Read TAITA BIBLE – Biblia Ilagho Jiboie Kwa Wandu Wose ZEKARIA 3 Bible Online

ZEKARIA 3 - TAITA BIBLE – Biblia Ilagho Jiboie Kwa Wandu Wose bible

ZEKARIA 3

¹BWANA ukaniwonyera Mkohani M'baa Joshua ukikaia kimusi imbiri ya malaika wa BWANA, na Shetani uko kimusi chia ya mkonu ghwake ghwa kiwomi upate kumshitakia.

²Malaika wa BWANA ukamzera Shetani, “BWANA ndekukemie ee Shetani! Uo BWANA uikunde Jerusalemu ndekukemie. Umundu ooka sa kilaya chafunywa modonyi.”

³Joshua orekoghe ukikaia kimusi imbiri ya malaika urwae nguwo rilue.

⁴Malaika ukawizera wambao werekoghe kimusi imbiri kwake, “Mruonyi iro nguwo rilue.” Ukamzera Joshua, “Ola nakuinjira kaung'a yako, nani nichakurusha nguwo ra zoghori mbaa.”

⁵Ukawilaghira awo werekoghe aho wimrushe Joshua kiremba chielie chongonyi kwake. Wikamngira icho kiremba chielie chongonyi kwake, na kumrusha nguwo malaika wa BWANA ukikaia kimusi kaavui nao.

⁶Niko malaika wa BWANA ukamlaghira Joshua,

⁷kukaia, BWANA Uwadie-Ndighi-Rose waghamba, “Kukawadia sharia rapo, na kukatisha kazi kunekelo kuribonye, kuchadua mzighaniri wa Hekalu yapo, na chukumbi raro; nani nichasikira malombi ghako, seji nawuyasikira malombi gha weke malaika awa wawuyakaia kimusi aha imbiri kwapo.

⁸Idana sikira ee Joshua Mkohani M'baa, chiaimweri na wambenyu mkwanye, wiko fwana ya maza ndicha richagha, nichamreda mdumiki wapo uwangwagha Lumbashu.

⁹Naawuyawika igho jiko na chuwaru mfungade imbiri ya Joshua; nichakota mbari aghadi yaro, nani nichainja kaung'a ya isanga iji kwa ituku jimweri.

¹⁰Ituku ijo jikavika, kula mundu onyu uchamkaribisha mmbao wikaie aisi ya mzabibu ghwake na aisi ya mtini ghwake wikiboilwa kwa kukaia weko na sere na wulindiri.”