Read TAITA BIBLE – Biblia Ilagho Jiboie Kwa Wandu Wose MARKO 8 Bible Online

MARKO 8 - TAITA BIBLE – Biblia Ilagho Jiboie Kwa Wandu Wose bible

MARKO 8

¹Matuku ghaja, iji izungu ja wandu jerekoghe ibaa sena, nawo wikasowa kindo chingi cheja, Jesu ukawiwanga wanughi wake, ukaghamba,

²“Nawadwa ni wughoma ghwa wandu disindanye matuku adadu, nawo ndewiwadie kindo chingi cheja anduangi.

³Nani ngawizera wighale mzawo na njala, wichadumbukia chienyi, angu wamu wawo wafuma kula koni.”

⁴Wanughi wake wikamtumbulia, “Welee, idimika wada mundu kuwighudisha wandu awa na mikate aha kireti?”

⁵Jesu ukawikotia, “Moko na mikate ilinga?” Wikamzera, “Mfungade.”

⁶Nao ukafunya momu wandu wisee kidombo andonyi. Ukaiwusa ija mikate mfungade, hata umeria kufunya chawucha, ukaichukanya, ukawineka wanughi wake wiiwaghie wandu, nawo wikawiwaghia.

⁷Nawo werekoghe na samaki ndinieri, naro umeria kurirasimia, ukafunya momu na iro wori rineko wandu.

⁸Wandu wikaja, wikaghuda. Wikatumbanya masighariko, wikachura vikapu mfungade.

⁹Nawo werekoghe sa elfu inya. Nao ukawizera wighale.

¹⁰Ahoeni, ukangia ishuonyi andwamweri na wanughi wake, wikaghenda isanga ja Dalmanutha.

¹¹Nao Mafarisayo wikacha kwa Jesu, wikazoya kubonya nganyi nao; wikalola alama kwake kufuma mlungunyi, wikimtima.

¹²Ukasoria ngolo na ndighi, ukaghamba, “Welee, kwaki kivalwa ichi chilolagha alama? Namghoria loli, kivalwa ichi ndechichanekwa alama ingi anduangi.”

¹³Nao ukawisigha, ukangia ishuonyi sena, ukazoya kuruwuka cha kimonu.

¹⁴Idana wanughi wereliwieghe kudwa mikate, na aja ishuonyi, wedesighwa na mkate ghumweri tu.

¹⁵Jesu ukawilaghira ukighamba, “Zighanenyi mkulindie na chachu ya Mafarisayo na ya Herode.”

¹⁶Nao wikatumbuliana weni na weni wikighamba, “Ni iji disewadie mikate.”

¹⁷Jesu ukimanya agho ukawizera, “Welee, kwaki mwaririkanya gha kusowa mikate? Hata na iji ndemmbonagha, hata ndemtambukilwagha? Ngolo renyu raduagha rikurie?

¹⁸Meso mwawadie ela ndemmbonagha, na madu mwawadie ela ndemsikiragha, hata ndemkumbukagha?

¹⁹Iji nereichikanyireghe ija mikate misanu kwa wandu elfu isanu, moretumbanyireghe vikapu vilinga vichue masighariko gha ija mikate erechikanyiroghe?” Wikatumbulia, “Ikumi na viwi.”

²⁰“Na ija mikate mfungade kwa wandu elfu inya, moretumbanyireghe vikapu vilinga vichue masighariko gha ija mikate erechikanyiroghe?” Wikatumbulia, “Mfungade.”

²¹Nao ukawizera, “Hata na iji ndemtambukilwagha?”

²²Nao Jesu na wanughi wake wikacha Bethsaida. Wandu wamu wikamredia mundu ufue meso, wikamlomba umuadade.

²³Jesu ukammbwadia mkonu uja mundu ufue meso, ukamreda shighadi ya muzi. Ukamchuya mada mesonyi kwake, ukammbikiria mikonu, ukamkotia, “Welee, kwawuyawona kindo chingi?”

²⁴Nao ukazighana noko, ukaghamba, “Nawona wandu, ela waawuyawoneka sa midi ighendagha.”

²⁵Aho ukammbikiria mikonu indo ja kawi mesonyi kwake, ukazighana na ndighi, ukaboa; nao ukawona vilambo vose nicha.

²⁶Jesu ukamlaghira ughale ukighamba, “Kusakewuya mzinyi.”

²⁷Jesu ukafuma na wanughi wake, wikangia mizi ya Kaisaria Filipi. Chienyi, ukawikotia wanughi wake, “Welee, wandu waghambagha ini nani?”

²⁸Wikamtumbulia, “Wamu wadaghamba oho ko Johane M'baputizi, wazima Elija, na wazima umu wa walodi.”

²⁹Nao ukawikotia, “Ela inyo mwaghambagha ini nani?” Petro ukatumbulia, “Oho ko Kristo.”

³⁰Nao ukawilaghira nandighi wisakemghoria mndungi malagho ghake.

³¹Jesu ukazoya kuwifundisha wanughi wake: “Mwana wa Mdamu suti utiriro maza nyingi, na kuleghwa ni waghosi na wakohani wabaa, na walimu wa Sharia, sena ubwagho, na nyuma ya matuku adadu ucharuka.”

³²Ukawighoria ilagho iji worinyi, Petro ukamruda kambai, ukazoya kumkemia.

³³Jesu ukaghaluka, ukawizighana wanughi wake ukamkemia Petro ukighamba, “Injika noko, Shetani! Angu oho ndekuririkanyagha maza ra Mlungu anduangi, ela ra wandu.”

³⁴Nao ukajiwanga jija izungu andwamweri na wanughi wake wimchee, ukawizera, “Ngera mundu wakunda kuninugha, ukukane uo moni, ughuduke msalaba ghwake, uninughe.

³⁵Angu uo ose uchaakunda kujikira irangi jake, uchajilaghasha; ela uo ose uchaajilaghasha irangi jake kwa wundu ghwapo, na kwa wundu ghwa ijo Ilagho Jiboie, nuo moni uchaajikira.

³⁶Angu ichamfwana mundu kii ukaghupata wurumwengu ghose, sena ulaghashe irangi jake?

³⁷Angu mundu uchafunya kindoki kuindana na irangi jake?

³⁸Angu uo uchaaniwonia waya ini na malagho ghapo, kwa kivalwa ichi cha kulaka na kaung'a, Mwana wa Mdamu wori uchammbonia waya, kasikira wacha na wubaa ghwa ndee, andwamweri na weke malaika wielie.”