Read TAITA BIBLE – Biblia Ilagho Jiboie Kwa Wandu Wose HABAKUKI 2 Bible Online

HABAKUKI 2 - TAITA BIBLE – Biblia Ilagho Jiboie Kwa Wandu Wose bible

HABAKUKI 2

¹Nichajoka aighu ya mnara ghwapo nipate kuwona agho BWANA uchaanizera nipate kughora; sena nimanye seji uchaanitumbulia aighu ya malalamiko ghapo.

²BWANA ukanitumbulia, “Andika iri maza nikuwonyeragha worinyi aighu ya vishawalata va magho, eri uo ushomagha udime kughishoma kwa shwa-shwa.

³Kwa kukaia ngelo ya agho mawono kukatia ndeivikie; ela ngelo yaro iacha. Ikafwana kumuka, kuiweserie; angu loli ichacha ndeichaamuka anduangi.

⁴Iji nijo ilagho, ‘Olenyi awo wiko wawiwi rohonyi kwawo, wichalemwa; ela awo wiko na hachi wichakaia moyo angu wiko waloli kwa Mlungu.’”

⁵Mali radakalia wandu. Wandu wa choyo wadakukasa nawo ndewina kuhora kungi. Ndewikatwagha jingi weeka sa kifwa. Iyo niyo shekeria wawuyasima kula mbari na kuwidwa wandu wunyika.

⁶Awandu wasimwa wichawiseka awo wandu na kuwimenya wikighamba, “Ni bugha konyu mmbusagha vilambo viseko venyu. M'bonya huwo hata lii mkiwilawia wasile wenyu?”

⁷Ela imbiri msemanyire, inyo msimie wambenyu mchangia silenyi; nenyo mchalazimishwa kulipa na fwaida raro. Wamaiza wichacha na kukubonya kusughusike. Wichakudwa wunyika.

⁸Angu kusokie mbari nyingi vilambo vawo, awo wisigharikie wichakudwa wunyika; kwa kukaia kwabwaghie wandu wengi na kutotesha masanga mengi.

⁹Ni bugha kwako kuredagha mali ra wuwiwi nyumbenyi kwako na kwa iro kutima kuwika muzi ghwako nicha ghusepato ni mawiwi.

¹⁰Kwaredie waya kwako na kwa nyumba yako; kwabwaghie wandu wa mbari nyingi, kukajitotesha irangi jako.

¹¹Igho jiko wurighenyi ghwa nyumba jichakulilia, na misumbati ya nyumba ichakaia ikidikia icho kililo.

¹²Ni bugha kwako kuaghagha muzi msingi kwa wuwiwi, na kughuagha kwa kubwagha.

¹³Welee, ndemmbonagha kukaia maza iri reefuma kwa BWANA Uwadie-Ndighi-Rose; ra wandu kubonya kazi rekorwa, na wandu wa iro mbari kudumika duu?

¹⁴Kwa kukaia ndoenyi kuchachulwa ni kughumanya wubaa ghwa BWANA seji machi ghichuagha baharinyi.

¹⁵Ni bugha kwako mundu kuwinyoshagha wambenyu chofi nyingi, na kuwiwongera eri kughuzighane wuduu ghwawo.

¹⁶Na oho wokoni kuchafushwa waya nandighi wulalo ghopata ishima. Kuchanywa hata kutatarike. BWANA uchakubonya kunyo kikombe chako chekabwa, na ishima jako jichaghaluswa jiwuye waya.

¹⁷Kwademie midi ya msidu ghwa Lebanoni. Oho wokoni kuchademwa. Kwabwaghie nyamandu rerekoghe aho; idana nyamandu richakuobosha oho. Malagho agha ghichabonyeka kwako kwa wundu ghwa kubwagha wandu wengi ndoenyi, na kwa kinyanya chako aighu ya wandu wa mizi yawo.

¹⁸Mlimu ghoko na fwaidaki? Ni kilambo chimu tu chibonyero ni mdamu chisedimagha kukughoria ilagho jingi ela tee nduu. Chabonyeragha fundi waro ilaghoki jiboie eri uchirumirie, mlungu ghusedimagha kudeda!

¹⁹Ni bugha kwa uo mundu uzeragha kilambo cha mudi, “Wuka!” Na igho jisededagha, “Wuka kimusi!” Mlimu ghwadima kukufunukuya ilagho jingi? Ghooshingwa dhahabu na feza, ela ndeghuwadie miruke andenyi yake.

²⁰Ela BWANA oko andenyi ya Hekalu yake ya wueli; wandu wose wa wurumwengunyi ndewikaie kima imbiri kwake.