Read TAITA BIBLE – Biblia Ilagho Jiboie Kwa Wandu Wose MATHAYO 12 Bible Online

MATHAYO 12 - TAITA BIBLE – Biblia Ilagho Jiboie Kwa Wandu Wose bible

MATHAYO 12

¹Ngelo iyo Jesu orekoghe ukighenda ghadi na ghadi ya mbuwa ya ngano ituku ja Sabato. Wanughi wake wikazughwa ni njala, na kuzoya kudema vanga va ngano na kuja.

²Mafarisayo wiendawona agho, wikamzera Jesu, “Zighana wanughi wako seji wibonyagha maza risebonywagha ituku ja Sabato.”

³Jesu ukawitumbulia, “Wele jingi ndemshomie seji Daudi na wambao werebnyereghe iji weresikireghe njala?

⁴Uo na wambao werengirieghe andenyi ya nyumba ya Mlungu, wikaija mikate erefunyiroghe kwa Mlungu, nawo ndewerekoghe na rusa eja iyo mikate, angu yadajighwa ni Wakohani wiekeri.

⁵Angu welee, ndemshomie Sharienyi seji Wakohani wiichukanyagha Sabato Hekalunyi kula ituku ja Sabato, nawo ndewitalwagha kukaia na ikosa jingi?

⁶Nani namzera, aha koko kilambo kibaa kuchumba Hekalu.

⁷Na ngera modemanya kutambua kwaro malagho agha: Neekunda wughoma ela si kizongona kungi; ndamwawitanyagha wandu wiseko na makosa anduangi.

⁸Angu Mwana wa Mdamu nuo Bwana wa Sabato.”

⁹Nao Jesu ukafuma aho ukaghenda kwa sunagogi yawo,

¹⁰Na aho korekoghe na mndumu uko na mkonu ghukelemere. Wandu wikamkotia Jesu, “Welee, ni hachi kum'boisa mundu ituku ja Sabato?” Weremkotereghe agho eri wipate shekeria emshitakia.

¹¹Ela Jesu ukawizera, “Welee, mndungi ukakaia na ng'ondi yake yachunukia ivongonyi ituku ja Sabato, ndechaiwada uifunye anguwada?

¹²Idana mundu wachumba ng'ondi saki? Kwa huwo ni hachi kubonya ilagho icha ituku ja Sabato.”

¹³Niko ukamzera uja mundu, “Ghorua mkonu ghwako.” Nao ukaghughorua nagho ghukaboa na kukaia karakara na ghuja ghumu.

¹⁴Ela Mafarisayo wikafuma shighadi wikabonya njama seji wichaadima kumtotesha Jesu.

¹⁵Jesu ukimanya ilagho ijo, ukafuma aja. Wandu wengi wikamnugha, ukawiboisa makongo ghawo ghose;

¹⁶ukawilaghira angu wisakewighoria wandu malagho ghake,

¹⁷eri agha ghighorelo ni mlodi ghikatisho:

¹⁸“Wonenyi mdumiki wapo uo nimsaghue wangolo wapo, uo uniboiagha ngolonyi. Nichaiwika Roho yapo aighu kwake, nao uchawighoria mbari rose matanyo ghapo gha hachi.

¹⁹Ndechaasimana na mndungi hata kudeda na ndighi, hata lwaka lwake ndeluchaasikirika chienyi.

²⁰Mrangi ghufashikie ndechaaghuchikanya, na mtambi ghuakagha ndechaaghurimisha hata wameria kubonya hachi isime,

²¹na mbari rose wipate kusuwiria kwake.”

²²Nao ahoeni wandu wikamredia Jesu mndumu kitungure sena uko kituri, angu orekoghe na pepo izamie. Jesu ukam'boisa hata ukawona na kudeda wori.

²³Izungu jose ja wandu wikashinika na kughamba, “Kewada uhu suo Mwana wa Daudi?”

²⁴Ela iji Mafarisayo wasikira agho wikaghamba, “Mundu uhu wadariwinga pepo tu kwa ndighi ra Beelizebuli m'baa wa pepo.”

²⁵Nao Jesu ukimanya maghesho ghawo ukawizera, “Wuzuri ugho ghose ghuwaghanyikagha mafungu mafungu, ndeghudimagha kumanga anduangi; hata ndekuwadie muzi angu nyumba iwaghanyikagha cheni idimagha kumanga anduangi.

²⁶Shetani ukammbinga Shetani uakuwaghanya moni. Idana wuzuri ghwake-lee ghumanga wada?

²⁷Inyo mwaghamba angu nadawinga pepo kwa ndighi ra Beelizebuli; idana wana wenyu awo wiriwinga kwa ndighi rani? Kwa wundu ughu, awo wichamtanya inyo.

²⁸Ela ikakaia nadariwinga pepo kwa ndighi ra Roho wa Mlungu, huwo mmanye angu wuzuri ghwa Mlungu ghwameria kumchea.

²⁹“Angu idimika wada mundu kuingia nyumba ya mundu uko nandighi umsoke mali rake, usemfungie kande uja mundu uko na ndighi? Niko uchadima kumsoka mali rake.

³⁰Uo useko andwamweri nani wadalwa nani; na uo usekwanyagha andwamweri nani wadasaghisa.

³¹Kwa wundu ughu namzera, wandu wichalekelwa kaung'a na masholio ghawo ghose, ela kuja kumsholia Roho ndekuchaalekelwa putu.

³²Sena uo uchaaghora ilagho ja kumtangala Mwana wa Mdamu uchalekelwa, ela uo uchaaghora ilagho ja kumtangala Roho Mweli, ndechaalekelwa kwa wurumwengu ughu hata kwa wurumwengu ghuchagha wori.

³³“Mudi ghukakaia ghuboie na matunda ghake ghichakaia ghiboie, ela ghukakaia ghuzamie na matunda ghake ghichakaia ghizamie wokoni. Angu mudi ghwadamanyika kwa matunda gharo.

³⁴Inyo kivalwa cha choka! Mdima wada kughora malagho mecha mkikaia wawiwi? Angu mundu wadadeda ghaja gheni ghachua ngolonyi.

³⁵Mundu mucha wadafunya malagho mecha kufumanya na ghaja mecha uko nagho, na wokoni mundu mmbiwi kufumanya na ghuja wuwiwi uko nagho wadafunya maza rizamie.

³⁶Namghoria, Ituku ja Kutanywa, wandu wichafunya mtalo ghwa kula ilagho ja duu werejidedieghe.

³⁷Angu kwa madedo ghako kuchanekwa hachi, na kwa madedo ghako kuchatanywa.”

³⁸Niko walimu wamu wa Sharia na Mafarisayo wikamzera, “Mwalimu, dakunde kuwona mwakilimbiti kwako.”

³⁹Nao ukawitumbulia, “Kivalwa cha wuwiwi na kulaka chialola mwakilimbiti, ela ndechichaanekwa mwakilimbiti kuchumba uo wa mlodi Jona.

⁴⁰Angu sa iji koni Jona orekaieghe matuku adadu na vio varo andenyi ya kifu cha mngumi, niko koni na Mwana wa Mdamu uchaakaia andenyi ndoenyi matuku adadu.

⁴¹Wandu wa Nineve wichawuka aighu ya kivalwa ichi kutanyonyi, nawo wichachitanya kivalwa ichi kukaia chakosere, angu Wanineve wereherieghe kwa wundu ghwa machilo gha Jona; na aha jeko ilagho ibaa kuchumba Jona.

⁴²“Malkia wa kusinyi uchawuka andwamweri na kivalwa ichi kutanyonyi, nao uchachitanya kukaia chakosere. Angu uo orechieghe kufuma kula, kusikira malagho gha hikima ya Solomoni. Na aha jeko ilagho ibaa kuchumba Solomoni.

⁴³“Ija pepo ya makakala iji yamfuma mundu, yadasela-sela andu kuomie ikilola andu kohora, nayo yadasowa.

⁴⁴Niko yadaghora, ‘Nichaghuwuria wulalo ghwapo andu nerefumieghe.’ Hata iji yawuya na kukua ugho wulalo ghuko mduu, ghufwagirilo na kuwikwa nicha,

⁴⁵niko yadaghenda na kureda pepo zima mfungade rizamie kuchumba iyo cheni, naro rose radacha na kumngia uja mundu na kukaia aho. Kutua kwake mundu uo, wadazama kuchumba imbiri. Huwo niko ichaakaia kwa kivalwa ichi cha wuwiwi.”

⁴⁶Hata iji orekoghe ukidedanya na wandu, mae na waruna wikakaia kimusi shighadi wikikunda kummbona.

⁴⁷Mndumu ukaghenda ukamzera, “Mayo na wanyinyu weko shighadi wikunde mdedanye.”

⁴⁸Ela Jesu ukamtumbulia uo mundu, “Mao nani? Na wanidu ni weke ani?”

⁴⁹Niko ukaghughorua mkonu ghwake cha kwa wanughi wake ukaghamba, “Awa niwo mao na wanidu!

⁵⁰Angu uo ose uchaabonya lukundo lwa Aba uko mlungunyi nuo mwanidu wa womi, mwanidu wa waka, na mao.”