Read TAITA BIBLE – Biblia Ilagho Jiboie Kwa Wandu Wose ZEKARIA 14 Bible Online

ZEKARIA 14 - TAITA BIBLE – Biblia Ilagho Jiboie Kwa Wandu Wose bible

ZEKARIA 14

¹Ituku ja BWANA jetanya jakaia kaavui. Vilambo vichawadwa Jerusalemu na kuwaghwa mkiwona.

²BWANA uchareda mbari zima rose chiaimweri riwade Jerusalemu. Muzi ghuchawadwa, nyumba richabarwa, na waka wichadidikwa. Nusu ya wandu wichabarishwa, ela awa wichaasigharika ndewichaainjwa mzinyi anduangi.

³Niko BWANA uchaghenda kulwa na iro mbari ra wandu seji orelwagha ngelo riidie.

⁴Ituku ijo, BWANA uchakaia kimusi aighu ya Mghondi ghwa Mizeituni kulangaya cha mashariki ya Jerusalemu. Niko Mghondi ghwa Mizeituni ghuchawaghika vibelele viwi kufuma mashariki hata magharibi na vololo mbaa aghadi. Nusu imu ya mghondi ichakaia cha kaskazinyi, na nusu imu ichakaia cha kusinyi.

⁵Mchafufunuka kwa kuidiria ghadi na ghadi ya ihi vololo ya mghondi ghwapo kwa kukaia ghuchashabuka hata Azeli. Mchakimbia seji weke ndeyo werekimbiagha msughusiko ghwa ndoe matuku gha Uzia mzuri wa Juda. Niko BWANA Mlungu wapo uchacha chiaimweri na weke malaika wake.

⁶Ituku ijo ndekuchaakaia mbeo hata barafu,

⁷hata kira. Kuchakaia na mwengere hata nakio. BWANA uekeri nuo uchaamanya maza iri.

⁸Ituku ijo jikavika, machi ghielie ghenywa ghichadika kufuma Jerusalemu; nusu imu ghichaida na kungia Bahari ya Chumbi na nusu imu Bahari ya Mediterania; gichakaia ghikiida ngelo rose ya kwari na ngelo ya sumesu wori.

⁹Niko BWANA uchawuya mzuri wa ndoenyi kose; kula mundu uchamtasa uo Mlungu, na kummanya kwa ijo irina jimweri.

¹⁰Isanga jose jichawuya wurindi kufuma Geba noko cha kaskazinyi hata Rimoni cha kusinyi ya Jerusalemu. Ela Jerusalemu ghuchasigharika ighu wulalonyi kwake; kufuma Mbenge ya Benjamini, hata mbenge ya kala ya mbengenyi na kufuma Mnara ghwa Hananeli hata vidu vekamia divei va mzuri.

¹¹Wandu wichakaia aho banana angu ndekuchaakaia na njowe ingi sena.

¹²BWANA uchareda saka izamie kwa mbari rose ra wandu wichaabonya wuda na Jerusalemu. Mimbi yawo ichawoa wimoo, meso ghawo na chumi rawo richawoa wimoo.

¹³Ngelo iyo, BWANA uchawibonya wilaghalo ni akili; wichangilwa ni kiture hata wiwoke kulwa weni na weni.

¹⁴Wandu wa Juda wichailuya Jerusalemu. Mali ya wandu wa mbari rose wiko mbai mbai ichakwanywa; dhahabu, feza, na marwao mengi nandighi.

¹⁵Na saka ija cheni ichariwada farasi, nyumbu, ngamila, punda, na nyamandu iyo yose iko andenyi ya iro kambi ra wamaiza.

¹⁶Niko kula mundu usigharikagha wa iro mbari rose ra wandu wichee kulwa na Jerusalemu, uchajoka aho kula mwaka kumtasa uo BWANA Uwadie-Ndighi-Rose ukikaia mzuri, na kubonya Ndima ya Viwanda.

¹⁷Mbari ya wandu wangi ikalegha kujokamtasa BWANA Uwadie-Ndighi-Rose sa mzuri, ichasowekelwa ni vua isangenyi kwake.

¹⁸Wandu wa Misri wikalegha kujokabonya Ndima ya Viwanda, wichakabwa na saka ija cheni BWANA uwikabagha nayo wandu wa mbari risejokie kubonya Ndima ya Viwanda.

¹⁹Ijo nijo jichaakaia ikabo ja Misri na ja wandu wa mbari risejokagha kubonya Ndima ya Viwanda.

²⁰Ngelo iyo, vengele va farasi vichaandikwa, “MWELI KWA BWANA.” Na nyungu riko nyumbenyi kwa BWANA richakaia sa bakuli ra madhabahunyi;

²¹na kula nyungu iko Jerusalemu na Juda ichawikwa kula kwa wundu ghwa wutasi kwa BWANA Uwadie-Ndighi-Rose, eri awo wose wifunyagha vizongona widime kuritumia kwa kudoghosa naro nyama ra vizongona. Ngelo iyo ikavika, ndekuchaakaia na m'bonyi biashara ungi Hekalunyi kwa BWANA Uwadie-Ndighi-Rose.