Read TAITA BIBLE – Biblia Ilagho Jiboie Kwa Wandu Wose NAHUMU 2 Bible Online

NAHUMU 2 - TAITA BIBLE – Biblia Ilagho Jiboie Kwa Wandu Wose bible

NAHUMU 2

¹Nineve, Mtoteshi waawuyacha kukukaba! Lindia ngome. Kuzighaneghe chia rako. Kukuwike nicha kwa wuda.

²(BWANA waawuyawiwunjira Israeli wubaa ghwawo, sa iji werekoghe imbiri wisesokelo na kunonwa ni wamaiza.)

³Ngao ra masikari gha wamaiza ni ra ngundu, nawo weerwa nguwo rifwanane ra ngundu; magare ghikapangwa, ghiaaka-aka sa lumu lwa modo; farasi rawo riarama-rama.

⁴Magare ghiaida na iseghe chienyi; ghiaenda iichia na iichia kiwachenyi; ghiaaka sa tochi; ghiaida sa luhehia.

⁵Wabaa wa majeshi waawuyawangwa; waawuyaghenda imbiri wikikuwa, washashira kuvika wurighenyi, na kuwika kighirio chetangala mtambo ghovuchua wurigha.

⁶Mbenge ra cha modenyi rarughuka, wandu wa ngomenyi ya mzuri wangilwa ni wowa.

⁷Malkia wadwalwa wunyika, wadumiki wake walila sa mbughi na kukukaba lagha.

⁸Wandu waawuyakimbia kufuma Nineve sa kiriwa chavunguka machi; wandu wiakema, “Kaduu, Kaduu!” ela mndungi ndewuyezighana nanyuma.

⁹Shoonyi feza, shoonyi dhahabu. Mali iyo ndeisiagha; wuzuri ghufumagha kwa kula kindo cha zoghori mbaa.

¹⁰Nineve yatoteshwa, yakimbilwa na kusighwa nduu; Wandu wafwa ngolo kwa wowa, vitemberu vawo viasughusika na ndighi rawo rasia, na mawushu ghaghaluka gha mshashu.

¹¹Ugho muzi ghorekoghe sa mruma ghwa shimba ghoko hao, iyo mbanga ya wana wa shimba, andu shimba ya womi na ya waka rerekoghe rikireda madiwo ghawo, andu wana wake werekoghe wiseoboshwagha ni mndungi?

¹²Shimba erekoghe ikibwagha madiwo ghake, na kudumbua vipande vipande kwa wundu ghwa shimba ya waka na wana wake; ikachura mbanga madiwo ghake, na nyama rirashulo-rashulo mirumenyi kwake.

¹³BWANA Uo-Uwadie-Ndighi-Rose waghamba, “Ini ne m'maiza wako; nichakora magare ghako. Masikari ghako ghichabwaghwa wudenyi, nani nichawusa kula kilambo kusokie wandu wazima. Lwaka lwa wadumwa wako ndeluchaasikirika sena anduangi.”