Read TAITA BIBLE – Biblia Ilagho Jiboie Kwa Wandu Wose MARKO 9 Bible Online

MARKO 9 - TAITA BIBLE – Biblia Ilagho Jiboie Kwa Wandu Wose bible

MARKO 9

¹Ukachuria kuwizera, “Namghoria loli, koko wandu wiko kimusi aha, na jingi wisechaatoa kifwa anduangi, hata wameria kughuwona wuzuri ghwa Mlungu ghukicha kwa ndighi.”

²Nyuma ya matuku arandadu, Jesu ukawidwa Petro, Jakobo na Johane, ukaghenda nawo wiekeri aighu ya mghondi m'baa. Ukaghaluka fwana yake imbiri kwawo,

³na nguwo rake rikawuya ra kung'ala-ng'ala, ra chokwa cho, hata useko dobi ungi aha ndoenyi udimagha kurielesha sa huwo anduangi.

⁴Aho wikafutukilwa ni Elija na Musa, na wanughi wake wikawiwona wikidedanya na Jesu.

⁵Petro ukamzera Jesu, “Mwalimu, ni nicha saki angu diko aha; ndediaghe viwanda vidadu, chimu chikaie chako kumoni, na chimu cha Musa, na chimu cha Elija.”

⁶Angu nderepatireghe ilagho ja kughora anduangi, kwa kukaia werengiriloghe ni wowa m'baa.

⁷Aho jikacha iwingu, jikawingiria kiju, na lwaka lukasikirika kufuma iwingunyi, “Uhu ni Mwana wapo mkundwa, msikirenyi.”

⁸Na ahoeni wikizighana, ndeweremmbonieghe mndungi sena anduangi, ela Jesu uekeri ukwanye andwamweri nawo.

⁹Iji werekoghe wikisea mghondinyi, ukawilaghira wisakemghoria mndungi agho malagho wereghiwonieghe, hata Mwana wa Mdamu wameria kuruka kufuma kwa wafu.

¹⁰Wikajiwika ilagho jija ngolonyi kwawo, wikikotiana weni na weni kuja kutambua kwaro uko kuruka kufuma kwa wafu.

¹¹Niko wikamkotia Jesu, “Keni kwaki walimu wa Sharia wighambagha wei ni suti Elija uche kandena?”

¹²Nao ukawitumbulia, “Ni loli Elija ucha kandena kuwika maza rose nicha; na kwaki sena Maandiko ghaghamba wei Mwana wa Mdamu uchatirirwa maza nyingi na kumenywa?

¹³Ela namghoria, angu Elija wamerie kucha, nawo wikammbonyera ghose sa iji werekundieghe, sa iji koni ereandikiloghe aighu yake.”

¹⁴Hata iji wavika kwa waja wanughi wamu, wikawona izungu ibaa ja wandu wawikwanyikia, na walimu wa Sharia wikibonya nganyi nawo.

¹⁵Ahoeni, iji jija izungu ja wandu wammbona, wikashinika na ndighi, wikamkimbiria na kumroghua.

¹⁶Jesu ukawikotia, “Welee, mwawuyakotiana ilaghoki?”

¹⁷Na mndumu uko izungunyi ukamzera, “Mwalimu, nerekuredieghe mwana wapo uko na pepo immbunjire kituri,

¹⁸nayo iji yammbwada, yadamghusha, nao wadafunya ifuo na kuja maghegho ghake, nao uaghulia kii. Ngawilomba wanughi wako wiiwinge, ikawilema.”

¹⁹Jesu ukawizera, “Inyo kivalwa chisewadie irumirio, nichakaianya nenyo hata lii? Nichamrumaghia hata lii? Mredenyi kwapo.”

²⁰Nao wikamreda kwake. Hata iji pepo yammbona Jesu, ikamkuna uja mwana na ndighi, ukaghwa andonyi, ukang'ara ukifunya ifuo.

²¹Jesu ukamkotia ndee, “Ni kufuma lii orewadiloghe huwu?” Nao ukatumbulia, “Ni kufuma wanake ghwake.

²²Na kalazi koni yadamkumba modonyi na machinyi kukunda kumtotesha, ela oho ngera kwadima ilagho jingi, kudifue wughoma kuditesie.”

²³Jesu ukamzera, “Ngera kwadima! Nechi maza rose radimika kwa uhu urumiriagha.”

²⁴Ahoeni ndee mwana ukakema ukighamba, “Narumiria, ela irumirio japo ni itini, nitesie.”

²⁵Hata iji Jesu wawona izungu jikimtindiria, ukaikemia ija pepo izamie, “Ee pepo kituri kusesikiragha, ini nakuzera, mfume mwana uhu, hata na jingi kusakemmburia.”

²⁶Ija pepo ikakema na kumkuna na ndighi, ikamfuma, hata mwana ukawoneka sa mundu ufue, na wandu wengi wikaghora, “Wafwa!”

²⁷Ela Jesu ukammbwada mkonu, ukammbusira, nao ukawuka kimusi.

²⁸Hata iji Jesu wangia nyumbenyi wanughi wake wikamkotia njamenyi, “Welee, kwaki isi diseredimieghe kuiwinga ija pepo?”

²⁹Nao ukawizera, “Mbari ihi ndeifumagha kwa chia ingi zima, ela kwa kulomba Mlungu.”

³⁰Kufuma aho, Jesu na wanughi wake wikaghenda wikiidiria Galilaya. Nao moni nderekundieghe mndungi umanye andu uko anduangi;

³¹angu orekoghe ukiwifundisha wanughi wake ukiwizera, “Mwana wa mdamu uchafunywa mikonunyi kwa wandu, nawo wicham'bwagha. Ela nyuma ya matuku adadu, ucharuka sena.”

³²Wanughi wake ndeweretambukiloghe ni agho malagho anduangi, sena wikaobua kumkotia.

³³Nao wikavika Kafarnaumu, hata iji werekoghe nyumbenyi, Jesu ukawikotia, “Welee, ni nganyi ra indoki msindebonya chienyi?”

³⁴Nao wikanyama kima; angu chienyi werekoghe wikibonyerana nganyi weni na weni wei nani uko m'baa aghadi kwawo.

³⁵Jesu ukasea kidombo, ukawiwanga waja wanughi wake ikumi na wawi, ukawizera, “Ngera mndungi wakunda kukaia imbiri, suti ukaie nyuma ya wose na mdumiki wa wose.”

³⁶Nao ukawada mwanake mtini, ukammbika aghadi kwawo, hata umeria kumtighisha, ukawizera,

³⁷“Uo ose uchammbusa mwana ungi sa uhu kwa irina japo, waniwusa ini, na uo ose uniwusagha ini-lee, ndeniwusagha ini anduangi, ela wammbusa uo orenidumieghe.”

³⁸Johane ukamzera, “Mwalimu, dammbonie mndumu ukiwinga pepo kwa irina jako, nesi dikamghiria angu userekoghe mngara odu anduangi.”

³⁹Ela Jesu ukaghamba, “Msakemghiria, angu ndekuwadie mndungi udimagha kubonya mwakilimbiti ungi kwa irina japo, sena ahoeni udime kughora kiwiwi aighu yapo anduangi.

⁴⁰Angu uo ose uselwagha nesi, oko cha kodu.

⁴¹Angu uo ose uchaamneka inyo kikombe cha machi kwa kukaia mwakaia wa Kristo, namghoria loli, ndechaasowa ifungu jake aduangi.

⁴²“Na uo ose uchamkuwisha umu wa awa watini winirumiriagha ini, ni nicha kwake igho ibaa jesha jifungo singonyi kwake, ukumbo baharinyi.

⁴³Na ngera mkonu ghwako ghwakukuwisha, ghudumbuo! Ni nicha oho kungie iranginyi kuseko na mkonu ghumu, kuchumba kukaia na mikonu iwi, nao kughende modonyi ghwa jehanamu. [

⁴⁴Andu vivunyu varo visefwagha, na modo ghwaro ghuserimikagha anduangi.]

⁴⁵Na ngera kughu kwako kwakukuwisha, kudumbuo! Ni nicha oho kungie iranginyi kuko mtighini, kuchumba kukaia na maghu awi, nao kukumbo jehanamunyi. [

⁴⁶Andu vivunyu varo visefwagha, na modo ghwaro ghuserimikagha anduangi.]

⁴⁷Na ngera iriso jako jakukuwisha, jikuo! Ni nicha oho kungie kwa Wuzuri ghwa Mlungu kifondo, kuchumba kukaia na meso awi na kukumbwa jehanamunyi.

⁴⁸Andu vivunyu varo visefwagha, na modo ghwaro ghuserimikagha anduangi.

⁴⁹Angu kula mundu uchalungwa ni modo.

⁵⁰Kiserere ni kindo kicha, ela chikafumwa ni kusinga kwaro, muchachilunga naki? Kaienyi na kiserere andenyi konyu, nenyo mkaie na sere mmbeni na mmbeni.”