagho gha wusimi! Bonyenyi karamu ee wandu wa Juda, mumneke Mlungu ivo moremlaghirieghe; mmbiwi ndechaakaba isanga jako sena, oosimwa putu.