Read TAITA BIBLE – Biblia Ilagho Jiboie Kwa Wandu Wose MATHAYO 10 Bible Online

MATHAYO 10 - TAITA BIBLE – Biblia Ilagho Jiboie Kwa Wandu Wose bible

MATHAYO 10

¹Jesu ukawiwanga wanughi wake ikumi na wawi, ukawineka ndighi rewinga roho ra makakala na kuboisa makongo gha mbari rose.

²Marina gha wadumi ikumi na wawi nigho agha: Wa imbiri Simoni uwangwagha Petro, na Andrea mruna, Jakobo na Johane wana wa Zebedayo;

³Filipo na Bartholomayo, Tomasi na Mathayo orekoghe mmbwadi wushuru, Jakobo mwana wa Alfayo na Thadayo;

⁴Simoni Mkanaani na Juda Iskarioti, nuo oremfunyireghe Jesu.

⁵Awa ikumi na wawi Jesu ukawiduma ukiwilaghira, “Msakeghenda kwa wandu wa mbari zima, hata msakeghenda muzi ghungi ghwa Wasamaria.

⁶Ela muwighendie wandu wilagharie sa ng'ondi wa Israeli.

⁷Nenyo mkighenda chilenyi, ‘Wuzuri ghwa Mlungu ghwavika kaavui.’

⁸Wiboisenyi wakongo, wirukishenyi wafu, wieleshenyi awo wiko na sima, riwingenyi pepo. Mwanekelo duu, mfunye duu.

⁹Msakedwa dhahabu andenyi ya mifuko enyu, hata feza angu magome.

¹⁰Msakedwa mfuko ghwa charonyi, angu makoti awi, angu vadu, angu mzata. Angu m'bonyi kazi wafwana kunekwa mafungu ghake.

¹¹Mkangia muzi ghungi m'baa angu mtini, mzighane ngera oko mndungi uko tayari kumkaribisha, mpate kukaia ahoeni hata mwafuma ugho muzi.

¹²Iji mwangia nyumba ingi ghambenyi, ‘Sere ndeikaie konyu.’

¹³Iji wandu wa nyumba iyo wamkaribisha, sere enyu ndeikaie kwawo; ela ikakaia walegha kumkaribisha, sere enyu ichammburia.

¹⁴Ngera mndungi walegha kumkaribisha angu kusikira malagho ghenyu, iji mwakafuma iyo nyumba angu ugho muzi, mghughuduo teri ya maghunyi konyu.

¹⁵Namghoria loli, Ituku ja Kutanywa, muzi ugho ghuchakabwa kuchumba mizi ya Sodoma na Gomora.

¹⁶“Idana ini niamduma sa ng'ondi aghadi ya vikwau, mkaie na akili sa choka, na wa mboa sa mbughi.

¹⁷Mkulindie na wadamu, angu wichamghenja mandunyi nawo wichamkaba na viboko andenyi ya sunagogi rawo.

¹⁸Mchaghenjwa imbiri ya awo wibonyagha nguma na wazuri kwa wundu ghwapo; mpate kujichila ijo Ilagho Jiboie kwawo na kwa mbari zima wori.

¹⁹Ela iji wamghenja mandunyi, msekambo ni chongo wei mghora wada; angu ngelo yaro ikavika, mchanekwa gha kughora.

²⁰Angu malagho mchaaghora si ghenyu ghangi, ela ni gha Roho wa Ndeyo onyu uko andenyi konyu.

²¹“Mundu uchamfunya mruna ubwagho, na ndee mwana uchamfunya mwana wake, wana wichawighalukia wavi wawo na kuwifunya wibwagho.

²²Mchazamia wandu wose kwa wundu ghwa irina japo. Ela uo uchaarumaghia hata kutua, uchakia.

²³“Iji wandu wamtirira andenyi ya muzi ghumu, mughughendie muzi mzima. Namghoria loli, ndemchaameria mizi yose ya Israeli, imbiri Mwana wa Mdamu usechee.

²⁴“Mnughi ndekaiagha m'baa kumchumba mwalimu wake, hata mdumiki ndekaiagha m'baa kumchumba bwana wake anduangi.

²⁵Yamkata mnughi kukaia sa mwalimu wake na mdumiki sa bwana wake. Ikakaia wammbanga m'baa wa nyumba Beelizebuli, wichachumba saki kuwiwanga marina ghizamie awo wa kinyumba chake.

²⁶“Kwa huwo msakewiobua awo wandu. Ndekuwadie kindo chingi chifinikiro chisechaafunukulwa, hata kilambo chingi chivisiro chisechaawonyerwa worinyi anduangi.

²⁷Ijo nimghoriagha kirenyi, mujighore mwengerenyi; na ijo mhohorelwagha, mujichile aighu nyumbenyi.

²⁸Msakewiobua awa wibwaghagha mumbi wisedimagha kubwagha roho; ela muobuonyi uo udimagha kubwagha roho na mumbi kwa jehanamu.

²⁹Mbeumbeu iwi ndaradauzwa kwa igome jimweri? Ela hata huwo saki, ndekuwadie ingi yaro ipotokagha andoenyi Ndeyo onyu userumirie anduangi.

³⁰Nenyo hata maridia gha vongonyi konyu ghatalilo putu.

³¹Kwa huwo msakewiobua, inyo moko wa zoghori kuchumba mbeumbeu nyingi.

³²“Kwa huwo, uo ose uchaanirumiria imbiri ya wandu kukaia ni wapo, ini wori nichamrumiria imbiri ya Aba uko mlungunyi.

³³Ela uo uchaanikana imbiri ya wandu, ini wori nichamkana imbiri ya Aba uko mlungunyi.

³⁴“Msakeghesha wei nedecha kureda sere ndoenyi. Serechieghe kureda sere ela ni lufu.

³⁵Angu necha kureda mawaghanyiko aghadi ya mwana na ndee, mwai na mae, mkamwana na mkekwake.

³⁶Na wamaiza wa mundu wichakaia awo wandu wa nyumbenyi kwake.

³⁷“Uo umkundagha ndee angu mae kuchumba ini, ndenifwanaghaanduangi; na uo umkundagha mwana wa womi angu wa waka kuchumba ini, ndenifwanagha anduangi.

³⁸Uo usedukagha msalaba ghwake na kuninugha ndenifwanagha anduangi.

³⁹Uo ulolagha kujikira irangi jake uchajilaghasha, ela uo ujilaghashagha irangi jake kwa wundu ghwapo uchajipata.

⁴⁰“Uo umkaribishagha inyo, waanikaribisha ini, na uo unikaribishagha ini, waamkaribisha uo orenidumieghe.

⁴¹Uo umkaribishagha mlodi angu uko mlodi, uchapata mafungu gha mlodi; na uo umkaribishagha mundu ubonyagha hachi angu uko mhachi, uchapata mafungu gha mundu wa hachi.

⁴²Na uo ose uchaamneka umu wa awa watini hata kikombe cha machi gha mbeo, angu wakaia mnughi wapo, ndechaasowa mafungu ghake anduangi.”