Read TAITA BIBLE – Biblia Ilagho Jiboie Kwa Wandu Wose MATHAYO 28 Bible Online

MATHAYO 28 - TAITA BIBLE – Biblia Ilagho Jiboie Kwa Wandu Wose bible

MATHAYO 28

¹Nyuma ya Sabato, Ituku ja Njumwa kokio, Maria Magdaleni na uja Maria mzima wikaghenda kuzighana kaburi.

²Ahoeni ghukakaia msughusiko m'baa ghwa ndoe; angu malaika wa Bwana oreserieghe kufuma mlungunyi, ukajibingilisha jija igho na kujiseria kidombo.

³Na fwana yake erekoghe sa luhehia, na marwao ghake gherekoghe gha chokwa sa thaluji;

⁴hata waja walindiri kwa wundu ghwa kuobua na kusughusika, wikawuya sa wandu wifue.

⁵Nao uja malaika ukawizera waja waka, “Inyo msakeobua, angu namanya mwaawuyamlola Jesu uo oresulubishiroghe.

⁶Ndeuko aha kungi, ela wameria kuruka sa iji koni oreghorieghe. Choonyi mmbone andu Bwana orelalieghe.

⁷Idana ghendenyi shwa-shwa muwighorie wanughi wake, ‘Waruka kufuma kwa wafu, nao ola wamkiria kwenda Galilaya; aho niko mchaammbona.’ Olenyi namghoria.”

⁸Niko wikafuma aho kaburinyi shwa-shwa, wikiobua na kuboilwa, wikaghenda na kuwighoria wanughi wake.

⁹Na ahoeni Jesu ukakwana nawo ukawizera, “Sere ndeikaie konyu.” Niko wikacha na kummbwada maghu ghake, wikamtasa.

¹⁰Jesu ukawizera, “Msakeobua, ghendenyi muwighorie wanidu wighende Galilaya, na aho wichaniwona.”

¹¹Nao iji waka werekoghe wikighenda, walindiri wamu nawo wikaghenda mzinyi na kuwighoria wakohani wabaa malagho ghaja ghose gherebonyekieghe.

¹²Nawo iji werekwanyikieghe andwamweri na waghosi, wikabonya mwandu na kuwineka waja masikari pesa nyingi wikighamba,

¹³“Inyo moozera wandu huwu: ‘Wanughi wake wedeecha nakio wikamwiwa iji isi derekoghe dilale.’

¹⁴Na ilagho ijo jikasikirwa ni m'baa wa isanga, isi dichaja nao malagho, eri usem'bonye ilagho jingi.”

¹⁵Nao wikawada rija pesa wikabonya wokoni sa iji werelaghiriloghe. Na ilagho ijo jikaghoreka woruwo kwa Wayahudi hata linu.

¹⁶Nao waja wanughi ikumi na umweri wikaghenda Galilaya kwa ugho mghondi Jesu orewilaghirieghe.

¹⁷Hata iji weremmbonieghe wikamtasa, ela wamu wikakaia na ngera.

¹⁸Jesu ukawichea ukawizera, “Namerie kunekwa nguma rose mlungunyi na ndoenyi.

¹⁹Idana ghendenyi m'bonye wandu wa mbari rose wikaie wanughi, mkiwibaputiza kwa irina ja Aba, na ja Mwana, na ja Roho Mweli;

²⁰mkiwifundisha kughiwadia agho ghose neremlaghirieghe. Nani olenyi neko andwamweri nenyo hata kukatia kwa ngelo.”