Read TAITA BIBLE – Biblia Ilagho Jiboie Kwa Wandu Wose MARKO 15 Bible Online

MARKO 15 - TAITA BIBLE – Biblia Ilagho Jiboie Kwa Wandu Wose bible

MARKO 15

¹Hata nakesho kio, wakohani wabaa, waghosi, walimu wa Sharia na wandu wa mwandu wose, wikabonya njama chia imweri, wikamfunya Jesu na kumghenja kwa Pilato.

²Pilato ukamkotia Jesu, “Welee, oho koko Mzuri wa Wayahudi?” Jesu ukatumbulia, “Ni oho kwaghamba.”

³Wakohani wabaa wikamshitakia Jesu kwa maza nyingi.

⁴Pilato ukamkotia indo ja kawi, “Welee, ndekughoragha ilagho jingi? Zighana iro maza nyingi wikushitakiagha naro.”

⁵Ela Jesu ndereghorieghe ilagho jingi sena anduangi, hata Pilato ukashinika.

⁶Ngelo ya Ndima ya Pasaka, Pilato orekoghe na mzango ghowifunguya mfungwa umweri uo ose wichaalomba.

⁷Aho, korekoghe na mfungwa umu uwangwagha Baraba, ufungilo andwamweri na awo werebonyereghe vilunganya, wikabwagha wandu.

⁸Nao izungu ja wandu wikakwanyika, wikazoya kumkotia Pilato uwibonyere sa iji mzango ghwake ghorekoghe.

⁹Pilato ukawikotia, “Mwakunde nimfunguye Mzuri wa Wayahudi?”

¹⁰Angu oremanyireghe kukaia wakohani wabaa wedemfunya tu kwa wundu ghwa iriso jawo.

¹¹Nao wakohani wabaa wikajishingira izungu wilombe wifunguilo Baraba, wulalo ghwa Jesu.

¹²Pilato ukawikotia sena, “Welee, nim'bonye wada uo mumbangagha Mzuri wa Wayahudi?”

¹³Nawo wikatumbulia kwa lwaka lubaa, “Msulubishe!”

¹⁴Pilato ukawikotia, “Kwaki? Wabonya wuwiwi ghuao?” Ela awo wikachuria kughora kwa chwaka mbaa, “Msulubishe!”

¹⁵Niko Pilato, ukikunda kuwiboia wandu, ukawifunguya Baraba. Ela umeria kumkaba Jesu ukamfunya kwawo usulubisho.

¹⁶Nao masikari wikamghenja Jesu wazenyi andenyi ya ngome iwangwagha praetoriumu, wikawikwanya masikari ghose aho.

¹⁷Wikamrusha Jesu nguwo ya zambarau, wikaluka na kirumbu cha minjwa, wikammbikiria chongonyi kwake.

¹⁸Nao wikazoya kumlamusa, “Kwawuka Mzuri wa Wayahudi!”

¹⁹Wikamkaba na mrangi chongonyi kwake, wikamchuya mada, wikamdungia ngokoro na kumghoghomia.

²⁰Hata iji wameria kumseka, wikamrua ija nguwo ya zambarau, wikamrusha nguwo rake reni. Nao wikamfunya shighadi wipate kumsulubisha.

²¹Chienyi, wikakwana na mundu umu wafuma mbuwenyi, uwangwagha Simoni mundu wa Kurene, ndee wa Alekizanda na Rufo. Wikamlazimisha umdukie Jesu msalaba ghwake.

²²Wikamghenja Jesu andu kuwangwgha Golgotha, (kutambua kwaro ni andu kwa Ngoma ya Chongo.)

²³Aho, wikamneka divei iranganyiro na manemane, ela Jesu ukailegha.

²⁴Niko wikamsulubisha, wikawaghiana nguwo rake kwa kurikabia kura, kula mundu uwusaki.

²⁵Erekoghe saa idadu nakesho iji weremsulubishagha.

²⁶Na maandiko gha mashitakio ghake ghereandikiloghe: “MZURI WA WAYAHUDI.”

²⁷Vitoi viwi veresulubishiroghe andwamweri nao, chimu chia ya mkonu ghwake ghwa kiwomi, na chimu chia ya mkonu ghwake ghwa kiwaka. [

²⁸Jikakatia jija iandiko jighambagha, “Oretaliloghe chiaimweri na wawiwi.”]

²⁹Wandu werekoghe wikiida aho, wikamsholia wikisughusa vongo vawo na kughamba, “Haya, oho kuinonagha Hekalu na kuiagha kwa matuku adadu,

³⁰kukukire kumoni, kusee msalabenyi.”

³¹Huwo koni wakohani wabaa na walimu wa Sharia wikamseka wikighalusirana madedo weni na weni wikighamba, “Orewikirieghe wazima, ela ndedimagha kukukira uo moni anduangi.

³²Kristo Mzuri wa Israeli, ndesee msalabenyi idana, nesi diwone dirumirie.” Na awo weresulubishiroghe andwamweri nao, wikamsholia wokoni.

³³Na iji yavika saa irandadu, kukangia kira isanga jose hata saa ikenda.

³⁴Nao saa ikenda, Jesu ukakema na lwaka lubaa, “Eloi, Eloi, lama sabakithani!” kutambua kwaro, “Mlungu wapo, Mlungu wapo, kwaki kwanisigha?”

³⁵Wandu wamu awa werekoghe kimusi ahoeni wikimsikira wikaghamba, “Olenyi, waawuyammbanga Elija!”

³⁶Nao mundu umu ukaghenda na iseghe, ukaingira sponji siki, ukaifunga mdonyi ghwa mrangi, ukamjosera upate kunywa ukighamba, “Lekenyi dilangarie ngera Elija ucha kumsera msalabenyi.”

³⁷Aho Jesu ukakema na lwaka lubaa, ukameria moyo.

³⁸Pazia ya Hekalu ikarashuka vibelele viwi kufuma aighu hata andonyi.

³⁹Na uja m'baa wa masikari ukikaia kimusi ahoeni, iji wawona sa iji orekoghe ukimeria moyo, ukaghamba, “Ni loli mundu uhu orekoghe Mwana wa Mlungu!”

⁴⁰Waka wamu werekoghe kakula wikizighana, na aghadi yawo werekoghe Maria Magdaleni, na Maria mae wawo Jakobo mtini, na Jose, na Salome.

⁴¹Awa weremnughieghe Jesu iji orekoghe Galilaya, wikimdumikia. Korekoghe na waka wazima wengi wori awo werejokanyeghe nao cha Jerusalemu.

⁴²Erekoghe luma lwa kenyi, Ituku ja Kukutumbanya jikiriagha Sabato.

⁴³Josefu wa muzi ghwa Arimatea, mundu wa Mwandu unekelo ishima, ukacha. Uo moni orekoghe ukighuwesera Wuzuri ghwa Mlungu, nao ukamghendia Pilato kwa wuwana, ukamlomba mumbi ghwa Jesu.

⁴⁴Pilato ukashinika wei Jesu wameria kufwa, ukammbanga uja m'baa wa masikari, ukamkotia ngera wameria kufwa.

⁴⁵Hata umeria kumanya kwa m'baa wa masikari kukaia Jesu wameria kufwa, ukamneka Josefu rusa uwuse mumbi ghwake.

⁴⁶Aho Josefu ukaghua nguwo ya kitani, ukamsera, ukamrighiria na kumngira kaburinyi erekoteroghe ighonyi, nao ukabingilisha igho mnyangonyi ghwaro.

⁴⁷Maria Magdaleni na Maria mae Jose, wikawona andu orewikiloghe.