Read TAITA BIBLE – Biblia Ilagho Jiboie Kwa Wandu Wose ZEFANIA 3 Bible Online

ZEFANIA 3 - TAITA BIBLE – Biblia Ilagho Jiboie Kwa Wandu Wose bible

ZEFANIA 3

¹Ni bugha kwa Jerusalemu, muzi ghunonekie ghuleghagha kumsikira Mlungu na kukoronga wandu wake weni.

²Ndeghumsikiragha BWANA hata kurumiria makosa ghake. Ndeghumrumiriagha BWANA hata kulola wutesia ghwake.

³Wabaa wake weeka sa shimba irurumagha na watanyi wake sa vikwau viko njala, vijagha kwa lwafuo visedimagha kusighara hata indi nakesho.

⁴Walodi wake ni wa tee, wandu wisena wuloli; wakohani wake wadalusha vilambo va wueli, na kughalusa sharia ra Mlungu kwa fwaida rawo.

⁵Ela BWANA ni mhachi andenyi ya ugho muzi, ndebonyagha makosa; wadawonyera hachi yake kwa wandu wake nakesho hata nakenyi. Ela wandu wiseko na hachi wadachuria kubonya makosa hata ndewifwagha waya anduangi.

⁶BWANA waghamba, “Nameria kuritotesha mbari zima rose; namerie kuinona mizi yawo, mawurigha gharo na minara yawo. Chia rawo reesighwa nduu, ndekuwadie mndungi aho.

⁷Neregheshereghe wandu wapo wichanitala, winughe mawonyero na mafundisho ghapo kuseko kuliwa. Ela shwa wori wikaazama kuchumba imbiri.

⁸“Kwa huwo weseria ituku niwukagha kushitakia iro mbari ra wandu. Nakatire shauri ekwanya iro mbari na mawuzuri niriwonyere ndighi ya machu ghapo. Ndoenyi kose kuchatoteshwa ni modo ghwa lubio lwapo.

⁹“Niko nicharighalua mbari ra wandu wipate kunitasa ini niekeri, hata si milungu mizima anduangi. Wandu wose wichanisikira.

¹⁰Kufuma kimonu cha meda ya Kushi, wandu wapo wisasarikie wichacha na kuniredia mafunyo ghapo.

¹¹Ngelo iyo, ndemchaafushwa waya wei morenileghieghe. Nichainja wandu wose werekukasagha na kukuduka, nenyo ndemchaanilegha sena aighu ya mghondi ghwapo ghwa wueli.

¹²Nichasigha wandu wikuserie na wa mboa aho, awo wilolagha wulindiri ghwapo.

¹³Wandu wose wa Israeli wichaasigharika ndewichaam'bonyera mndungi makosa, hata kughora tee, angu kukalia. Wichakaia nicha, wiko na wulindiri ghukate, hata ndewichaamuobua mndungi anduangi.”

¹⁴Borenyi mkeme kwa kuboilwa inyo wandu wa Israeli! Boilonyi na kuzuma kwa ngolo renyu rose inyo wandu wa Jerusalemu!

¹⁵BWANA wamerie kuinja ikabo jenyu, wamerie kuwiwinga wamaiza wenyu wose; BWANA, uo mzuri wa Israeli oko andwamweri nenyo, ndemuwuyaaobua mawiwi ghangi sena anduangi.

¹⁶Ngelo iyo wichaizera Jerusalemu: “Kusakeobua ee muzi ghwa Sioni! Mikonu yako isaketeweleka.

¹⁷BWANA, uo Mlungu wako oko andwamweri na oho; kudima kwake kuchakuredia wusimi. BWANA uchaboilwa ni oho, nao uchakuneka irangi iwishi kwa lukundo lwake. Uchaboilwa na kuzuma aighu yako kwa kubora,

¹⁸sa wandu wiko ndimenyi.” BWANA waghamba, “Wowa ghwako ghooboa iro bugha naghumeria, na kuinja agho masholio kuduesholelwa.

¹⁹Ngelo yaawuyacha; nichawikaba wakorongi wako. Nichawivuvua watighini wose, na kuwighalisha wose weredwaloghe wunyika. Waya ghwaro ghuchaghaluswa kunekwa ishima na wurumwengu ghose ghuchawikuma.

²⁰Ngelo iyo nichawiwunja mzinyi awo weresaghisiroghe; nicham'bonya mmboneke wa ishima wurumwengunyi kose, nicham'bonya mkaie nicha sena.” Ini BWANA naghamba.