Read TAITA BIBLE – Biblia Ilagho Jiboie Kwa Wandu Wose MATHAYO 22 Bible Online

MATHAYO 22 - TAITA BIBLE – Biblia Ilagho Jiboie Kwa Wandu Wose bible

MATHAYO 22

¹Jesu ukaghora nawo kwa mfwano sena ukighamba,

²“Wuzuri ghwa mlungunyi ghwafanana na mzuri umu orem'bonyereghe mwana wake karamu ya arusi;

³ukawiduma wadumiki wake wiwiwange awo werekaribishiroghe kwa iyo karamu ya arusi, ela wikalegha kucha.

⁴Ukaduma wadumiki wazima sena ukighamba, ‘Wizerenyi awo wandu werekaribishiroghe, Olenyi nawika vindo vapo tayari, njau na ngache ribandie rameria kubwaghwa, na kula kilambo cheko tayari; choonyi arusinyi.’

⁵Ela awo wandu ndeweretalieghe, wikaghibonya malagho ghake ghiangue wikaghenda chia rawo, umu mbuwenyi kwake, na mzima kwa kazi rake.

⁶Na waja weresigharikieghe, wikawiwada wadumiki wake, wikawibonya kiwiwi wikawibwagha.

⁷Uja mzuri ukawawa ni ngolo, ukaduma masikari ghake, ukawitotesha waja wabwaghi, ukaghukora muzi ghwawo.

⁸Ukawizera wadumiki wake, ‘Karamu ya arusi eko tayari ela awa werekaribishiroghe ndewichefwana.

⁹Kwa huwu ghendenyi chia ra matano, na awo wose mchaawiwona, muwirede arusinyi.’

¹⁰Nao waja wadumiki wikafuma chienyi kose wikawikwanya wose werewiwonieghe, wawiwi na wecha wori. Nyumba ya arusi ikachua waghenyi.

¹¹Ela iji mzuri wangia kuwilawua waghenyi wake, ukammbona mndumu aho usewadie irwao ja arusi;

¹²ukamzera, ‘Mghenyi wapo, kwangirie wada aha kusewadie irwao ja arusi?’ Nao ukanyama kima.

¹³Nao mzuri ukawizera waja wadumiki, ‘Mfungenyi mikonu na maghu, mumkumbe kwa kira chiko shighadi; aho kuchakaia kulila na kuja maghegho.’

¹⁴Angu awo wiwangwagha ni wengi, ela awa wisaghulwagha ni watini.”

¹⁵Nao Mafarisayo wikafuma wikaghenda kubonya njama seji widimagha kumdegha Jesu wimmbwade kwa madedo ghake.

¹⁶Wikamdumia wamu wa wanughi wawo chiaimweri na wanjama wa Herode wikighamba, “Mwalimu, dakumanya angu koko mloli, na chia ya Mlungu kwadaifundisha kwa loli, hata ndekutalagha mndungi, angu kusetalagha mawubaa gha wadamu anduangi.

¹⁷Idana dighorie seji kuwonagha. Ni hachi kumfunyira Kaisari kodi anguwada?”

¹⁸Ela Jesu ukighumanya wuwiwi ghwawo ukawizera, “Inyo waji-kuwi, kwaki munitimagha?

¹⁹Niwonyerenyi iyo pesa ilipwagha kodi.” Nao wikamredia.

²⁰Jesu ukawizera, “Fwana na maandiko ghiko aha ni vani?”

²¹Wikaghamba, “Ni va Kaisari.” Nao ukawizera, “Kwa huwu mnekenyi Kaisari vindo va Kaisari na Mlungu vindo va Mlungu.”

²²Nao iji weresikireghe agho wikashinika, wikamsigha wikaghenda chia rawo.

²³Ituku jija jeni Masadukayo wamu (awa wighambagha ndekuko kuruka kungi kwa wafu anduangi) wikamchea Jesu wikamkotia,

²⁴“Mwalimu, Musa oreghambieghe, ‘Ngera mundu wafwa nao wasigha muka usewadie mwana ungi, uo mundu mruna, suti ummbuse uja muka umvaie mruna wana.’

²⁵Idana korekoghe na waruna mfungade mzedu; nao uja wa imbiri ukalowua, ukafwa usevae wana wangi, ukamsighia mruna uja muka.

²⁶Huwo koni uja wa kawi na wa kadadu hata wose mfungade wikasia.

²⁷Kutua kwa wose, uja muka moni ukafwa.

²⁸Idana kwa uko kurukenyi uchakaia muka wa ani aghadi ya awo mfungade? Angu wose weremlowueghe.”

²⁹Jesu ukawitumbulia, “Mwakosa kwa kulemwa ni kughimanya Maandiko na ndighi ra Mlungu.

³⁰Angu iji wafu wichaaruka wichakaia sa weke malaika wiko mlungunyi, ndewichaalowua hata ndewichaalowolwa anduangi.

³¹Idana seji wafu wirukishwagha, ndemshomie seji mzerelo ni Mlungu?

³²‘Ini ne Mlungu wa Abrahamu, Mlungu wa Isaaka, na Mlungu wa Jakobo.’ Uo ndekaiagha Mlungu wa wafu anduangi, ela wa awa wiko moyo.”

³³Nao iji izungu wasikira agho, wikaghishinikia mafundisho ghake.

³⁴Ela iji Mafarisayo wasikira angu wawinyamirisha Masadukayo, wikakwana chia imweri.

³⁵Umu wa walimu wa Sharia ukamkotia Jesu kwa kumtima,

³⁶“Mwalimu, momu m'baa ghwa Sharia ni ghuao?”

³⁷Jesu ukatumbulia, “Kumkunde Bwana Mlungu wako kwa ngolo yako yose, na kwa roho yako yose, na kwa akili rako rose.

³⁸Ughu nigho momu m'baa na ghwa imbiri.

³⁹Na ghwa kawi ghoofwanana na ugho: Kumkunde mmbenyu sa iji koni kukukunde kumoni.

⁴⁰Sharia yose ya Musa na mafundisho gha walodi ghategemia memu ihi iwi.”

⁴¹Nao iji Mafarisayo wamu werekwanyikieghe chia imweri, Jesu ukawikotia

⁴²“Mmbona wada aighu ya Kristo, uo ni mwana wani?” Wikamtumbulia, “Ni mwana wa Daudi.”

⁴³Jesu ukawizera, “Yakaia wada sena Daudi kwa Roho Mweli ummbange Bwana ukighamba:

⁴⁴‘Bwana oremzerieghe Bwana wapo; sea kidombo kwa mkonu ghwapo ghwa kiwomi hata niwiwike wamaiza wako aisi maghunyi kwako.’

⁴⁵Ikakaia Daudi moni wammbanga ‘Bwana,’ wele ukaia wada mwana wake sena?”

⁴⁶Aho ndekorekoghe na mndungi oredimieghe kumtumbulia ilagho jingi. Na kufuma ituku ijo mndungi nderemkotereghe ilagho jingi sena anduangi.