Read TAITA BIBLE – Biblia Ilagho Jiboie Kwa Wandu Wose MATHAYO 2 Bible Online

MATHAYO 2 - TAITA BIBLE – Biblia Ilagho Jiboie Kwa Wandu Wose bible

MATHAYO 2

¹Jesu orevaloghe Bethlehemu isanga ja Judea, iji Herode orekoghe mzuri. Ngelo vui nyuma ya kuvalwa kwake, wamanyi wa nyerinyeri wikacha Jerusalemu kufuma chia ra mashariki;

²wikakotia, “Oko hao uja mwana uvalo mzuri wa Wayahudi? Angu nyerinyeri yake daiwonie kufuma chia ra mashariki, nesi dacha kumtasa.”

³Nao iji Mzuri Herode wasikira malagho agho, ukakambwa ni chongo andwamweri na wandu wose werekoghe Jerusalemu.

⁴Niko ukawiwanga wakohani wabaa na walimu wa Sharia ukawikotia, “Welee, Masiha uvailwa hao?”

⁵Nawo wikamtumbulia, “Uchavailwa Bethlehemu, isanga ja Judea. Angu niko mlodi oreandikieghe:

⁶‘Oho Bethlehemu wa Isanga ja Juda, ndekuko mtini putu aghadi ya vilongozi va Juda; kwa kukaia kwako uchafuma kilongozi, uchaawighenja wandu wapo Israeli.’”

⁷Niko Herode ukawiwanga kwa kiviso waja wamanyi wa nyerinyeri, ukakunda kumanya kufuma kwawo ngelo iyo nyerinyeri iwonekie.

⁸Nao ukawiduma Bethlehemu ukighamba, “Ghendenyi mpeleleze nicha malagho gha uo mwana, nao mkameria kummbona, muniredie malagho; nani nighende kumtasa.”

⁹Nao nyuma ya kumsikira mzuri, awo wamanyi wa nyerinyeri wikaghenda, nao ola ija nyerinyeri wereiwonieghe chia ra mashariki, ereghendieghe imbiri kwawo na kumanga andu aja mwana orekoghe.

¹⁰Nawo wiendaiwona iyo nyerinyeri, wikaboilwa loli-loli;

¹¹wikaghenda na kungia andu aja mwana orekoghe, wikammbona uko na mae Maria, wikamdungia ngokoro wikamtasa. Wikafungua mali rawo, wikamfunyira manosi gha dhahabu, ubani, na manemane.

¹²Nawo wiendawonyerwa ni Mlungu kwa ndodo wisakewuya kwa Herode, wikaghala cha mzawo kwa chia zima.

¹³Nao iji wameria kughala, malaika wa Bwana ukamfutukia Josefu ndodonyi ukamzera, “Wuka kummbwade mwana na mae, mkimbirie Misri, mkaie ahoeni hata namghoria; angu Herode uchamlola mwana upate kum'bwagha.”

¹⁴Josefu ukawuka ukammbwada mwana na mae, ukafuma nakio kughenda Misri.

¹⁵Nao ukakaia aho hata Herode ukafwa. Agho gherebonyekieghe, eri malagho gha Bwana ghikatie; agho ghereghoreloghe ni mlodi ghighambagha, “Kufuma Misri, ngammbanga Mwana wapo.”

¹⁶Herode uendamanya angu awo wamanyi wa nyerinyeri wamkita, ukajokwa ni machu loli-loli. Ukafunya momu ghobwagha wana wa womi wose wiseidie miaka iwi wiko Bethlehemu na mbai-mbai yaro; kunughana na icho kimu oreghoreloghe ni awo wamanyi wa nyerinyeri.

¹⁷Niko ghikakatia agho ghereghoreloghe ni mlodi Jeremia:

¹⁸“Lwaka loresikiroghe muzi ghwa Rama, Lwaka lwa kulila na kukema mchungu; Raheli ukiwililia wana wake, ukalegha kuhoreshwa, angu wameria kufwa.”

¹⁹Nao nyuma ya Herode kufwa, malaika wa Bwana ukamfutukia Josefu ndodonyi uko Misri,

²⁰ukamzera, “Wuka kummbwade mwana na mae, kuwuye isanga ja Israeli, angu awo werekundieghe kum'bwagha mwana wamerie kufwa.”

²¹Nao Josefu ukawuka ukammbwada mwana na mae, wikawuya isanga ja Israeli.

²²Ela iji Josefu wasikira angu Arikelao wabonyero kukaia mzuri wa Judea wulalo ghwa ndee Herode, ukaobua kughenda aho, nao umeria kuwonyerwa ndodonyi, ukaghenda cha isanga ja Galilaya,

²³ukakaia muzi ghuwangwagha Nazareti; eri malagho ghighorelo ni walodi ghikatisho ghighambagha, “Uchawangwa Mnaziri.”