Read TAITA BIBLE – Biblia Ilagho Jiboie Kwa Wandu Wose MARKO 12 Bible Online

MARKO 12 - TAITA BIBLE – Biblia Ilagho Jiboie Kwa Wandu Wose bible

MARKO 12

¹Jesu ukazoya kughora nawo kwa mifwano. “Mundu umu orelimieghe mbuwa ya mizabibu, ukairighia masanju, ukakota kina chekamia zabibu, ukaagha mnara. Ukaipangisha mbuwa iyo kwa walimi, nao moni ukadamba cha isanga izima.

²Kimu chekuwida zabibu chiendavika, ukaduma mdumiki wake kwa walimi, wimpatire ifungu ja mavalo gha mizabibu.

³Ela awo walimi wikammbwada, wikamkaba na kummbinga duu usedwae kindo chingi.

⁴Ukawidumia mdumiki mzima sena; nao moni wikam'bara lughuma lwa chongo, na kum'bonyera kiwiwi loli-loli.

⁵Ukaduma mzima sena; nao moni wikam'bwagha. Na wazima wengi, wamu wikawikaba, na wamu wikawibwagha.

⁶Nao orekoghe na umu sena, mwana wake, wangolo wake. Kutua ukamduma uo moni kwawo, ukighamba, ‘Wicham'bonyera ishima mwana wapo.’

⁷Ela waja walimi wikazerana weni na weni, ‘Uhu ni mundu wa ifwa, nndokonyi dim'bwaghe na ifwa jichawuya jedu.’

⁸Wikammbwada, wikam'bwagha, wikamkumba shighadi ya mbuwa ya mizabibu.

⁹“Idana, uchabonya wada uja bwana wa mbuwa ya mizabibu? Uchacha na kuwitotesha waja walimi, na mbuwa ya mizabibu uchaipangisha kwa walimi wazima.

¹⁰Welee, jingi ndemshomie iandiko iji? ‘Igho jija werejileghieghe waaghi, nijo jeni jawuya ibaa ja mbembenyi.

¹¹Bwana nuo orebonyereghe ilagho ijo, najo ni ishiniko ibaa kodu.’”

¹²Nao vilongozi va Wayahudi wikakunda kummbwada, kwa kukaia weremanyireghe angu mfwano ugho ni kwa wundu ghwawo. Ela wikaobua izungu, wikamsigha na kughenda chia rawo.

¹³Nao Mafarisayo wamu na Wanjama wa Herode wikadumwa wimdeghe Jesu kwa madedo ghake.

¹⁴Nawo wiendavika, wikamzera, “Mwalimu, dakumanya oho koko mloli, hata ndekuobuagha angu kutala wubaa ghwa mndungi anduangi, ela kwadafundisha kwa loli chia ya Mlungu. Welee, keni ni hachi kulipa kodi kwa Kaisari angu siko kungi?

¹⁵Dilipe angu disakelipa?” Ela Jesu ukimanya seji wiko waji-kuwi, ukawizera, “Kwaki munitimagha? Niredienyi pesa niiwone.”

¹⁶Nao wikamredia. Nao moni ukawikotia, “Welee, fwana ihi na iandiko iji ni vani?” Wikamtumbulia, “Ni va Kaisari.”

¹⁷Nao Jesu ukawizera, “Mnekenyi Kaisari vilambo viko vake Kaisari, na Mlungu vilambo viko vake Mlungu.” Nao wikashinika loli-loli.

¹⁸Niko wikamchea Masadukayo, awa wighambagha ndekuko kuruka kungi kwa wafu anduangi, wikamkotia ikoto,

¹⁹“Wele Mwalimu, Musa oredilaghirieghe ukighamba, ‘Ngera mundu wafwa, nao wasigha muka usewadie mwana ungi, uo mundu mruna suti ummbuse uja muka, umvaie mruna wana.’

²⁰Idana, korekoghe na wandu mfungade waruna. Uja wa imbiri ukalowua muka, ukafwa usesighie wana wangi.

²¹Uja wa kawi, ukamlowua; nao wokoni ukafwa usesighie wana wangi; na wa kadadu woruwo.

²²Wose mfungade wikafwa wisesighie wana wangi anduangi. Kutua, uja muka moni ukafwa.

²³Welee, ngelo eruka-lee, uchakaia muka wa ani; angu wose mfungade weremlowueghe?”

²⁴Jesu ukawizera, “Aho niko mwakosera, kwa kukaia mseghimanyagha Maandiko hata ndighi ra Mlungu anduangi.

²⁵Angu iji wafu wichaaruka, ndewichaalowua hata ndewichaalowolwa anduangi, ela wichakaia sa weke malaika wiko mlungunyi.

²⁶Ela kwa malagho gha wafu seji wirukishwagha, welee, jingi ndemshomie chuonyi cha Musa andu kuandikilo malagho gha kisachi chiakagha modo? Mlungu oremzerieghe Musa ‘Ini ne Mlungu wa Abrahamu, wa Isaaka na wa Jakobo’.

²⁷Nao moni ndekaiagha Mlungu wa wafu anduangi, ela wa awa wiko moyo. Mwakosa nandighi inyo.”

²⁸Nao umu wa walimu wa Sharia ukacha, ukasikira sa iji werekoghe wikimkotia, nao ukimanya angu wawitumbulia nicha, ukamkotia Jesu, “Welee, aghadi ya memu yose, ughu ghuchumbie ni ghuao?”

²⁹Jesu ukamtumbulia, “Momu ghwa imbiri nigho ughu: ‘Sikira Israeli! Bwana Mlungu odu ni Bwana umweri.

³⁰Kumkunde Bwana Mlungu wako kwa ngolo yako yose, kwa roho yako yose, kwa akili rako rose na kwa ndighi rako rose.’

³¹Na ghwa kawi nigho ughu: ‘Kumkunde mmbenyu sa iji koni kukukunde kumoni.’ Ndeghuko momu ghungi mzima ghuchumbagha memu ihi anduangi.”

³²Uja mwalimu wa Sharia ukamzera, “Ni loli mwalimu, kwaghora nicha angu Mlungu ni umweri, hata ndekuwadie mzima anduangi, ela uo moni.

³³Na kumkunda kwa ngolo yose, na kwa akili rose, na kwa ndighi rose, na kumkunda mmbenyu sa iji kukukunde kumoni, kwachumba putu vizongona vose.”

³⁴Nao Jesu iji wawona seji waghora kwa akili, ukamzera, “Oho ndekuko kula na Wuzuri ghwa Mlungu anduangi.” Na kufuma aho, mndungi nderedimieghe sena kumkotia ilagho jingi anduangi.

³⁵Nao Jesu ukifundisha Hekalunyi, ukakotia, “Welee, yakaia wada kwa walimu wa Sharia kughamba wei Kristo ni mwana wa Daudi?

³⁶Daudi moni kwa Roho Mweli oreghorieghe: ‘Bwana oremzerieghe bwana wapo, sea kidombo mkonu ghwapo ghwa kiwomi; hata niwiwike wamaiza wako wikaie aisi ya maghu ghako.’

³⁷Uo Daudi moni wammbanga Kristo ‘Bwana’; ukaia wada mwana wake sena?” Na jija izungu ibaa werekoghe wikimsikiria kwa kuboilwa.

³⁸Nao Jesu ukifundisha, ukaghamba, “Manyenyi walimu wa Sharia, awa wikundagha kusela na nguwo ndacha, na kurogholwa masokonyi,

³⁹na kuseria vifumbi va imbiri sunagoginyi, na malalo gha imbiri karamunyi.

⁴⁰Awa niwo wandu wiwijagha waka wakiwa, sena wikilomba malombi mengi wipate kukaswa. Awa wichapata kutanywa kubaa.”

⁴¹Jesu ukasea kidombo kaavui na isanduku jekumbiria mafunyo, ukizighana sa iji izungu jikumbagha mafunyo andenyi ya jija isanduku. Wandu wengi wiko na mali, wikakumba pesa nyingi.

⁴²Aho, ukacha muka umu mkiwa ufuilo ni mumi wake, ukakumba pesa iwi ra shaba, naro rakatana na senti ikumi.

⁴³Jesu ukawiwanga wanughi wake, ukawizera, “Namghoria loli, uhu muka mkiwa ufuilo ni mumi wake, wafunya nyingi kuchumba wose wakumba pesa isandukunyi.

⁴⁴Angu awa wose waafunya masighariko gha wungi ghwa mali rawo, ela uo, kwa wukiwa ghwake, wafunya rose uko naro; najo ni irangi jake jose.”