Read TAITA BIBLE – Biblia Ilagho Jiboie Kwa Wandu Wose MARKO 10 Bible Online

MARKO 10 - TAITA BIBLE – Biblia Ilagho Jiboie Kwa Wandu Wose bible

MARKO 10

¹Jesu ukafuma aho, ukaghenda isanga ja Judea hata kimonu cha Jordani. Mazungu ghikamkwanyikia sena, na sa mzango ghwake, ukawifundisha.

²Nao wikacha Mafarisayo, wikamkotia kwa kumtima, “Welee, ni loli mundu kumsigha mkake, anguwada?”

³Jesu ukawitumbulia kwa kuwikotia, “Welee, Musa oremzerieghe wada?”

⁴Wikaghamba, “Musa orerumirieghe mundu kumneka mkake barua ya kutana, na kumsigha.”

⁵Ela Jesu ukawizera, “Musa oremuandikieghe ilagho ijo kwa wundu ghwa kukua kwa ngolo renyu.

⁶Ela kufuma wurumwengu kuumbwa, Mlungu orewiumbieghe mundu wa womi na wa waka.

⁷Kwa huwu mundu uchamsigha ndee na mae, umaziriane na mkake,

⁸na awo wawi wichawuya mumbi ghumweri.

⁹Kwa huwu, icho cheretumaliloghe ni Mlungu, mdamu ungi usakechitanya.”

¹⁰Wiendangia nyumbenyi, wanughi wake wikamkotia sena ilagho ijo.

¹¹Nao ukawizera, “Uo ose uchaamsigha mkake na kulowua mzima, wamvavira mkake kwa wulaki ghwake.

¹²Na muka wori, ngera wasigha mumi wake na kulowolwa ni mundu mzima, walaka.”

¹³Wandu wamu wikamredia Jesu wanake watini upate kuwiadada, ela waja wanughi, wikawikemia.

¹⁴Jesu iji wawona ilagho jija, ukawawa ni ngolo, ukawizera, “Wilekenyi wanake wiche kwapo, msakewikania, angu Wuzuri ghwa mlungunyi ni ghwa awo sa awa.

¹⁵Namghoria loli, uo ose useghurumiriagha Wuzuri ghwa Mlungu sa mwanake mtini, na jingi ndechaangia andenyi kwaro anduangi.”

¹⁶Nao ukawiwadia mikonunyi kwake ukawirasimia kwa kuwiwikiria mikonu.

¹⁷Hata iji Jesu wazoya charo chake, mundu umu ukamghendia na iseghe, ukamdungia ngokoro, ukamkotia, “Mwalimu mucha, yanifwana nibonye ilaghoki ima nipate ifwa ja irangi ja kala na kala?”

¹⁸Jesu ukamzera, “Kwaki kwaniwanga mucha? Ndekuwadie mucha ungi anduangi ela Mlungu moni.

¹⁹Oho kwaichi memu to: ‘Kusakebwagha, kusakelaka, kusakeiwa, kusakemzighiria mndungi kwa tee, kusakekenga mndungi, na kuwineke ishima ndeyo na mayo.’”

²⁰Nao ukamzera, “Mwalimu, ihi yose naiwadie kufuma wanake ghwapo.”

²¹Nao Jesu ukamzighana kwa lukundo, ukamzera, “Ola kwasowa wundu ghumweri: ghenda kuuze ivo vose kuko navo, kuwineke wakiwa, na oho kuchakaia na mali mlungunyi; konyuma kuche kuninughe.”

²²Ela ukaghusha makunya kwa wundu ghwa ilagho jija, ukaghenda na wasi, angu orekoghe na mali nyingi.

²³Jesu ukazighana chia rose, ukawizera wanughi wake, “Kuchakua nandighi saki kwa wandu wiko na mali kungia kwa Wuzuri ghwa Mlungu!”

²⁴Wanughi wake wikaghishinikia madedo ghake. Ela Jesu ukawizera sena, “Wanake, kwakurie saki kungia kwa Wuzuri ghwa Mlungu!

²⁵Kwaangue ngamila kuida ilanga ja siziano, kuchumba mundu uko na mali kungia kwa Wuzuri ghwa Mlungu.”

²⁶Wanughi wake wikashinika loli-loli, wikamzera, “Idana, nani udimagha kukia?”

²⁷Jesu ukawizighana, ukawizera, “Kwa wadamu ndekudimikagha anduangi, ela kwa Mlungu kwadimika; angu kwa Mlungu maza rose radimika.”

²⁸Nao Petro ukamzera, “Ola isi dasigha vose dikakunugha oho.”

²⁹Jesu ukaghamba, “Namghoria loli, ndekuwadie mndungi usighie nyumba, angu waruna wa womi na wa waka, angu mae, angu ndee, angu wana, angu mbuwa, kwa wundu ghwapo na kwa wundu ghwa ijo Ilagho Jiboie,

³⁰ima usepatagha kwa agha matuku mando ighana, nyumba, waruna wa womi na wa waka, weke mae, weke ndee, wana, na mbuwa, andwamweri na kutirirwa; sena kwa matuku ghichagha, uchapata irangi ja kala na kala.

³¹Ela wengi wiko imbiri idana, wichakaia nyuma; na awo wiko nyuma, wichakaia imbiri.”

³²Nao werekoghe chienyi wikijoka cha Jerusalemu, na Jesu ukakiria imbiri kwawo. Wanughi wake wikashinika na awo weremnughieghe wikaobua. Niko ukawiruda kambai waja ikumi na wawi, ukazoya kuwighoria iri maza richaampata.

³³Ukaghamba, “Olenyi diajoka Jerusalemu, na Mwana wa Mdamu uchafunywa kwa wakohani wabaa, na walimu wa Sharia, nawo wichamtanya ubwagho, na kumfunya kwa wandu wa mbari zima.

³⁴Wichamseka, wichamchuya mada, wichamkaba na kiboko na kum'bwagha; ela kusinda matuku adadu, ucharuka.”

³⁵Jakobo na Johane, wana wa Zebedayo, wikamsughudia Jesu kaavui, wikamzera, “Mwalimu, dakunda kudibonyere icho chose dichaakulomba.”

³⁶Jesu ukawikotia, “Mwakunde nim'bonyereki?”

³⁷Nawo wikamzera, “Kudirumirie dikaie kidombo umu mkonu ghwako ghwa kiwomi na umu mkonu ghwako ghwa kiwaka kwa wubaa ghwako.”

³⁸Jesu ukawizera, “Inyo ndemmanyagha mwawuyalomba kii. Welee, mwadima kunywa kikombe icho nichaanywa ini? Angu kubaputizwa sa iji nibaputizwagha ini?”

³⁹Wikamzera, “Dadima,” Jesu ukawizera, “Kikombe ichi ninywagha ini mchanywa inyo, na wubaputizo nibaputizwagha nagho ini mchabaputizwa nagho inyo.

⁴⁰Ela kukaia kidombo mkonu ghwapo ghwa kiwomi na mkonu ghwapo ghwa kiwaka si ini kurumiria anduangi, ela ni kwa waja weni wiwikilo.”

⁴¹Nao iji wasikira waja wanughi ikumi, wikazoya kuwibonyera machu Jakobo na Johane.

⁴²Jesu ukawiwanga, ukawizera, “Inyo mwamanya angu awo witalwagha kubonya nguma aighu ya rija mbari zima, weko nandighi aighu kwawo; na wabaa wawo wadawibonyera nguma.

⁴³Ela konyu isekaie huwo anduangi; ela uo ose ughambagha ukaie m'baa konyu suti uwuye mdumiki onyu.

⁴⁴Na uo ose uchaaghamba ukaie imbiri konyu, suti uwuye mzumba wa wose.

⁴⁵Angu uja Mwana wa Mdamu wori nderechieghe kudumikilwa anduangi, ela kudumika uo moni, na kufunya irangi jake jikaie wukomboli kwa wengi.”

⁴⁶Nao wikabusa Jeriko, hata iji orekoghe ukifuma aho, andwamweri na wanughi wake na izungu ja wandu, mundu umu mlombi ufue meso uwangwagha Bartimayo, mwana wa Timayo, orekoghe kidombo chia na mbai.

⁴⁷Nao iji wasikira angu ni Jesu wa Nazareti, ukazoya kukema ukighamba, “Jesu Mwana wa Daudi, nifue wughoma.”

⁴⁸Wandu wengi wikamkemia wikimzera unyame kima, ela uo mundu ukachuria kukema na ndighi, “Ee Mwana wa Daudi, nifue wughoma.”

⁴⁹Jesu ukadunga maghu, ukaghamba, “Mmbangenyi.” Nao wikammbanga uja mundu ufue meso wikamzera, “Kaia na ngolo; wuka wakuwanga.”

⁵⁰Nao ukada nguwo yake, ukarama shwa, ukamchea Jesu.

⁵¹Jesu ukamkotia, “Kwakunde nikubonyereki?” Uja mundu ufue meso ukatumbulia, “Mwalimu, neekunda nipate kuwona.”

⁵²Jesu ukamzera, “Ghenda chia rako, irumirio jako jakuboisa.” Nao ahoeni ukazoya kuwona, ukamnugha Jesu chienyi.