Read TAITA BIBLE – Biblia Ilagho Jiboie Kwa Wandu Wose MATHAYO 3 Bible Online

MATHAYO 3 - TAITA BIBLE – Biblia Ilagho Jiboie Kwa Wandu Wose bible

MATHAYO 3

¹Matuku agho Johane M'baputizi ukacha kireti cha Judea ukazoya kuchila

²ukighamba, “Heenyi angu wuzuri ghwa Mlungu ghwavika kaavui.”

³Johane nuo mlodi Isaya oreghorieghe malagho ghake ukighamba, “Lwaka lwa mndumu lwasikirika kireti, ‘Boisenyi chia ya Bwana, ghoruonyi mivori yake.’”

⁴Johane orerwaeghe nguwo ibonyero kwa mafuri gha ngamila, ukakufunga mkowa ghwa mrongo kiwonunyi kwake. Vindo vake verekoghe zighe na wuki ghwa kireti.

⁵Wandu wikamchea kufuma Jerusalemu, na isanga jose ja Judea, na mbai-mbai ya moda ghwa Jordani kose;

⁶wikihea kaung'a rawo, nao ukawibaputiza modenyi ghwa Jordani.

⁷Nao iji Johane wawiwona Mafarisayo wengi na Masadukayo wikimchea uwibaputize ukawizera, “Inyo kivalwa cha choka! Nani umfundire mughikimbie agho makabo ghichagha?

⁸Idana wonyerenyi kwa mabonyo ghenyu seji mwahea.

⁹Hata msakeghesha mkighamba wei, ‘Isi de wana wa Abrahamu.’ Angu namghoria, Mlungu wadima kughibonya magho agha ghiwuye wana wa Abrahamu.

¹⁰Hata idana isoka jawikwa tayari kudema miri ya midi; kwa huwu kula mudi ghusevagha matunda ghiboie, ghuchademwa na kukumbwa modonyi.

¹¹Ini nam'baputiza kwa machi kuwonyera angu mwahea. Ela uo uchagha nyuma yapo oko nandighi kunichumba ini; hata ini sifwane kumdukia vadu vake. Uo ucham'baputiza kwa Roho Mweli na modo.

¹²Nao oko na lungo mikonunyi kwake, upate kuelesha viro vake; ngano uingire nganyenyi kwake, ela makanda ughikore kwa modo ghuserimikagha anduangi.”

¹³Ngelo iyo Jesu ukacha Jordani kufuma Galilaya upate kubaputizwa ni Johane.

¹⁴Ela Johane ukazoya kumghiria ukimzera, “Wele oho kuacha kwapo, na ni ini inifwaneghe niche kwako kunibaputize?”

¹⁵Jesu ukamzera, “Leka ikaie huwu idana, angu kwa chia ihi dichaghikatisha agho Mlungu ughikundagha.” Nao Johane ukamrumiria.

¹⁶Nao nyuma ya Jesu kubaputizwa, ukajoka shwa kufuma machinyi. Na mlungunyi kukafunukuka, ukammbona Roho wa Mlungu ukisea sa mbughi na kukaria aighu yake.

¹⁷Na lwaka lukasikirika kufuma mlungunyi lukighamba, “Uhu nuo Mwana wapo mkundwa, uniboiagha loli-loli.”