Read TAITA BIBLE – Biblia Ilagho Jiboie Kwa Wandu Wose MALAKI 3 Bible Online

MALAKI 3 - TAITA BIBLE – Biblia Ilagho Jiboie Kwa Wandu Wose bible

MALAKI 3

¹BWANA Uwadie-Ndighi-Rose watumbulia, “Nichamduma mdumwa wapo, upate kuboisa chia imbiri kwapo, na uo BWANA mwawuyamsuwiria uchacha ghafla andenyi ya Hekalu yake. Uo mdumwa mwawuyamsuwiria uchacha na kueresha ilaghano japo.”

²Ela nani udimagha kurumaghia ituku ja kucha kwake? Nani udimagha kukaia moyo ngelo wawoneka? Kwa kukaia uchakaia sa sabuni ieleshagha, sa ghuja modo ghwa mchani vuma ghueleshagha vuma.

³Uchacha kutanya sa mundu ueleshagha feza. Mdumwa wa BWANA uchawielesha wakohani sa mchani vuma ueleshagha feza na dhahabu wipate kumfunyira mafunyo ghiboie.

⁴Niko mafunyo ghichaafunywa ni wandu wa Juda na Jerusalemu ghichaam'boia BWANA sa kala.

⁵BWANA Uwadie-Ndighi-Rose waghamba, “Niko aho nichamchea kaavui kumtanya, nani nichakaia wa shwa-shwa kushuhudia aighu ya walaghui, na walaki, na awo wighemagha kwa tee, na awo wikitagha wapakazi na malipo ghawo, na waka wakiwa, na wana wakiwa, na awo wilaghashagha hachi ya mghenyi, wiseniobuagha ini.

⁶“Ini ne BWANA sighalukagha. Na inyo ee kivalwa cha Jakobo, ndemchaamerelwa putu anduangi.

⁷Mwaghalukie mkarisigha sharia rapo sa weke ndeyo werekoghe imbiri konyu, hata ndemoreriwadieghe anduangi. Wuyenyi kwapo nani nichammburia. Ela mwaawuyakotia, ‘Dibonya wada ima dikuwurie?’

⁸Welee, mdamu wadima kumuiwia Mlungu? Ela inyo mwaawuyaniiwia, na kughamba, ‘Dawuyakuiwia wada?’ Ni kwa wundu ghwa ifungu jenyu ja ikumi na mafunyo ghenyu.

⁹Inyo mmbose mbari yose moowadwa ni njowe, angu mwawuyaniiwia.

¹⁰Redenyi ifungu ja ikumi jose Hekalunyi, vindo vipate kuchua aho. Nitimenyi kwa chia iyo, mmbone ngera simrughuyagha madirisha gha mlungunyi, na kumdiria marasimio gha vindo vingi.

¹¹Nichakemia nyamandu na shimandu rijagha vindo venyu, eri risenone mavalo ghenyu gha mbuwenyi na mizabibu yenyu ichava zabibu kwa wungi.

¹²Niko aho mbari rose ra wandu wichammbanga warasimilwa kwa wundu ghokaia na isanga jiboie.

¹³“Mwadedie kiwiwi aighu yapo, Ela sena mwaawuyaghamba, ‘Dadedie kiwiwi aighu yako wada?’

¹⁴Inyo mwaghambie, ‘Ni duu kumdumikia BWANA. Eko fwaidaki ewadia malaghiro ghake na kughenda dikihea imbiri kwake kwa agho dighibonyere?

¹⁵Seji diwonie, wandu wikukasire niwo wawuyawona nicha. Wandu wawiwi ndewiwonagha nicha tu, ela hata iji wamtima Mlungu kwa uko kurumaghia kwake, wafufunuka wisepatiro ni ilagho jingi.’”

¹⁶Niko awo wandu wimuobuagha BWANA wikadedanya, na BWANA ukawisikiria; ukasikira malagho werekoghe wikighora imbiri kwake. Chuo cha wukumbuso ghwa awo weremuobuagha BWANA na kumneka ishima chikaandikwa.

¹⁷BWANA Uwadie-Ndighi-Rose waghamba, “Wichawuya wandu wapo ituku jija nichaabonya maza iro; wichakaia wapo weni. Nichawifuya wughoma seji ndee mwana umfuyagha wughoma mwana wake umdumikiagha.

¹⁸Niko aho mchaamanya kuwitambua awo wiko na hachi na awo wawiwi; aghadi ya uo unidumikiagha, na uo usenidumikiagha.”