Read TAITA BIBLE – Biblia Ilagho Jiboie Kwa Wandu Wose ZEKARIA 4 Bible Online

ZEKARIA 4 - TAITA BIBLE – Biblia Ilagho Jiboie Kwa Wandu Wose bible

ZEKARIA 4

¹Nao uo malaika oreghoragha nani ukacha sena; ukaniwusira seji mundu uwusirwagha kufuma dilonyi.

²Ukanikotia, “Kwawuyawona kii?” Ngatumbulia, “Naawuyawona kinara cha taa cha dhahabu, na bakuli ya mavuda yawikirilwa aighu. Aighu yaro korekoghe na taa mfungade, riko na andu kongiria wutambi kula imu.

³Koko mizeituni iwi kaavui nacho; ghumu chia ya mkonu ghwa kiwomi ghwa bakuli, na ghumu chia ya mkonu ghwa kiwaka.”

⁴Niko ngamkotia uo malaika, “BWANA wapo, maza iri kutambua kwaro niki?”

⁵Malaika ukanitumbulia, “Ndekutambukilwagha ni iri maza?” Ngaghamba “Hata bwana.”

⁶Malaika ukanizera nimghorie Zerubabeli agha malagho gha BWANA huwu, “Kuchasima, ela si kwa ndighi ra kiwuda angu kwa ndighi rako, ela kwa Roho wapo.

⁷Vighirio viwonekagha sa mghondi vichainjika imbiri kwako, na oho kuchaiagha Hekalu sena. Kukaimeria, kukiwika igho ja kutua, wandu wichazuma wikighamba, ‘Yaghoka nao! Yaghoka!’”

⁸BWANA ukaghora nani sena ukighamba,

⁹“Zerubabeli oreaghieghe msingi ghwa ihi Hekalu, nao nuo moni uchaaimeria. Niko wandu wichaamanya kukaia ni ini nikudumie.

¹⁰Wandu wichafwa ngolo kwa kuwona kazi ya iaghi ikighenda mboa-mboa. Ela wichammbona Zerubabeli ukiiagha Hekalu, nawo wichaboilwa.” Malaika ukanizera, “Iro taa mfungade, ni meso mfungade gha BWANA ghizighanagha ndoenyi kose.”

¹¹Niko ngamkotia, “Ihi mizeituni iwi iko chia ya mkonu ghwa kiwomi na ghwa kiwaka ghwa kinara cha taa kutambua kwaro niki?

¹²Na iri mbashu iwi ra mzeituni riko luwarunyi lwa mifereji iwi ya dhahabu edia mavuda kutambua kwaro niki?”

¹³Ukanizera, “Ndekutambukilwagha ni iri maza?” Ngaghamba, “Hata bwana.”

¹⁴Niko ukaghamba, “Awa ni waja wandu wawi wishingilo mavuda wipate kumdumikia BWANA wa ndoenyi kose.”