Read TAITA BIBLE – Biblia Ilagho Jiboie Kwa Wandu Wose MARKO 16 Bible Online

MARKO 16 - TAITA BIBLE – Biblia Ilagho Jiboie Kwa Wandu Wose bible

MARKO 16

¹Nao iji Sabato yameria kusia, Maria Magdaleni, Maria mae Jakobo, na Salome, wikaghua marumba wighende kumshinga.

²Hata nakesho kio, Ituku ja Njumwa, wikafuma na kughenda; wikabusa kaburinyi iruwa jikibuka.

³Nawo iji werekoghe wikighenda, wikakotiana weni na weni, wikighamba, “Keni, nani uchaadibingilishira igho jiko mnyangonyi ghwa kaburi?”

⁴Nao wiendazighana, wikajiwona jija igho jameria kubingilishwa. (Najo jerekoghe ibaa na ndighi.)

⁵Wikangia kaburinyi, wikawona mdawana umu uko kidombo chia ya mkonu ghwa kiwomi, urwae nguwo ya chokwa; wikashinika na ndighi.

⁶Ela uo mdawana ukawizera, “Msakeshinika. Namanya mwaawuyamlola Jesu wa Nazareti uo oresulubishiroghe. Waruka, ndeuko aha anduangi. Zighanenyi andu weremmbikieghe.

⁷Ela ghendenyi muwighorie wanughi wake na Petro angu wamkiria noko cha Galilaya. Ahoeni mchammbona sa iji koni oremghorieghe.”

⁸Nao wikafuma, wikakimbia kufuma kaburinyi, angu werengiriloghe ni wowa na kushinika. Hata ndeweremghorieghe mndungi ilagho jingi anduangi, angu wereobueghe. [

⁹Jesu umeria kuruka kokio Ituku ja Njumwa, oremfutukieghe imbiri Maria Magdaleni, uo oremmbingieghe pepo mfungade.

¹⁰Nao moni ukaghenda na kuwighoria awo werekwanyeghe nao, angu werekoghe wikisirimika ngolonyi na kulila.

¹¹Ela awo, iji wasikira angu oko moyo, na wei wamfutukia Maria Magdaleni, wikalegha kurumiria.

¹²Konyuma sena, Jesu ukawifutukia wawi wawo uko na fwana zima, iji werekoghe wikighenda cha mzinyi.

¹³Nawo weni wikaghenda na kuwighoria awo weresigharikieghe, ela na awo ndewerewirumirieghe anduangi.

¹⁴Kutua, Jesu ukawifutukia waja ikumi na umweri wiko kidombo vindonyi, ukawirasha kwa kulegha kurumiria kwawo na kwa kukua kwa ngolo rawo, angu wiserewirumirieghe waja weremmbonieghe nyuma ya kuruka kwake anduangi.

¹⁵Nao ukawizera, “Ghendenyi wurumwengunyi kose, chilenyi Ilagho Jiboie kwa wadamu wose.

¹⁶Uo urumiriagha na kubaputizwa, achaakia; ela uo userumiriagha anduangi uchatanywa utote.

¹⁷Na alama iri richawinugha awa wirumiriagha: kwa irina japo wichawinga pepo, na wichaghora na chumi mbishi.

¹⁸Wichawada choka, na hata ngera wanywa kindo chingi chebwagha, ndewichaawona ilagho jingi anduangi. Wichawiwikiria wakongo mikonu, nawo wichaboa.”

¹⁹Nao Bwana Jesu, nyuma ya kughora nawo ukadwalwa noko aighu mlungunyi, ukasea kidombo chia ya mkonu ghwa kiwomi ghwa Mlungu.

²⁰Wanughi wikafuma, wikachila andu kose, Bwana moni ukibonya kazi andwamweri nawo; ukijimangisha jija ilagho kwa weke mwakilimbiti werebonyeroghe. Amen.]