Read TAITA BIBLE – Biblia Ilagho Jiboie Kwa Wandu Wose MATHAYO 4 Bible Online

MATHAYO 4 - TAITA BIBLE – Biblia Ilagho Jiboie Kwa Wandu Wose bible

MATHAYO 4

¹Nao Roho ukamghenja Jesu cha kireti, upate kutimwa ni Ibilisi.

²Ukafunga tumu matuku mirongo ina na vio varo, na kutua kwaro ukasikira njala.

³Niko Mtimi ukamchea ukamzera, “Ikakaia oho ko Mwana wa Mlungu, ghizere magho agha ghiwuye mikate.”

⁴Jesu ukamtumbulia, “Yaandikilo andenyi ya Maandiko Ghielie, ‘Mdamu ndechakaia moyo kwa mkate ghoni anduangi, ela ni kwa kula ilagho jighorwagha ni Mlungu.’”

⁵Nao Ibilisi ukamdwa Jesu hata Jerusalemu ghuja muzi ghwa wueli; ukammbika koighu hekalunyi,

⁶ukamzera, “Ikakaia oho ko Mwana wa Mlungu, kuchunuo kondonyi, angu yaandikilo, ‘Mlungu uchawilaghira weke malaika wake kwa wundu ghwako, nawo wichakuwada mikonunyi kwawo, kusechekuwa kughu kwako ighonyi.’”

⁷Jesu ukamzera, “Sena yaandikilo, ‘Kusakemtima Bwana Mlungu wako.’”

⁸Niko Ibilisi ukamjosa mghondinyi m'baa, ukammbonyera mawuzuri ghose gha wurumwengunyi na wubaa ghwaro,

⁹ukamzera, “Nichakuneka ivi vose iji kwanidungia ngokoro na kunitasa.”

¹⁰Niko Jesu ukamzera, “Ghenda noko Shetani! Yaandikilo, ‘Kumtase Bwana Mlungu wako, na kumdumikia uo moni uekeri.’”

¹¹Nao Ibilisi ukamsigha, na weke malaika wikacha kumdumikia.

¹²Jesu uendasikira angu Johane wameria kungirwa kifungonyi, ukaghenda cha Galilaya.

¹³Nao nderekaieghe Nazareti anduangi, ela ukaghenda Kafarnaumu, muzi ghuko mbai na mbai ya ndiwa ya Galilaya, mwanonyi ghwa isanga ja Zebluni na Naftali; ukakaia aho.

¹⁴Madedo ghereghoreloghe ni mlodi Isaya ghipate kukatia ghighambagha,

¹⁵“Isanga ja Zebluni na isanga ja Naftali, kulangaya baharinyi, kimonu cha Jordani, Galilaya ya mbari zima!

¹⁶Wandu awo werekoghe kirenyi, waghuwona mwengere m'baa. Na kwa awo werekoghe isangenyi na kiju cha kifwa, mwengere ghwalangala kwawo.”

¹⁷Nao kufuma aho Jesu ukazoya kuchila ukighamba, “Heenyi, angu Wuzuri ghwa Mlungu ghwavika kaavui.”

¹⁸Nao iji Jesu orekoghe ukisela mbai na mbai ya ndiwa ya Galilaya, ukawiwona wawadi samaki wawi, mundu na mruna; Simoni (uwangwagha Petro), na mruna Andrea; werekoghe wikiwada samaki kwa nyavu ndiwenyi.

¹⁹Jesu ukawizera, “Ninughenyi; nani nicham'bonya mkaie wawadi wandu.”

²⁰Nao shwa wikarisigha nyavu rawo wikamnugha.

²¹Ukaghenda imbiri katini ukawiwona wandu wawi sena mundu na mruna, Jakobo na Johane wana wa Zebedayo, wikiriboisa nyavu rawo. Jesu ukawiwanga,

²²nao shwa wikajisigha ishua na ndee wawo, wikamnugha.

²³Nao Jesu ukaghenda Galilaya kose ukifundisha andenyi ya sunagogi rawo, ukichila Ilagho Jiboie ja Wuzuri ghwa Mlungu. Ukaboisa kula mbari ya makongo na saka rerekoghe kwa wandu.

²⁴Na sare yake ikaera isanga jose ja Siria, wandu wikamredia wakongo wa mbari rose werekoghe wikisirimika kwa pepo na kuzimia, andwamweri na wakelemeri. Jesu ukawiboisa wose.

²⁵Izungu ibaa ja wandu wikamnugha wifumie Galilaya, Dekapoli, Jerusalemu, Judea, na kimonu cha Jordani.