Read TAITA BIBLE – Biblia Ilagho Jiboie Kwa Wandu Wose MATHAYO 18 Bible Online

MATHAYO 18 - TAITA BIBLE – Biblia Ilagho Jiboie Kwa Wandu Wose bible

MATHAYO 18

¹Ngelo iyo wanughi wikamchea Jesu wikamkotia, “Nani uko m'baa kwa wuzuri gha Mlungu?”

²Jesu ukawanga mwana mtini ukammbika kimusi aghadi kwawo,

³ukawizera, “Namghoria loli, ngera mseghalukagha na kuwuya sa wanake watini, jingi ndemchaangia kwa wuzuri ghwa mlungunyi anduangi.

⁴Uo ose uchaakusera karakara na uhu mwana mtini, nuo moni m'baa kwa wuzuri ghwa mlungunyi.

⁵Na uo ose umkaribishagha mwana mtini sa uhu kwa irina japo, wanikaribisha ini.

⁶“Ngera mndungi wamshekeria umu wa awa watini winirumiriagha ubonye kaung'a, ichakaia nicha uo ufungo igho ibaa jesha singonyi kwake, uvululisho andu kumilie baharinyi.

⁷Ni bugha kwa wurumwengu kwa wundu ghwa matimo ghishekeriagha kubonya kaung'a. Ni suti makuwisho ghiche, ela ni bugha kwake uo mundu ushekeriagha matimo ghiche!

⁸“Ngera mkonu ghwako angu kughu kwako kuakushekeria kubonye kaung'a, kukudumbuo kukude noko. Ikaia baa kungie iranginyi kusewadie mkonu angu kughu kumu, kuchumba kukaia na mikonu angu na maghu awi nao kukumbo modonyi ghwa kala na kala.

⁹Ngera iriso jako jakushekeria kubonye kaung'a, kujide noko; ikaia baa oho kungie iranginyi kifondo, kuchumba kukaia na meso awi, nao kukumbo jehanamunyi ya modo.

¹⁰“Mkulindie msemmenye ungi wa awa watini; angu namghoria, weke malaika wawo aho mlungunyi ngelo rose wadaghuzighana wushu ghwa Aba uko mlungunyi. [

¹¹Angu Mwana wa Mdamu odeecha kukira icho cherelagharieghe.]

¹²Mmbona wada mundu ukakaia na ng'ondi ighana, nao ulaghashe imweri, ndechaasigha rija mirongo ikenda na ikenda mghondinyi, ughende kuilola ija imweri ilagharie anguwada?

¹³Hata iji waiwona, kwa loli namghoria, waboilwanya na ihi ng'ondi imweri kuchumba rija mirongo ikenda na ikenda riselagharie.

¹⁴Huwo koni Ndeyo onyu uko mlungunyi ndeboilwagha wei umu wa awa watini ulaghaye anduangi.

¹⁵“Iji mwanyinyu wakubonyera kaung'a, ghenda kummbonyere ikosa jake muko wawi. Ukakusikira, kwampata mwanyinyu.

¹⁶Iji walegha kukusikira kudo mundu umweri angu wawi, eri ilagho jimangisho kwa wushuhuda ghwa washahidi wawi angu wadadu.

¹⁷Ikakaia na awo ndeuwisikiragha, kujighorie ikanisa, nao ngera walegha kujisikira hata ikanisa, kumtale sa mundu wa mbari zima, na sa mmbwadi wushuru.

¹⁸“Namghoria loli, ijo jose muchaajifunga ndoenyi jichafungika mlungunyi, na ijo jose mchaajifungua ndoenyi, jichafungulwa mlungunyi.

¹⁹Sena namghoria inyo, ngera wawi wenyu wapatana ndoenyi kulomba ilagho jingi, Aba wa mlungunyi uchawibonyera ilagho ijo.

²⁰Angu wawi angu wadadu wikakwanyika kwa irina japo, na ini nichakaia ahoeni andwamweri nawo.”

²¹Niko aho Petro ukamchea Jesu ukamkotia, “Bwana, mwanidu unibonyere kaung'a kalinga ngimfuya wughoma? Ni mando mfungade anguwada?”

²²Jesu ukamtumbulia, “Sikuzeraa wei ni mandu mfungade, ela ni mirongo mfungade mandu mfungade.

²³Niko huwu wuzuri ghwa mlungunyi ghwafanana na mzuri umu orekundieghe kulawua mitalo ya wadumiki wake.

²⁴Hata iji wazoya kulawua, ukaredelwa umu orekoghe na sile yake talanto elfu ikumi.

²⁵Ela uja mdumiki nderekoghe na kilambo chingi chemlipa anduangi; kwa huwo bwana wake ukafunya momu uo mdumiki uuzo, na mkake, na wana wake, chiaimweri na vilambo vake vose orekoghe navo upate kuilipa ija sile.

²⁶Nao uja mdumiki ukamdungia ngokoro ukilomba, ‘Kurumaghianye nani ee Bwana, nani nichakulipa rose.’

²⁷Niko uja bwana ukawadwa ni wughoma, ukamleka ija sile yose, ukamsigha ughende chia yake.

²⁸“Ela uja mdumiki ukafuma ukamkua umu wa wadumiki wambao uko na sile yake ya dinari ighana jimweri; ukammbwada ukawoka kumnyora ukighamba, ‘Nilipe sile yapo.’

²⁹Nao uja mdumiki mmbao ukamdungia ngokoro ukamlomba ukighamba, ‘Kurumaghianye nani na ini nichakulipa.’

³⁰Ela ukamleghia, ukaghenda na kumngira kifungonyi hata wameria kuilipa ija sile.

³¹Niko waja wadumiki wambao iji wawona agho ghibonyekie, wikawawa na ndighi; wikaghenda na kumghoria bwana wawo agho ghose gherebonyekieghe.

³²Nik uja bwana ukammbanga uja mdumiki ukamzera, ‘Oho ko mdumiki uzamie na ndighi! Korenivoyeghe nani ngakulekia ija sile yose.

³³Welee, ndeerekufwaneghe na oho kumfuye wughoma mdumiki mmbenyu sa iji nerekufuyeghe wughoma anguwada?’

³⁴Niko kwa kuwawa nandighi uja bwana ukafunya momu uja mdumiki ungiro kifungonyi, hata wameria kuilipa ija sile yose.

³⁵Ni huwo koni Aba uko mlungunyi ndechaamleka inyo, ngera mselekanagha mmbeni na mmbeni kwa ngolo renyu rose.”