Read TAITA BIBLE – Biblia Ilagho Jiboie Kwa Wandu Wose MATHAYO 19 Bible Online

MATHAYO 19 - TAITA BIBLE – Biblia Ilagho Jiboie Kwa Wandu Wose bible

MATHAYO 19

¹Hata iji Jesu wameria kughora agho, ukafuma Galilaya na kughenda isanga ja Judea kimonu cha Jordani.

²Wandu wengi wikamnugha, nao ahoeni ukawiboisa.

³Mafarisayo wamu wikamchea kumkotia makoto kwa kumtima, “Welee, Sharia yamrumiriagha mundu kumsigha mkake kwa kula sababu?”

⁴Jesu ukawitumbulia, “Jingi ndemshomie sa iji iandikilo, angu Mlungu kufuma imbiri orewiumbieghe mndwawomi na muka,

⁵ukaghamba, ‘Kwa wundu ughu mundu uchawisigha ndee na mae, uwadane na mkake, nawo waja wawi wichakaia mumbi ghumweri?’

⁶Huwo ndewiko wawi sena anduangi, ela ni mumbi ghumweri. Kwa huwu, awo Mlungu orewitumalieghe chia imweri, mdamu ungi usakewitanya.”

⁷Ela awo wikamkotia, “Kwaki sena Musa oredilaghirieghe wei muka uneko barua ya kutana, na kusighwa?”

⁸Jesu ukawitumbulia, “Ni kwa wundu ghwa kukua kwa ngolo renyu niko Musa oremnekieghe rusa ya kuwisigha waka wenyu. Ela ndeerekoghe huwu imbiri anduangi.

⁹Nani namzera, uo ose uchaamsigha mkake, isaakaia ni kwa wundu ghwa kulaka, nao ulowuo mzima, walaka.”

¹⁰Nao wanughi wake wikamzera, “Ikakaia malagho gha mundu na mkake niko ghiko huwo, kulowua ndekufwanagha anduangi.”

¹¹Jesu ukawizera, “Si wandu wose widimagha kughiwusa mafundisho agho kungi, ela ni awo tu winekelo ni Mlungu.

¹²Angu weko weke kolowi kufuma kuvalwa kwawo, na wamu weko wibonyero kolowi ni wandu, na wamu weko wikubonyere weni kukaia kolowi kwa wundu ghwa wuzuri ghwa Mlungu. Uo udimagha kughiwusa mafundisho agho ndeghiwuse.”

¹³Nao wandu wamu wikamredia Jesu wanake watini upate kuwiwikiria mikonu na kuwilombia. Ela wanughi wikawikemia.

¹⁴Jesu ukaghamba, “Wilekenyi wanake watini wiche kwapo, msakewighiria, angu wuzuri ghwa mlungunyi ni kwa wandu wiko sa awa.”

¹⁵Ukawiwikiria mikonu, ukafuma aho ukaghenda chia yake.

¹⁶Nao mndumu ukamchea Jesu ukamkotia ukighamba, “Mwalimu, nibonye ilaghoki icha eri nijipate irangi ja kala na kala?”

¹⁷Jesu ukamzera, “Kwaki kunikotiagha ja ijo jiko icha? Oko umweri tu uko mucha. Ela iji kukunde kungie iranginyi kuiwadie memu.”

¹⁸Uja mundu ukamkotia, “Memu iao?” Jesu ukamzera, “Kusakebwagha, kusakelaka, kusakeiwa, kusefunye wushuhuda ghwa tee,

¹⁹kuwineke ishima ndeyo na mayo; na kumkunde mmbenyu sa iji kukukundagha oho kumoni.”

²⁰Uja mdawana ukamzera, “Agho ghose naghiwadie, nibonye kii chimu sena?”

²¹Jesu ukamzera, “Iji kukunde kukaie kukatie putu, kughende kuuze mali rako rose, kuwineke wakiwa, na oho kuchakaia na mali mlungunyi, sena kuche kuninughe.”

²²Uja mdawana uendasikira agho, ukaghenda na wasi, angu orekoghe na mali nyingi.

²³Niko Jesu ukawizera wanughi wake, “Namghoria loli, kuchakua nandighi kwa mundu uko na mali kungia kwa wuzuri ghwa mlungunyi.

²⁴Sena namzera, kwaangue ngamila kuida ilanga ja siziano, kuchumba mundu uko na mali kungia kwa wuzuri ghwa mlungunyi.”

²⁵Waja wanughi wiendasikira agho, wikashinika na kumkotia, “Idana nani udimagha kukia?”

²⁶Jesu ukawizighana ukawizera, “Kwa wadamu ilagho iji ndejidimikagha, ela kwa Mlungu maza rose radimika.”

²⁷Nao Petro ukamzera, “Zighana isi dasighie vose dikakunugha, dipata kii?”

²⁸Jesu ukawizera, “Namghoria loli, ngelo Mwana wa Mdamu uchaasea kidombo kwa kifumbi cha wubaa ghwake kwa wurumwengu mmbishi, inyo wori mchaviseria vifumbi va nguma ikumi na viwi, mkiritanya mbari ikumi na iwi ra Israeli.

²⁹Na kula umu usighie nyumba, angu waruna wa womi na wa waka, angu ndee, angu mae, angu wana, angu mbuwa kwa wundu ghwapo; uchapata mando ighana na kuchumba chiaimweri na irangi ja kala na kala.

³⁰Ela wengi wiko imbiri wichakaia wa kutua, na wa kutua, wikaie wa imbiri.”