Read TAITA BIBLE – Biblia Ilagho Jiboie Kwa Wandu Wose ZEFANIA 1 Bible Online

ZEFANIA 1 - TAITA BIBLE – Biblia Ilagho Jiboie Kwa Wandu Wose bible

ZEFANIA 1

¹Iji ni ilagho ja BWANA oremnekieghe Zefania ingelo Josia mwana wa Amoni orekoghe mzuri wa Juda. Zefania orekoghe mwana wa Kushi, wawae Gedalia mwana wa Amaria wawae Hezekia.

²BWANA ukaghamba, “Nichatotesha kula kilambo ndoenyi.

³Nichainja mdamu na nyamandu; nyonyi ra mbeonyi, na samaki. Nichatotesha wawiwi na kula mdamu ndoenyi.

⁴“Nichawikaba wandu wa Juda na wandu wa Jerusalemu. Nichatotesha wutasi ghwa Baali chiaimweri na wakohani waro wetasa milimu.

⁵Nichatotesha kula mundu ujokagha aighu nyumbenyi kutasa iruwa na mori na nyerinyeri. Sena nichawitotesha awo winitasagha na kughema kwa irina japo sena ii chia wiaghema kwa irina ja ghuja mlungu Moleki.

⁶Nichawitotesha awo wighalukie na kusigha kuninugha na awo wisenilolagha hata kunilomba ini BWANA Mlungu niwilongoze.”

⁷Ituku ja BWANA jetanya jameria kuvika. Kwa huwo nyamenyi kima. BWANA waboisire kizongona, na kuwiwika waghenyi wake tayari.

⁸BWANA waghamba, “Ituku nifunyagha kizongona chapo, nichawikaba wabaa wose na wana wa mzuri, na wose wikuzaisiragha tabia ra kighenyi.

⁹Ituku ijo, nichawikaba wandu witasagha sa wandu wisemwichi Mlungu, na awo wiiwagha na kubwagha eri wichure nyumba ra weke bwana wawo na vilambo vesokwa.

¹⁰“Ituku ijo mchasikira kililo kibaa Mbenge ya Samaki, andenyi ya Jerusalemu. Mchasikira kililo kufuma muzi mmbishi ghwa kaavui, na lwaka lwa kilambo chibarikagha mighondinyi.

¹¹Lilenyi inyo wandu mkaiagha Mota, kwa kukaia wandu wose wa biashara wikaiagha aho wikipima feza wameria kubwaghwa.

¹²“Ngelo iyo, nichashoa taa nimlole Jerusalemu; nani nichawikaba awo wandu wikudukagha weni wikighamba, ‘BWANA ndebonyagha ilagho jingi icha angu iwiwi.’

¹³Mali rawo richadwalwa wunyika; nyumba rawo richatoteshwa. Hata ngera wariagha, ndewichaarikaia, hata wikeduawa mizabibu, ndewichaanywa divei yaro anduangi.”

¹⁴Ijo ituku ibaa ja BWANA jameria kuvika; jaawuyacha naiseghe jikishashira; kusikirika kwa ijo ituku ja BWANA kwabirie; kwa kukaia hata ing'oni ja asikari m'baa jichafwa ngolo na kulila.

¹⁵Ituku ijo jichakaia ja machu mabaa; ituku ja wasi na kuwawa, ituku ja kunoneka, ituku ja kira na kiture, ituku ja mawingu na kira kibaa;

¹⁶ituku ja tarumbeta ya wuda na ngemi ya wuda aighu ya iro ngome ra mizi, na aighu ya minara m'baa.

¹⁷BWANA waghamba, “Nichareda wasi aighu ya wadamu, wipate kughenda sa wandu wisewonagha. Wanibonyera kaung'a, na idana bagha yawo ichadika sa machi, na mimbi yawo ichawoa andonyi sa mavi.”

¹⁸Ituku ijo, BWANA uchawonyera lubio lwake; feza na dhahabu rawo nderichaadima kuwikira. Ndoenyi kose kuchamerelwa ni modo ghwa machu ghake. Uchameria kula kilambo ghafla; uchameria kula umu ukaiagha ndoenyi.