Read TAITA BIBLE – Biblia Ilagho Jiboie Kwa Wandu Wose ZEKARIA 1 Bible Online

ZEKARIA 1 - TAITA BIBLE – Biblia Ilagho Jiboie Kwa Wandu Wose bible

ZEKARIA 1

¹Mori ghwa wunyanya, mwaka ghwa kawi ghwa kubonya nguma kwa Dario, mzuri wa Pashia, BWANA oremnekieghe mlodi Zekaria mwana wa Berekia, wawae Ido malagho gha wulodi.

²BWANA Uwadie-Ndighi-Rose ukamzera Zekaria uwighorie wandu, “Ini BWANA nazamilo ni weke ndeyo nandighi,

³ela idana namzera, ‘Niwurienyi ini nani nichammburia.

⁴Msekaie sa weke ndeyo widueghorelwa malagho ni walodi kokala seji nighorie wisebonye wuwiwi na kaung'a, ela ndeweresikireghe.

⁵Weke ndeyo na walodi waro ndewiduagha.

⁶Nerewinekieghe weke ndeyo malaghiro ghapo na sharia rapo kwa chia ya wadumiki wapo walodi, wikalegha kuriwada; nani ngawikaba. Wikahea na kurumiria kukaia ini BWANA Uwadie-Ndighi-Rose nedewikaba kwa hachi.’”

⁷Ituku ja mirongo iwi na inya ja mori ghwa ikumi na imweri ghuwangwagha Shebati, mwaka ghwa kawi ghwa kubonya nguma kwa Mzuri Dario, BWANA oreghorieghe na ini mlodi Zekaria kwa mawono nakio.

⁸Ngawona malaika wa BWANA ukijoka farasi ya ngundu! Orekoghe wakaia kimusi aghadi ya midi ya mhadasi a ivongonyi na nyuma yake korekoghe na farasi rimu; ra ngundu, ra mshashu na ra chokwa.

⁹Niko ngamkotia, “Kutambua kwaro iri farasi niki BWANA wapo?” Ukatumbulia, “Nichakuwonyera kutambua kwaro.

¹⁰BWANA ooriduma rilawuo ndoenyi.”

¹¹Nao iro farasi rikamzera uja malaika, “Damara-mara wurumwengunyi kose dikawona ghooka kima ghusewadie wutesia ghungi.”

¹²Malaika wa BWANA ukaghamba, “Ee BWANA Kuwadie-Ndighi-Rose, kwakaia na machu aighu ya Jerusalemu na mizi ya Juda kwa miaka mirongo mfungade. Kuchawifuyali wughoma?”

¹³BWANA ukamtumbulia uo malaika kwa malagho gha mvono ghehoresha ngolo.

¹⁴Niko uo malaika orekoghe ukidedanya nani ukanizera nighore kukaia BWANA Uwadie-Ndighi-Rose waghamba, “Neko na lukundo na msigo m'baa aighu ya Jerusalemu muzi ghwapo ghwa wueli;

¹⁵nani neko na machu mabaa nandighi aighu ya mbari ra wandu wawuyakaia kima kwa sere; kwa kukaia ingelo neremaziriagha machu ghapo kwa wundu ghwa wandu wapo, awo wedechuria kuwikoronga.

¹⁶Kwa huwo naiwuria Jerusalemu nipate kuifuya wughoma, Hekalu yapo ichaaghwa, na mizi ichaaghwa.”

¹⁷Nao uo malaika ukanizera nighambe kukaia BWANA Uwadie-Ndighi-Rose waghamba, “Mizi yapo ichakaia nicha sena, na ini BWANA nichaghuhoresha Sioni na kughusaghua Jerusalemu sena ghukaie ghwapo.”

¹⁸Sena ngawona kwa mawono mbembe ra ng'ombe inya.

¹⁹Ngamkotia uo malaika oreghoragha nani, “Iri mbembe kutambua kwaro niki?” Nao ukanitumbulia, “Uku ni kuja kudima kuko wurumwengunyi kusaghisire wandu wa Juda na Israeli na Jerusalemu.”

²⁰Niko BWANA ukaniwonyera wachani vuma bana.

²¹Ngakotia, “Awandu wachabonyaki?” Ukatumbulia, “Waacha kughukambira chongo wurumwengu, na kurikumba noko iro mbari ra wandu werejifashagha isanga ja Juda na kuwisaghisa wandu wake.”