Read TAITA BIBLE – Biblia Ilagho Jiboie Kwa Wandu Wose MATHAYO 1 Bible Online

MATHAYO 1 - TAITA BIBLE – Biblia Ilagho Jiboie Kwa Wandu Wose bible

MATHAYO 1

¹Jesu Kristo orekoghe wa kivalwa cha Daudi, kivalwa cha Abrahamu. Huwu niko kivalwa chake cherekoghe:

²Abrahamu oremvaeghe Isaaka, Isaaka ukamva Jakobo, na Jakobo ukamva Juda na waruna.

³Juda oremvaeghe Perezi na Sera, (mae orekoghe Tamari), Perezi oremvaeghe Hezroni, Hezroni ukamva Ramu.

⁴Ramu oremvaeghe Abinadabu, Abinadabu ukamva Nashoni, Nashoni ukamva Salmoni;

⁵Salmoni oremvaeghe Boazi (mae orekoghe Rahabu), Boazi na Ruthu wikamva Obedi, na Obedi ukamva Jese;

⁶nao Jese ukamva Mzuri Daudi. Daudi oremvaeghe Solomoni (mae orekoghe muka wa Uria).

⁷Solomoni oremvaeghe Rehoboamu, na Rehoboamu ukamva Abiya, Abiya oremvaeghe Asa;

⁸na Asa oremvaeghe Jehoshafati, Jehoshafati ukamva Joramu, na Joramu ukamva Uzia;

⁹Uzia oremvaeghe Jothamu, na Jothamu ukamva Ahazi, na Ahazi ukamva Hezekia;

¹⁰Hezekia oremvaeghe Manase, Manase ukamva Amoni; na Amoni ukamva Josia.

¹¹Josia oremvaeghe Jekonia na waruna. Ngelo iyo erekoghe ya Wayahudi kudwalwa wunyika noko cha Babuloni.

¹²Nyuma ya Wayahudi kudwalwa wunyika noko cha Babuloni, Jekonia oremvaeghe Shealtieli; na Shealtieli ukamva Zerubabeli;

¹³Zerubabeli oremvaeghe Abiudi, na Abiudi ukamva Eliakimu; na Eliakimu ukamva Azori.

¹⁴Azori oremvaeghe Zadoku; na Zadoku ukamva Akimu, na Akimu ukamva Eliudi.

¹⁵Eliudi oremvaeghe Eleazari; na Eleazari ukamva Mathani, na Mathani ukamva Jakobo.

¹⁶Jakobo oremvaeghe Josefu, uo orekoghe mumi wake Maria, uo oremvaeghe Jesu uwangwagha Kristo.

¹⁷Kwa huwo, korekoghe na vivalwa ikumi na vina kufuma Abrahamu hata Daudi; na vivalwa ikumi na vina kufuma Daudi hata ija ngelo ya kudwalwa wunyika kwa Wayahudi noko cha Babuloni; na vivalwa ikumi na vina kufuma ija ngelo ya kudwalwa wunyika kwa Wayahudi hata ngelo ya Kristo.

¹⁸Jesu Kristo orevaloghe huwu; Maria uja mae, orekoghe mchumba wa Josefu, ela imbiri wisekaie chia imweri, ukawoneka oko na kifu kwa ndighi ra Roho Mweli.

¹⁹Mchumba wake Josefu, orekoghe mundu wa hachi, nao nderekundieghe kumfusha waya worinyi anduangi, ela ukalola kutana nao kwa kiviso.

²⁰Nao iji orekoghe ukighiririkanya malagho agho, malaika wa Bwana ukamfutukia kwa ndodo ukamzera, “Josefu mwana wa Daudi, kusakeobua kummbusa mkako Maria, angu kifu uko nacho ni kwa ndighi ra Roho Mweli.

²¹Nao uchava mwana wa womi, na oho kuchammbanga irina jake Jesu, angu nuo uchaawikira wandu wake kufuma kaung'enyi rawo.”

²²Na agha ghose gherebonyekieghe, eri malagho gha Bwana oreghighorieghe kwa momu ghwa mlodi ghipate kukatia ghighambagha,

²³“Ola mwai uchakaia na kifu nao uchava mwana wa womi, nao uchawangwa Immanueli” (kutambua kwaro ni, “Mlungu andwamweri nesi”).

²⁴Nao iji Josefu wawuka kufuma dilonyi, ukammbusa Maria mkake, sa iji koni orezereloghe ni malaika.

²⁵Ela nderemmanyireghe anduangi, hata Maria ukamva mwana wa womi. Na Josefu ukammbanga irina jake Jesu.