Read TAITA BIBLE – Biblia Ilagho Jiboie Kwa Wandu Wose MARKO 3 Bible Online

MARKO 3 - TAITA BIBLE – Biblia Ilagho Jiboie Kwa Wandu Wose bible

MARKO 3

¹Nao Jesu ukangia sena andenyi ya sunagogi, na ajaeni korekoghe na mundu uko na mkonu ghwake ghukelemere.

²Na wandu wamu wikamzighanira ngera um'boisa ituku ja Sabato, eri wipate kumshitakia.

³Jesu ukamzera uja mundu uko na mkonu ghwake ghukelemere, “Choo aha imbiri.”

⁴Niko ukawizera, “Keni ni hachi kubonya nicha ituku ja Sabato angu kubonya laghe-laghe? Kukira irangi angu kubwagha?” Nao wikanyama kima.

⁵Ukawizighana wose kwa machu, ukawawa ni ngolo kwa wundu ghwa awo kukaia na ngolo rikurie; ukamzera uo mundu, “Ghorua mkonu ghwako.” Nao ukaghughorua, na mkonu ghwake ghukaboa.

⁶Nao ahoeni Mafarisayo wikafuma wikabonya njama na Wanjama wa Herode, seji widimagha kum'bwagha Jesu.

⁷Jesu ukafuma na wanughi wake, ukaghenda cha ndiwenyi ya Galilaya, na izungu ibaa kufuma Galilaya jikawinugha. Wandu awo werekoghe wafuma Judea, Jerusalemu,

⁸Idumea na kimonu cha Jordani, na chia ra Tiro na Sidoni; izungu ibaa na ndighi. Wandu awo werechieghe kwa Jesu kwa kukaia weresikireghe maza rose orekoghe ukiribonya.

⁹Jesu ukawizera wanughi wake wimredie ishua, ukaie kakula kwa wundu ghwa wandu kukaia wengi, wisechemtindiria;

¹⁰angu orewiboisireghe wengi, hata wose werekoghe na makongo wikamtindiria wipate kumuadada.

¹¹Na wandu werekoghe na pepo ra makakala iji wammbona, wikaghwa imbiri kwake wikikema na kughamba, “Oho ko Mwana wa Mlungu!”

¹²Nao ukarilaghira nandighi risakemmanyisha.

¹³Jesu ukajoka mghondinyi, ukawiwanga kwake awa orewikundieghe, nawo wikamghendia.

¹⁴Ukawisaghua ikumi na wawi wikaieghe andwamweri nao, nawo wori ukawiwanga “Wadumi”, uwidume noko kuchila,

¹⁵sena wikaie na nguma rewinga wandu pepo.

¹⁶Awo ikumi na wawi niwo awa: Simoni uo oremmbangieghe Petro,

¹⁷Jakobo na Johane mruna, Wana wa Zebedayo (ukawiwanga Boanerge, kutambua kwaro ni “Wana wa Lukuwa”).

¹⁸Andrea na Filipo, Bartholomayo, Mathayo, Tomasi, Jakobo mwana wa Alfayo, Thadayo, Simoni Mkanaani

¹⁹na Juda Iskarioti, uo oremfunyireghe Jesu.

²⁰Nao Jesu ukaghenda cha mzinyi; na izungu jikamkwanyikia, hata uo moni na wanughi wake ndeweredimieghe hata kuja koni.

²¹Iji wakwawo Jesu wasikira malagho agho, wikafuma kwenda kummbwadia wikighamba, “Wawukwa ni isu.”

²²Na walimu wa Sharia wereserieghe kufuma Jerusalemu, wikaghamba, “Oko na Beelizebuli, na kwa m'baa wa pepo niko wariwinga pepo.”

²³Niko Jesu ukawiwanga, ukawizera kwa mifwano, “Welee, udima wada Shetani kukuwinga uo moni?

²⁴Na wuzuri ghukareda mawaghanyiko, ndeghudimagha kumanga anduangi.

²⁵Na muzi ghwa mundu ghukawaghanyika, ndeghudimagha kumanga.

²⁶Na ngera Shetani wawaghanyika uo moni, wuzuri ghwake ndeghudimagha kumanga anduangi, ela ghuchakaia na kutua.

²⁷“Mndungi ndedimagha kungia nyumba ya mundu uwadie ndighi, na kuwusa mali rake, ngera usemfungie kande uo mundu, niko aho uchaamsoka mali rake.

²⁸“Namghoria loli, wadamu wichalekwa kaung'a rawo rose, na masholio ghawo ghose;

²⁹ela uo uchaamsholia Roho Mweli, na jingi ndechaalekelwa anduangi; angu wabonya kaung'a iduagha kwa kala na kala.”

³⁰(Jesu oreghorieghe huwo angu weremzerieghe wei, “Wawadie pepo ya makakala.”)

³¹Nao mae Jesu na waruna, wikamchea; nawo wikakaia kimusi shighadi, wikamdumia mundu ummbange.

³²Na izungu jiko kidombo jammaria chia rose, wikamzera, “Mayo na wanyinyu weko shighadi, wawuyakulola.”

³³Jesu ukawitumbulia, “Mao na wanidu ni weke ani?”

³⁴Aho ukawizighana awo weremmarieghe chia rose, ukaghamba, “Zighanenyi! Awa niwo mao na wanidu.

³⁵Angu uo ose ulubonyagha lukundo lwa Mlungu, nuo moni mwanidu wa womi, na mwanidu wa waka na mao.”