Read TAITA BIBLE – Biblia Ilagho Jiboie Kwa Wandu Wose MATHAYO 11 Bible Online

MATHAYO 11 - TAITA BIBLE – Biblia Ilagho Jiboie Kwa Wandu Wose bible

MATHAYO 11

¹Nao iji Jesu wameria kuwilaghira wanughi wake ikumi na wawi, ukafuma aho ukaghenda kufundisha na kuchila kwa mizi yawo.

²Johane uko kifungonyi, uendasikira malagho gha mabonyo gha Jesu, ukawiduma wamu wa wanughi wake kwa Jesu wimkotie,

³“Welee, oho nuo uja uchagha angu dimmbesere mzima?”

⁴Jesu ukawitumbulia, “Ghendenyi mumghorie Johane malagho mwaghisikira na kughiwona:

⁵Vitungure vawuyawona, wakelemeri wawuyaghenda, awa wiko na sima waawuyaeleshwa, awa wifue madu waawuyasikira, wafu waawuyarukishwa, na wakiwa wachililwa Ilagho Jiboie.

⁶Warasimilwa uo mundu useko na ngera nani.”

⁷Hata iji wanughi wa Johane werekoghe wikighenda, Jesu ukazoya kujizera izungu ja wandu malagho gha Johane, “Morefumieghe kwendazighana kii aja kireti? Modekunda kuwona mrangi ghukinyavurishwa ni mbeo?

⁸Angu morefumieghe kwendazighana kii? Ni kumzighana mundu urwae nicha? Olenyi awo wirwae nguwo ndicha weko nyumbenyi kwa wazuri.

⁹Idana moreghendieghe kuwona kii? Ni mlodi? Ee, kwa loli ni kuchumba mlodi.

¹⁰Uhu nuo moni ughorelo kwa Maandiko Ghielie. ‘Ola namduma mdumi wapo ukukirie, waghora Bwana, uo uchaakuboisira chia yako.’

¹¹Namghoria loli, kwa awo wose wivalo ni waka, ndewonekie mndungi uko m'baa kumchumba Johane M'baputizi anduangi. Elaima, uo uko mtini putu kwa wuzuri ghwa Mlungu, ni m'baa kumchumba uo.

¹²Kufuma matuku gha Johane M'baputizi hata idime, wuzuri ghwa Mlungu ghwaawuyatangalwa kwa ndighi, na awo wiko nandighi wiaghuwada kwa ndighi.

¹³Walodi wose na Sharia ra Musa, wereghorieghe malagho gha ngelo iri.

¹⁴Ngera mwakunda kughirumiria, ola uo nuo Elija uchagha.

¹⁵Uo uko na madu ghesikira ndesikire.

¹⁶“Ela nichifwananisha naki kivalwa ichi? Chafwanana na wanake wiko kidombo sokonyi wikiwangana na wambao,

¹⁷wikighamba, ‘Deremkabieghe misherembe mkalegha kuvina, dereborieghe chumbo ra wasi mkalegha kulila.’

¹⁸Angu Johane orechieghe ukifunga usejagha hata usenywagha, nawo wikaghamba, ‘Ooka na pepo.’

¹⁹Mwana wa Mdamu orechieghe ukija ukinywa, nawo waghamba, ‘Mzighanenyi mundu wa lwafuo, mmbongeri na mghenyi wa wawadi wushuru na wakaung'a.’ Elaima sena ija hekima yanekwa hachi ni kazi raro.”

²⁰Niko Jesu ukazoya kuirasha ija mizi weke mwakilimbiti wengi wibonyero kwawo, angu wandu waro wereleghieghe kuhea.

²¹“Ni bugha kwako Korazini! Ni bugha kwako Bethsaida! Kwa kukaia weke mwakilimbiti werebonyeroghe kwako, ngera wedebonyerwa Tiro na Sidoni, kumangu wamerie kuhea koicho wikirwa nguwo ra magunia na kukudunga maivu.

²²Ela namghoria loli, Ituku ja Kutanywa, kukabwa kwa Tiro na Sidoni kukaia baa kuchumba inyo.

²³Na oho Kafarnaumu, kookunda kujoswa kuvike mlungunyi? Kuchaserwa hata jehanamunyi. Angu ngera weke mwakilimbiti werebonyeroghe kwako, wedebonyerwa Sodoma, kumangu muzi ugho ghwaduagha hata linu.

²⁴Ela namghoria, Ituku ja Kutanywa, ikabo ja Sodoma jikaia baa kuchumba jako.”

²⁵Ngelo iyo Jesu ukaghamba, “Nakuneka chawucha ee Aba, Bwana wa mlungunyi na ndoenyi, angu korewivisireghe wandu wa akii na suku maza iri, kukawiwonyera wanake watini.

²⁶Ee Aba, angu niko korekundieghe ikaie huwo.

²⁷Aba waninekie vilambo vose. Hata ndekuwadie ungi ummanyagha Mwana ela Aba, sena ndekuwadie mndungi ummanyagha Aba ela Mwana, na uo ose Mwana uchaakunda kumfunukuya.

²⁸Choonyi kwapo inyo mmbose msumbukagha na kulemerelwa ni misigo, nani nichamhoresha.

²⁹Mkungire ghongolo yapo, mkufundishe kwapo, angu ne mundu wa wumboa ini, na wa ngolo ekusera, nenyo mchasikira kuhoa rohonyi konyu.

³⁰Angu ghongolo yapo yaboie na msigo ghwapo ghwaangue.”