Read TAITA BIBLE – Biblia Ilagho Jiboie Kwa Wandu Wose MATHAYO 13 Bible Online

MATHAYO 13 - TAITA BIBLE – Biblia Ilagho Jiboie Kwa Wandu Wose bible

MATHAYO 13

¹Ituku ijo jeni Jesu ukafuma iyo nyumba ukaghenda mbai na mbai ya ndiwa, ukasea kidombo.

²Na izungu ibaa ja wandu jikamkwanyikia hata ukajoka ishuonyi ukasea kidombo; na wandu wose wikakaia kimusi mbai-mbai ya ndiwa.

³Nao Jesu ukawifundisha malagho mengi kwa mfwano ukighamba, “Muwi mbeu orefumieghe kuwa mbeu.

⁴Hata iji orekoghe ukiwa, rimu rikapotoka chienyi; na nyonyi rikacha rikarija.

⁵Rimu rikapotoka maghonyi andu kuserekoghe na ndoe nyingi. Rikabuka kwa wundu ghwa rija ndoe ndini rerekoghe.

⁶Ela iji iruwa jajoka jikarikora, na angu miri yake iserengirieghe ndenyi rikaoma.

⁷Rimu rikapotoka midinyi ya minjwa; na iyo midi ikazoghua ikaribwagha.

⁸Ela rimu rikapotoka ndoe iwurue, rikabuka na kuva; imu ighana, na imu mirongo irandadu, na imu mirongo idadu.

⁹Uo uko na madu ghesikira ndesikire.”

¹⁰Niko wanughi wikamchea Jesu wikamzera, “Kwaki kughoragha nawo kwa mifwano?”

¹¹Jesu ukawitumbulia, “Inyo mwanekelo kurimanya ngasu ra wuzuri ghwa mlungunyi, ela awo ndewinekelo anduangi.

¹²Angu uo uko na kindo chimu uchanekwa sena uchachurilwa, ela uo usewadie kindo chingi uchasokwa hata icho uko nacho.

¹³Kwa wundu ughu, niko naghora nawo kwa mifwano: angu kuzighana hoku wawuyazighana, ela ndewiwonagha; na kusikira hoku wawuyasikira, ela ndewisikiragha hata ndewitambukilwagha anduangi.

¹⁴Kwa huwu wulodi ghwa Isaya ghwakatia aighu kwawo ugho ghughambie: ‘Kusikira mchasikira, ela ndemchaatambukilwa; Kuzighana mchazighana, ela ndemchaawona.

¹⁵Angu wandu awa wafue vongo, na madu ghawo ndeghisikiragha, na meso ghawo ndeghiwonagha. Ngera si huwo kumangu meso ghawo ghawona, na madu ghawo kumangu ghasikira, kumangu kwa akili rawo watambukilwa, wikanighalukia ini, nani kumangu nawikira.’

¹⁶“Ela inyo mwarasimilwa angu meso ghenyu ghawona na madu ghenyu ghasikira.

¹⁷Namghoria loli, walodi wengi na wandu wa hachi werekoghe na bea eghiwona agha mughiwonagha ela ndewereghiwonieghe; na kusikira agha mughisikiragha, ela ndewereghisikireghe anduangi.

¹⁸“Idana sikirenyi kutambua kwaro mfwano ghwa muwi mbeu.

¹⁹Iji mndungi wasikira ilagho ja wuzuri ela ndejimtambukie, uja mmbiwi wadaacha na kujiinja ngolonyi kwake, nao wafwanana na mbeu ipotokie chienyi.

²⁰Na rija mbeu ripotokie maghonyi, ni sa mundu ujisikiragha ilagho nao wajiwusa ngolonyi kwake kwa kuboilwa,

²¹ela ndewadie miri ingi; wadakaia najo kwa ngelo vui, hata ghikacha matiriro angu kusumbulwa kwa wundu ghwa ilagho ijo, shwa wori wadajisigha.

²²Na ija mbeu ipotokie midinyi ya minjwa, ni sa mundu ujisikiragha ijo ilagho, ela masumbuko gha irangi iji na bea ra mali rajibwagha ijo ilagho, najo ndejivagha matunda ghangi anduangi.

²³Na ija mbeu iwalo ndoe iwurue, ni sa mundu usikiragha ijo ilagho, najo jamtambukia, nao wadava matunda kwa ighana, na kwa mirongo irandadu, na kwa mirongo idadu.”

²⁴Jesu ukawighoria wandu mfwano mzima, “Wuzuri ghwa mlungunyi ghwafanana na mundu orewaeghe mbeu ndicha mbuwenyi kwake.

²⁵Hata iji wandu walala ukacha m'maiza wake ukawa isaka jifwanane na ngano.

²⁶Nao iji mbeu rabuka na kuzoghua kuvikia kufunya vanga, niko ijo isaka jikazoya kuwoneka.

²⁷Wadumiki wa uja mundu wa mbuwa wikaghenda na kumghoria, ‘Wele bwana, nechi kodeewa mebu ndicha mbuwenyi kwako, isaka jafumie hao?’

²⁸Ukawizera, ‘M'maiza nuo ubonyere huwo.’ Wadumiki wake wikamzera, ‘Kwakunde dighende dijikuo?’

²⁹Ukawitumbulia, ‘Hata, sighenyi; isechekaia ngelo mujikuagha, mchekua na ngano wori.

³⁰Sighenyi rizoghuanye chiaimweri hata ngelo ekuwida. Ngelo iyo nichawizera awo wikuwidagha, zoenyi muinje isaka, mujifunge mafungu mafungu, eri jichekorwa. Ela ngano ikwanyenyi muingire nganyenyi kwapo.’”

³¹Nao Jesu ukawighoria wandu mfwano ghumu, “Wuzuri ghwa mlungunyi ghoofwanana na ndembe ya haradali mndumu oreiwaeghe mbuwenyi kwake.

³²Iyo cheni ni mbeu ndini kuchumba rose, ela ikabuka na kuzoghua, mudi ghwaro ghwawuya m'baa kuchumba miwalwa yose, hata nyonyi racha na kubonya vijungu vawo mbashunyi kwaro.”

³³Jesu ukawighoria wandu mfwano mzima sena, “Wuzuri ghwa mlungunyi ghoofwanana na chachu ereranganyiroghe ni muka umu andenyi ya vipimo vidadu va mufu, nagho ghose ghukawurushwa.”

³⁴Jesu orewighorieghe wandu malagho ghose kwa mifwano, hata kuseko na mfwano ndereghorieghe ilagho jingi anduangi;

³⁵eri agho ghereghoreloghe ni mlodi ghipate kukatia: “Nichaghora nawo kwa mifwano, nichawighoria malagho ghivisikie, kufuma kuumbwa kwa wurumwengu.”

³⁶Nao Jesu ukalaghana na wandu, ukangia nyumbenyi; na wanughi wake wikamchea wikimzera, “Kuditambushire ugho mfwano ghwa isaka jifwanane na ngano mbuwenyi.”

³⁷Jesu ukatumbulia, “Uo uwagha iro mbeu ndicha ni Mwana wa Mdamu,

³⁸mbuwa ni wurumwengu. Mbeu ndicha ni wana wa ugho wuzuri. Isaka jifwanane na ngano ni wana wa uo Mmbiwi;

³⁹na m'maiza uo orewaeghe ijo isaka ni Ibilisi. Makuwido ni kutua kwa ngelo, na awo wikuwidagha ni weke malaika.

⁴⁰Sa iji koni ijo isaka jifungwagha na kukorwa modonyi, niko koni ichaakaia kutua kwa ngelo;

⁴¹uja Mwana wa Mdamu, uchawiduma weke malaika wake wiwikwanye na kuwiinja na mbai ya wuzuri ghwake, awo wose wiredagha kaung'a na wose wibonyagha wuwiwi;

⁴²wiwikumbe kwa iwiwi ja modo ghubirie, na aho wichalila na kuja maghegho.

⁴³Niko wahachi wichang'ala-ng'ala sa iruwa kwa wuzuri ghwa Ndee wawo. Uo uko na madu ghesikira ndesikire.

⁴⁴“Wuzuri ghwa mlungunyi ghwafwanana na mali ivisiro mbuwenyi. Mndumu uendaiwona, ukaivisa sena; ukaghenda kwa kuboilwa, ukauza vilambo vake vose orekoghe navo, ukaighua ija mbuwa.

⁴⁵“Sena Wuzuri ghwa mlungunyi ghwafwanana na m'bonyi biashara ulolagha lulu ndicha.

⁴⁶Hata iji waiwona lulu imu ya zoghori mbaa, ukaghenda ukauza vilambo vake vose orekoghe navo, ukaighua ija lulu.

⁴⁷“Sena wuzuri ghwa mlungunyi ghwafwanana na nyavu erekumbiloghe baharinyi, ikawada mbari rose ra samaki.

⁴⁸Hata iji yameria kuchua, wandu wikairuda pwani, wikasea kidombo kusaghua; samaki riboie wikarikumba vikapunyi kwawo, na iro rizamie wikaridagha.

⁴⁹Niko koni ichaakaia kutua kwa ngelo; malaika wichacha kuwiinja wandu wawiwi wifume kwa wandu wa hachi,

⁵⁰wiwikumbe awo wawiwi kwa iwiwi ja modo ghubirie. Aho wichalila na kuja maghegho.”

⁵¹Niko Jesu ukawikotia, “Welee, agha ghose ghamtambukia?” Wikamtumbulia, “Ee.”

⁵²Nao ukawizera, “Niko huwu, kula mwalimu wa Sharia uwuyagha mnughi wa wuzuri ghwa mlungunyi, oofwanana na mundu wa nyumba, ufunyagha kwa mali rake vilambo viwishi na va kala.”

⁵³Nao iji Jesu wameria kughora iyo mifwano yose ukafuma aja,

⁵⁴ukaghenda mzinyi kwawo. Ukakaia ukiwifundisha wandu andenyi ya sunagogi yawo, hata wikashinika wikighamba, “Mundu uhu wapatire hao hikima ihi na awa weke mwakilimbiti?

⁵⁵Welee, uhu suo uja mwana wa msaramala? Mae ndewangwagha Maria, na waruna si weke Jakobo, Josefu, Simoni, na Juda?

⁵⁶Na waruna wa waka wose ndewiko aha andwamweri nesi? Agha malagho waghipatire hao?”

⁵⁷Nao wikaleghana nao. Ela Jesu ukawizera, “Mlodi ndesowagha ishima anduangi, isaakaia ni kwa isanga jake na kwa wandu wa nyumbenyi kwake!”

⁵⁸Aho nderedimieghe kubonya weke mwakilimbiti wengi, kwa wundu ghwa kulegha kurumiria kwawo.