Read TAITA BIBLE – Biblia Ilagho Jiboie Kwa Wandu Wose MARKO 1 Bible Online

MARKO 1 - TAITA BIBLE – Biblia Ilagho Jiboie Kwa Wandu Wose bible

MARKO 1

¹Uku niko kuzoya kwaro Ilagho Jiboie ja Jesu Kristo, Mwana wa Mlungu,

²sa iji iandikilo chuonyi cha mlodi Isaya: “Zighana, ini namduma mdumi wapo ukirie imbiri kwako, kuboisa chia yako.

³Lwaka lwa mndumu lwasikirika kireti: ‘Boisenyi chia ya Bwana, ghoruonyi mivori yake.’”

⁴Johane M'baputizi orechieghe kireti, ukichilia wandu wihee na kubaputizwa, wipate kulekwa kaung'a rawo.

⁵Niko wikamghendia wandu wose wa isanga ja Judea na wa Jerusalemu wose, wikirumiria na kuhea kaung'a rawo; nao ukawibaputiza modenyi ghwa Jordani.

⁶Johane orekoghe urwae nguwo ibonyero kwa mafuri gha ngamila, na mkowa ghwa mrongo kiwonunyi kwake. Vindo vake verekoghe zighe na wuki ghwa kireti.

⁷Nao ukawichilia wandu ukighamba, “Kuchagha mundu nyuma yapo uwadie ndighi kunichumba ini, hata sifwane kughoghoma nifunguo kamba ra vadu vake.

⁸Ini nam'baputiza kwa machi, ela uo moni ucham'baputiza kwa Roho Mweli.”

⁹Matuku ghaja gheni, Jesu orechieghe kufuma Nazareti, muzi ghwa Galilaya; ukabaputizwa ni Johane modenyi ghwa Jordani.

¹⁰Nao ahoeni ukifuma machinyi, ukawona mlungunyi kwafunukulwa, na Roho ukimseria aighu yake sa mbughi.

¹¹Lwaka lukasikirwa kufuma mlungunyi, “Oho ko Mwana wapo, mkundwa, kuniboiagha loli-loli.”

¹²Ahoeni, Roho ukamghenja noko cha kireti.

¹³Ukakaia aho matuku mirongo ina, ukitimwa ni Shetani, ukakaianya na nyamandu ra isakenyi; ela weke malaika wikakaia wikimdumikia.

¹⁴Nyuma ya Johane kuwadwa na kungirwa kifungonyi, Jesu oreghendieghe Galilaya, ukichila Ilagho Jiboie ja Mlungu,

¹⁵ukighamba, “Ngelo yakatia na wuzuri ghwa Mlungu ghwavika kaavui; heenyi mjirumirie Ilagho Jiboie.”

¹⁶Nao ukiida mbai mbai ya ndiwa ya Galilaya, ukawiwona wawadi samaki wawi, Simoni na mruna Andrea, wikikumba nyavu ndiwenyi.

¹⁷Jesu ukawizera, “Ninughenyi, na ini nicham'bonya mkaie wawadi wandu.”

¹⁸Shwa wori wikarisigha nyavu rawo, wikamnugha.

¹⁹Nao ukasughuda imbiri katini, ukawona sena mundu na mruna, Jakobo na Johane, wana wa Zebedayo, wiko mashuonyi wikiboisa nyavu rawo.

²⁰Ahoeni Jesu ukawiwanga, nawo wikamsigha ndee wawo Zebedayo mashuonyi, ukwanye na wandu wa kazi, wikamnugha.

²¹Wikavika muzi ghwa Kafarnaumu; hata iji javika ituku ja Sabato, Jesu ukangia andenyi ya sunagogi, ukafundisha.

²²Wikashinulwa ni mafundisho ghake, angu nderefundishireghe sa walimu wa Sharia anduangi, ela orefundishireghe sa mundu uwadie nguma.

²³Ahoeni sunagoginyi, orekoghe mundu uko na pepo ya makakala, nao ukakema,

²⁴ukighamba, “Isi dawadieki kwako, Jesu wa Nazareti? Kwaacha kuditotesha? Nakuichi oho nani; ni uja Mweli wa Mlungu.”

²⁵Jesu ukaikania ukighamba, “Nyama kima, kufume kwake.”

²⁶Niko ija pepo ya makakala imeria kumkuna uja mundu, na kukema kwa lwaka lubaa, ikamfuma.

²⁷Wose wikashinika, wikakotiana wikighamba, “Ni ilaghoki iji? Si mafundisho mawishi agha? Kwa nguma, walaghira pepo ra makakala, naro ramsikira.”

²⁸Nao ahoeni sare yake ikaera isangenyi kose Galilaya, na mbai-mbai yaro.

²⁹Hata iji Jesu na wanughi wake wameria kufuma sunagoginyi, wikaghenda na kungia nyumbenyi kwa Simoni na Andrea, wikwanye andwamweri na Jakobo na Johane.

³⁰Nao mkekwake Simoni orekoghe walala wulinyi, uko na homa; niko wikamghoria Jesu.

³¹Nao ukacha, ukammbwada mkonu, ukammbusira na homa ikamsigha; ukawidumikia.

³²Luma lwa kenyi iruwa jiendaswa, wikamredia wakongo wose na awo werekoghe na pepo.

³³Wandu wose wa muzi ghuja werekwanyikieghe mnyangonyi.

³⁴Nao ukawiboisa wose werekoghe na makongo mazima-mazima, ukariwinga pepo nyingi, ukarighiria pepo risakededa angu reremmanyireghe.

³⁵Nao nakesho, Jesu ukawuka kokesho kio, ukafuma, ukaghenda andu kusewadie wandu, kulomba Mlungu.

³⁶Nao Simoni na awo werekwanyeghe, wikafuma wikimlola;

³⁷hata iji wammbona wikamzera, “Ola-lee, wandu wose wawuyakulola.”

³⁸Jesu ukawizera, “Diighendie mizi mizima nipate kuwichilia, angu agha nigho ghereniredieghe.”

³⁹Niko ukaghenda andu kose Galilaya, ukangia sunagoginyi rawo, ukichila na kuwinga pepo.

⁴⁰Mndumu uko na sima, ukamchea, ukamdungia ngokoro na kumvoya ukimzera, “Ngera kwakunda, kwadima kunielesha.”

⁴¹Jesu ukawadwa ni wughoma, ukaghorua mkonu ghwake, ukamuadada ukimzera, “Nakunda, eleshwa oho.”

⁴²Ahoeni sima yake ikainjika, ukaeleshwa.

⁴³Nao Jesu ukamlaghira nandighi ughende shwa wori,

⁴⁴ukimzera, “Manya kusemghorie mndungi; ela ghenda kwa mkohani, kukuwonyere kumoni kwake, kufunye vizongona va kueleshwa kwako, sa iji koni verelaghiriloghe ni Musa, ghupate kukaia wushuhuda kwawo.”

⁴⁵Ela ukafuma, ukazoya kueresha ilagho jija andu kose, hata Jesu nderedimieghe kungia mzinyi worinyi anduangi, ela ukakaia shighadi kivisonyi andu kusewadie wandu. Ela hata huwo saki, wikamchea kufuma andu kose.