Read TAITA BIBLE – Biblia Ilagho Jiboie Kwa Wandu Wose MARKO 14 Bible Online

MARKO 14 - TAITA BIBLE – Biblia Ilagho Jiboie Kwa Wandu Wose bible

MARKO 14

¹Idana, ghedesighwa matuku awi tu kuvikia Ndima ya Pasaka na ya Mikate Isewadie Chachu. Wakohani wabaa na walimu wa Sharia werekoghe wikilola chia emmbwada Jesu kwa wuya, wim'bwaghe.

²Ela wereghambieghe, “Ngelo ya ndima mbai, iechekaia nganyi wandunyi.”

³Nao iji Jesu orekoghe Bethania, uko kidombo vindonyi nyumbenyi kwa Simoni Mkoma, ukacha muka umu uwadie chupa ya mavuda ghiboie gha nardo gha zoghori m'baa na ndighi, ukaichikanya na kumdiria agho mavuda chongonyi kwake.

⁴Ela wandu wamu werekoghe ahoeni wikabonya machu wikighamba weni na weni, “Kwaki mavuda agha ghawuyanonwa duu?

⁵Kumangu ghauzwa kwa dinari kuchumba maghana adadu, na kunekwa wakiwa!” Wikamkemia uja muka.

⁶Ela Jesu ukawizera, “Mlekenyi; kwaki mumjishagha wasi, nao wanibonyera ilagho jiboie?

⁷Wakiwa mokwanye matuku ghose, na iji mwakunda mwadima kuwitesia; ela ndemchaakanya na ini matuku ghose anduangi.

⁸Waabonya agha gheni udimagha; angu wawada kushinga mumbi ghwapo mavuda imbiri ya mariko ghapo.

⁹Namghoria loli, kula andu kose jichaachilwa Ilagho Jiboie wurumwengunyi kose, iji najo wajibonya muka uhu jichaghorwa kwa kumkumbuka.”

¹⁰Nao Juda Iskarioti, uo orekoghe umu wa waja ikumi na wawi, ukawighendia wakohani wabaa umfunye Jesu kwawo.

¹¹Nawo iji wasikira; wikaboilwa, wikalaghana wimneke pesa. Nao moni ukalola chia ifwane emfunya kwawo.

¹²Ituku ja imbiri ja Mikate Isewadie Chachu, ngelo ng'ondi ya Pasaka ibwaghwagha, wanughi wake wikamkotia, “Welee, ni hao kukunde dikuboisire Ndima ya Pasaka?”

¹³Jesu ukaduma wawi wa wanughi wake, ukawizera, “Ghendenyi mzinyi, ahoeni mchakwana na mundu udwae mtungi ghwa machi. Mnughenyi

¹⁴hata nyumba uchaangia, mumzere mundu wa iyo nyumba, ‘Mwalimu wakotia welee: ni hao chumba chapo chiko chejia Pasaka na wanughi wapo?’

¹⁵Nao moni uchammbonyera chumba kibaa cha naighu chipambilo, na kuwikwa nicha; ahoeni diboisirenyi.”

¹⁶Wanughi wikafuma, wikaghenda mzinyi, wikawona sa iji koni Jesu orewizerieghe. Wikaboisa Ndima ya Pasaka nicha.

¹⁷Hata iji lwavika luma lwa kenyi, Jesu ukacha andwamweri na waja ikumi na wawi.

¹⁸Nao iji werekoghe mezenyi wikija vindo, Jesu ukaghamba, “Namghoria loli, umu onyu dijanyagha, uchanifunya.”

¹⁹Wikazoya kungilwa ni wasi ngolonyi, wikamkotia umu umu wikighamba, “Welee, ni ini?”

²⁰Jesu ukawizera, “Ni umu wa awa ikumi na wawi, uhu dishingianyagha bakuli imweri.

²¹Angu Mwana wa Mdamu uaghenda sa iji koni iandikilo aighu yake; ela ni bugha kwake uja mundu umfunyagha Mwana wa mdamu! Ni nicha kumangu userevaloghe uja mundu anduangi.”

²²Iji werekoghe wikija, Jesu ukawusa mkate, ukaghurasimia, ukaghuchikanya, ukawineka wanughi wake ukighamba, “Wusenyi: ughu nigho mumbi ghwapo.”

²³Ukawusa kikombe, hata iji wafunya chawucha, ukawineka; wikanywa kwa icho cheni wose.

²⁴Ukawizera, “Ihi niyo bagha yapo ya ilaghano, idikagha kwa wundu ghwa wandu wengi.

²⁵Namghoria loli, sichaanywa sena divei ya mizabibu anduangi, hata ituku jija niinywagha mbishi kwa Wuzuri ghwa Mlungu.”

²⁶Nao iji wameria kubora lumbo, wikafuma, wikaghenda cha Mghondi ghwa Mizeituni.

²⁷Jesu ukawizera wanughi wake, “Inyo mmbose muchanisigha, angu yaandikwa, ‘Nichamkaba mlisha na ng'ondi richasaghisika.’

²⁸Ela nyuma ya kuruka kwapo, nichamkiria cha Galilaya.”

²⁹Ela Petro ukamzera, “Hata ngera wose wichakimbia, ini sichaakimbia anduangi.”

³⁰Jesu ukamzera, “Nakughoria loli, angu oho, ichi kio cheni, imbiri njogholo isededie kawi, kuchanikana mando adadu.”

³¹Ela Petro ukafunga ndighi kughora, “Hata ngera dafwanya chia imweri, sichaakukana anduangi.” Na wanughi wose wikaghora wokoni.

³²Nao wikabusa andu kuwangwagha Gethsemane, na Jesu ukawizera wanughi wake, “Kaienyi kidombo aha ini ngilomba.”

³³Ukamdwa Petro, Jakobo na Johane; ukazoya kungilwa ni kiture na kuja wasi loli-loli.

³⁴Ukawizera, “Ngolo yapo yaja wasi nandighi kuvikia kufwa. Kaienyi aha mchereshe.”

³⁵Nao ukasughuda imbiri katini, ukaghwa andoenyi, ukalomba ngera idimika ija saa ya matiriro imwide.

³⁶Ukaghamba, “Abba, ee Aba, vilambo vose vadimika kwako. Kuniinjire kikombe ichi, ela si seji nikundagha ini, ela ni seji kukundagha oho kumoni.”

³⁷Nao ukacha ukawikua walala, ukamzera Petro, “Welee Simoni, kwaalala? Ndekudimagha kucheresha hata saa imweri?

³⁸Chereshenyi, mlombe msengie matimonyi. Roho yakunde loli, ela mumbi ghwakaia mnyonge.”

³⁹Ukaghenda noko sena ukalomba ukighora madedo ghaja gheni.

⁴⁰Ukawuya sena, ukawikua walala, angu meso ghawo gherekoghe ghalemerwa ni dilo; hata ndeweremanyireghe ja kumtumbulia anduangi.

⁴¹Uendawichea indo ja kadadu, ukawizera, “Welee, mduagha mkilala na kukuhoresha? Yakata! Ija saa yameria kuvika! Olenyi Mwana wa Mdamu wafunywa mikonunyi kwa wandu wa kaung'a.

⁴²Wukenyi dighende, hoyu uo unifunyagha oko kaavui.”

⁴³Nao ahoeni, Jesu ukighora, Juda umu wa waja ikumi na wawi, ukabusa; ukwanye na izungu ibaa jiwadie chufu na rungu, jafuma kwa wakohani wabaa na walimu wa Sharia, na waghosi.

⁴⁴Na uo mfunyi Juda orewinekieghe alama ukighamba, “Uo nichaamsusugha-lee, nuo moni. Mmbwadenyi, mwende nao mkimlindia.”

⁴⁵Juda uendavika woruwu, ukamghendia Jesu shwa wori, ukamzera, “Mwalimu,” Nao ukamsusugha.

⁴⁶Awo wandu wikammbwada Jesu wikamdwa.

⁴⁷Ela umu wa awo werekoghe kimusi aho, ukalukua lufu lwake, ukamdema mzumba wa Mkohani M'baa, ukamdumbua kudu.

⁴⁸Jesu ukawizera, “Welee, mwaacha kuniwada mkidwa chufu na rungu seji neeka kiting'a?

⁴⁹Ituku ituku nerekwanyeghe na inyo Hekalunyi ngifundisha, nenyo ndemoreniwadieghe anduangi, ela Maandiko suti ghikatisho.”

⁵⁰Aho wanughi wose wikamsigha, wikakimbia.

⁵¹Ela mdawana umu ukamnugha ukumbie shuka ya kitani kufinikira wuduu ghwake, nao wikakunda kummbwada.

⁵²Ela ukafufunuka, ukaisigha ija shuka ya kitani, ukakimbia duu.

⁵³Nao wikamghenja Jesu noko kwa Mkohani M'baa, andu wakohani wabaa wose, waghosi, na walimu wa Sharia werekwanyikieghe.

⁵⁴Petro oremnughieghe kwa kula, hata wazenyi kwa Mkohani M'baa, nao orekoghe kidombo na walindiri ukioda modo.

⁵⁵Wakohani wabaa na Mwandu ghose wikalola ilagho jemshitakia Jesu wim'bwaghe, wikajisowa.

⁵⁶Wandu wengi wikareda wushuhuda ghwa tee aighu ya Jesu, ela wushuhuda ghwawo ndeghorepataneghe anduangi.

⁵⁷Ela wamu wikawuka, wikamzighiria kwa tee wikighamba,

⁵⁸“Isi deremsikireghe ukighamba, ‘Nichainona Hekalu ihi iaghilo kwa mikonu, na kwa matuku adadu nichaagha zima isebonywagha kwa mikonu anduangi.’”

⁵⁹Hata huwo saki, madedo ghawo ndegherepataneghe anduangi.

⁶⁰Nao Mkohani M'baa ukawuka kimusi aghadi yawo, ukamkotia Jesu, “Welee, ndekutumbuliagha ilagho jingi ado? Ni malaghoki agha wandu wikushuhudiagha nagho?”

⁶¹Ela uo ukanyama kima, hata nderetumbulieghe ilagho jingi anduangi. Mkohani M'baa ukamkotia kawi, “Welee, oho nuo Kristo, Mwana wake uja Mrasimilwa, anguwada?”

⁶²Jesu ukatumbulia, “Ini nuo moni; nenyo mchammbona Mwana wa Mdamu uko kidombo chia ya mkonu ghwa kiwomi ghwa Uo-Uwadie-Ndighi-Rose, sena mchammbona ukicha na mawingu gha mlungunyi.”

⁶³Aho, Mkohani M'baa ukarashua nguwo rake, ukaghamba, “Dilola washahidi wazima wa indoki?

⁶⁴Mwameria kusikira masholio ghake inyo mmbeni. Mwawona wada?” Na wose wikamtanya kukaia mundu ufwane kubwaghwa.

⁶⁵Wandu wamu wikawoka kumchuya mada, na kumfinikira wushu ghwake na kumkaba wikimzera, “Loda! Nani wakukaba?” Nao walindiri wikammbusa wikimkaba na chui.

⁶⁶Nao iji Petro orekoghe aisi wazenyi, mwai umu ubonyagha kazi kwa Mkohani M'baa ukacha.

⁶⁷Hata iji wammbona Petro ukioda modo, ukamzighana, ukaghamba, “Na oho wori morekwanyeghe na uja Mnazareti Jesu.”

⁶⁸Ela Petro ukakana ukighamba, “Sighiichi ini, hata sighitambuagha agho kughoragha anduangi!” Aho, Petro ukafuma shighadi mnyangonyi na njogholo ikadeda.

⁶⁹Uja mwai ukammbona sena, ukazoya kuwighoria kawi awo werekoghe kimusi kaavui, “Uhu ni mundu wa mzawo.”

⁷⁰Petro ukakana sena. Nyuma kutini, awo werekoghe kimusi kaavui wikamzera Petro, “Ni loli, oho ko mundu wa mzawo angu kuko Mgalilaya.”

⁷¹Ela Petro ukazoya kukughemesha na kughema ukighora, “Simwichi mundu uhu mumghoragha anduangi.”

⁷²Nao ahoeni njogholo ikadeda indo ja kawi. Petro ukakumbuka jija ilagho, seji Jesu oreghorieghe; “Imbiri njogholo isededie kawi, kuchanikana mando adadu.” Ukawawa ni ngolo, ukalila na ndighi.