Read TAITA BIBLE – Biblia Ilagho Jiboie Kwa Wandu Wose MATHAYO 16 Bible Online

MATHAYO 16 - TAITA BIBLE – Biblia Ilagho Jiboie Kwa Wandu Wose bible

MATHAYO 16

¹Nao Mafarisayo na Masadukayo wikamchea Jesu, wikamdegha kwa kumlomba ubonye mwakilimbiti ufumagha mlungunyi.

²Jesu ukawitumbulia, “Iji luma lwa kenyi lwavika, mwadaghamba, ‘Ndoe ikaia nicha angu mlungunyi kwatinika.’

³Luma lwa nakesho mwadaghamba, ‘Idime kuchakaia na kiremba kibaa, angu mlungunyi kwatinika na kukaia na marundu.’ Idana inyo mwaichi kutambua vimu kwa kuzighana mawingunyi, nenyo mwalemwa ni kutambua malagho gha ngelo iri.

⁴Kivalwa cha wuwiwi na kulaka chialola mwakilimbiti, nacho ndechichaanekwa mwakilimbiti ungi, ela uja moni wa Jona.” Nao ukawisigha ukaghenda chia yake.

⁵Nao iji wanughi wake wameria kuruwuka kimonu cha ndiwa, wereliwieghe kudwa mikate.

⁶Jesu ukawizera, “Manyenyi mkulindie na chachu ya Mafarisayo na ya Masadukayo!”

⁷Wikazoya kuzerana, “Ni iji disedwae mikate niko wawuyadizera huwo.”

⁸Jesu ukimanya maghesho ghawo ukawizera, “Inyo wandu wa irumirio itini, kwaki mzeranagha wei ni iji msedwae mikate?

⁹Hata na iji ndemtambukilwagha? Ndemkumbukagha ija mikate misanu nereichikanyireghe kwa wandu elfu isanu, na vikapu ni vilinga va masighariko gha mikate moretumbanyireghe?

¹⁰Angu ija mikate mfungade erewaghiloghe wandu elfu inya, na vikapu ni vilinga va masighariko gha mikate moretumbanyireghe?

¹¹Kwaki msetambukilwagha angu siwueghora maza ra mikate? Mkulindie na chachu ya Mafarisayo na Masadukayo.”

¹²Niko wanughi wake wikamanya angu odeeka ukiwizera wikulindie na mafundisho gha Mafarisayo na Masadukayo, ela si chachu ya mikate anduangi.

¹³Hata iji Jesu wavika chia ra Kaisaria Filipi, ukawikotia wanughi wake, “Welee, wandu waghoragha Mwana wa Mdamu nani?”

¹⁴Wikamtumbulia, “Wamu wadaghora oho ko Johane M'baputizi, wazima Elija, na wazima Jeremia angu umu wa walodi.”

¹⁵Jesu ukawikotia, “Inyo mwaghoragha ini nani?”

¹⁶Simoni Petro ukatumbulia, “Oho ko Kristo, Mwana wa Mlungu uko moyo.”

¹⁷Jesu ukaghamba, “Kwarasimilwa oho Simoni mwana wa Jona, angu si mdamu ungi wakutambushira wuloli ughu anduangi, ela ni Aba uko mlungunyi wakufunukuya.

¹⁸Nani nakuzera, Oho ko Petro, na aighu ya igho iji, nichajiagha ikanisa japo, hata kifwa ndechichaadima kujisima anduangi.

¹⁹Nichakuneka oho mifunguo ya wuzuri ghwa mlungunyi. Icho kuchaachifunga ndoenyi chichafungika mlungunyi, na icho kuchaachifungua ndoenyi, chichafungulwa mlungunyi.”

²⁰Niko ukawilaghira wanughi wake wisakemghoria mndungi wei uo nuo Kristo.

²¹Kufuma ngelo iyo, Jesu ukazoya kuwighoria wanughi wake worinyi, “Ni suti ini nighende Jerusalemu, na aho nichatirirwa maza nyingi ni waghosi, wakohani wabaa, na walimu wa Sharia. Nichabwaghwa, ela ituku ja kadadu nicharukishwa.”

²²Nao Petro ukamruda kambai ukazoya kumkemia, “Mlungu ndetangale agho putu Bwana, jingi ndeghichaakupata.”

²³Ela Jesu ukaghaluka ukamzera Petro, “Injika noko, Shetani! Kwaawuyanikuwisha. Maghesho ghako si gha Kimlungu anduangi, ela ni gha kidamu.”

²⁴Niko Jesu ukawizera wanughi wake, “Mndungi ukakunda kukaia mnughi wapo, suti ukukane uo moni, ughuduke msalaba ghwake uninughe.

²⁵Angu uo ukundagha kujikira irangi jake uchajilaghasha;

²⁶ela uo ujilaghashagha irangi jake kwa wundu ghwapo uchajipata sena. Ichamfwana mundu kii ukaghupata wurumwengu ghose na kujilaghasha irangi jake? Angu uchafunya kii kuindana na irangi jake?

²⁷Angu Mwana wa Mdamu uchacha na wubaa ghwa Ndee andwamweri na weke malaika wake, nao uchamlipa kula mundu kunughana na mabonyo ghake.

²⁸Namghoria loli, weko wandu aha wisechaafwa anduangi hata wameria kummbona Mwana wa Mdamu ukicha kwa Wuzuri ghwake.”