Read TAITA BIBLE – Biblia Ilagho Jiboie Kwa Wandu Wose ZEKARIA 9 Bible Online

ZEKARIA 9 - TAITA BIBLE – Biblia Ilagho Jiboie Kwa Wandu Wose bible

ZEKARIA 9

¹Agha ni malagho gha BWANA: Waghambie uchakaba isanga ja Hadraki, na muzi ghwa Dameshki. Si mizi ya vichuku va Israeli tu, ela hata na muzi m'baa ghwa Siria ni ghwa BWANA.

²Hamathi iko mpakenyi ghwa Hadraki ni yake, na wokoni Tiro na Sidoni wiko na hikima ni yake wori.

³Tiro wakuaghie moni wurigha; wakutumbanyire feza kitungu sa teri, na dhahabu sa wuchafu ghwa chienyi.

⁴Ela BWANA uchamsoka vilambo vose uko navo, na kurikumba mali rake baharinyi; muzi ghwake ghuchakorwa ghusie.

⁵Muzi ghwa Ashkeloni ghuchawona na kuobua; muzi ghwa Gaza ghuchawona agho na kuwawa nandighi. Na muzi ghwa Ekroni wokoni ghuchanyamirwa na isuwirio jawo wori jichasia. Mzuri ufumagha Gaza uchasoweka, na Ashkeloni ghuchasigharika ghusene wandu.

⁶Wandu wirangane bagha wichakaia Ashdodi. BWANA waghamba, “Nichameria lukaso lwa wandu wa Filistia.

⁷Ndewichaaja nyama iko na bagha sena, hata kindo chingi wikanilo. Awo wifufunukagha wichawuya wandu wapo, na kuwuya kinyumba andenyi ya kichuku cha Juda. Wandu wa Ekroni wichawuya wandu wapo sa Wajebusi.

⁸Nichajilindia isanga japo, na kulegha ijeshi jingi jiseide aghadi yaro. Sichaasigha mkorongi ungi uwikoronge wandu wapo kwa kukaia namerie kuwona seji wandu wapo wikorongelo.”

⁹Zumenyi ee wandu wa Sioni! Kemenyi kwa kuboilwa inyo wandu wa Jerusalemu! Wonenyi mzuri onyu uamchea! Oko na wusimi m'baa; ela ni mmboa nao wajoka aighu ya punda; punda mtini, mwana wa punda.

¹⁰BWANA waghamba, “Nichainja magare gha wuda kufuma Israeli, na farasi kufuma Jerusalemu; na ndana ra wuda richanonwa. Mzuri onyu uchabonya sere ikaie aghadi ya mbari ra wandu; na nguma yake ichaera kufuma bahari hata bahari, na kufuma Moda ghwa Eufrate hata kutua kwa ndoenyi.”

¹¹BWANA waghamba, “Na kwa wundu ghwa ilaghano japo na oho jimangishiro kwa bagha ya kizongona, nichawifungua wandu wako wifume andenyi ya kina chisewadie machi.

¹²Wuyenyi inyo m'barishiro muko na isuwirio, wuyenyi andu konyu kwa wubanana. Naghamba nichamlipa marasimio mando awi.

¹³Nichamtumia Juda sa ndana ya asikari na Israeli sa mawanu. Nichawitumia wandu wa Sioni sa lufu, nipate kulwa na wandu wa Griki.”

¹⁴Niko BWANA uchafutuka aighu ya wandu wake, na kukumba mawanu ghake sa luhehia; BWANA Mlungu uchakaba tarumbeta, na kughenda andenyi ya kikulughulu cha kusinyi.

¹⁵BWANA Uwadie-Ndighi-Rose uchawilindia wandu wake, nawo wichawitotesha wamaiza wawo; wichakema wudenyi sa wawongeri, nawo wichawibwagha wamaiza wawo, bagha yawo ichadika sa ya vizongona yadilwa madhabahunyi.

¹⁶Ituku ijo, BWANA Mlungu wawo uchawikira, seji mlisha ukiragha chagha cha iranu jake; nawo wichang'ala-ng'ala isangenyi kwake, sa lulu ra kirumbu.

¹⁷Maza richakaia nicha saki! Wandu wa irika wichakaia na ndighi kwa wundu ghwa viro na divei.