Read TAITA BIBLE – Biblia Ilagho Jiboie Kwa Wandu Wose LUKA 1 Bible Online

LUKA 1 - TAITA BIBLE – Biblia Ilagho Jiboie Kwa Wandu Wose bible

LUKA 1

¹Kwa kukaia wengi wamerie kukufunya wiandike malagho gha maza ribonyekie aghadi kodu,

²nawo wereandikieghe seji dighorelo ni wandu wijiwonie jija ilagho kwa meso ghawo kufuma imbiri, na kujidumikia;

³na ini wori ee Theofilo mucha, nawonie ni nicha nikuandikie kwa wuya, nyuma ya kughizighana nicha ghose kufuma imbiri;

⁴kupate kumanya loli yaro agho korefundishiroghe.

⁵Matuku gha Herode mzuri wa Judea, korekoghe na mkohani umu uwangwagha Zakaria, wa ifungu ja wukohani ghwa Abia, nao orekoghe na mkake, nao ni mwai wa kichuku cha wukohani ghwa Haruni, uwangwagha Elizabeti.

⁶Nawo wose werekoghe wandu wa hachi, wikighenda kwa kuiwadia Sharia na malaghiro gha Mlungu kuseko na ikosa jingi.

⁷Ela ndewerewadieghe mwana ungi, angu Elizabeti orekoghe kolowi; na sena wose werekoghe waghosia na ndighi.

⁸Ituku ja izughe jake, Zakaria orekoghe ukibonya wudumiki ghwake ghwa wukohani Hekalunyi imbiri ya Mlungu,

⁹karakara na mzango ghwa wukohani. Oresaghuloghe kwa kura ufukire marumba madhabahunyi andenyi ya Hekalu, karakara na mzango ghwa wukohani.

¹⁰Ngelo iyo efukira marumba, izungu jose ja wandu jerekoghe cha shighadi jikilomba Mlungu.

¹¹Nao ahoeni ukafutukilwa ni malaika wa Bwana, ukakaia kimusi chia ya mkonu ghwa kiwomi ghwa madhabahu efukiria marumba.

¹²Hata iji Zakaria wammbona, ukangilwa ni kiture na kuobua.

¹³Ela uja malaika ukamzera, “Kusakeobua Zakaria, kwa kukaia malombi ghako ghasikirikie, na mkako Elizabeti uchakuvaia mwana wa womi, na oho kuchammbanga Johane.

¹⁴Na oho kuchakaia na iseko na kuboilwa, na wengi wichaboilwa kwa kuvalwa kwake;

¹⁵angu uchakaia m'baa imbiri ya Bwana, ndechaanywa divei hata kilambo chingi chewongera anduangi. Uchachulwa ni Roho Mweli kufuma kifunyi kwa mae,

¹⁶nao uchawighalusa wengi wa wana wa Israeli, wimghalukie Bwana Mlungu wawo.

¹⁷Uchaghenda imbiri kwake kwa roho nandighi ra Elija upate kurighalusa ngolo ra weke ndee, riwighalukie wana wawo. Na awo wisesikiragha wiinughe hikima ya wahachi, na kuwika wandu tayari kwa wundu ghwa Bwana.”

¹⁸Nao Zakaria ukamzera malaika, “Welee, nimanya wada ilagho iji? Angu ini ne mghosi, na muka wapo wori wakekua.”

¹⁹Malaika ukamtumbulia, “Ini ne Gabrieli, nikaiagha kimusi imbiri ya Mlungu, nani naadumwa nichekughoria oho malagho mecha.

²⁰Nao ola, kuchakaia kituri kusededagha, hata ituku ijo maza iri richaakatia; angu kuserumirie malagho ghapo anduangi; nagho ghichakatishwa kwa kimu charo.”

²¹Wandu werekoghe wikimmbesera Zakaria wikashinika angu oremukieghe luma Hekalunyi.

²²Hata iji wafuma nderedimieghe kudedanya nawo anduangi, nawo wikatambua angu wawona mawono Hekalunyi, ukakaia ukiwikunyiria, na kukaia kituri.

²³Nao ngelo ya wudumiki ghwake iendasia, ukaghala cha nyumbenyi kwake.

²⁴Nyuma ya matuku ghaja, mkake Elizabeti ukapata kifu, nao ukakaia nyumbenyi kwake koni kwa meri misanu, ukighamba,

²⁵“Bwana wachanibonyera nicha kunizighana kwa ngelo yaro, na kuniinjira aibu nerekoghe nayo wandunyi.”

²⁶Nao mori ghwa karandadu ghwa kifu cha Elizabeti, malaika Gabrieli ukadumwa kufuma kwa Mlungu, kughenda muzi ghumu ghwa Galilaya ghuwangwagha Nazareti,

²⁷kwa mwai uwangwagha Maria, orelowolwagha ni mndumu uwangwagha Josefu, wa kivalwa cha Daudi.

²⁸Malaika ukamchea ukimzera, “Sere ndeikaie kwako oho kunekelo mvono, Bwana oko andwamweri na oho!”

²⁹Ela madedo agho ghikamsumbua ukighiririkanya kutambua kwaro.

³⁰Nao malaika ukamzera, “Kusakeobua Maria, angu kwameria kupata mvono kwa Mlungu.

³¹Ola kuchakaia na kifu, kuve mwana wa womi, nao kuchammbanga irina jake Jesu.

³²Uchakaia m'baa, nao uchawangwa Mwana wa Uo-Uko-Aighu-Nandighi; na Bwana Mlungu uchamneka kifumbi cha nguma cha ndee Daudi.

³³Nao uchaibonyera nguma nyumba ya Jakobo kwa kala na kala; na wuzuri ghwake ndeghuchaakaia na kutua kungi anduangi.”

³⁴Maria ukamzera malaika, “Ijo ilagho jikaia wada nani niseichi mndwawomi ungi?”

³⁵Malaika ukamzera, “Roho Mweli uchakuchea aighu kwako, nandighi ra Uo-Uko-Aighu-Nandighi richakaia aighu kwako; kwa huwu mwana uchaavalwa uchawangwa Mweli Mwana wa Mlungu.

³⁶Kumanye na mwamayo Elizabeti wori, uo orewangiloghe kolowi, idana oko na kifu cha mwana wa womi, na ughu ni mori ghwake ghwa karandadu.

³⁷Angu ndekuwadie ilagho jingi jisedimikagha kwa Mlungu anduangi.”

³⁸Nao Maria ukaghamba, “Ola ini ne mdumiki wa Bwana, ndeikaie kwapo sa madedo ghako.” Nao malaika ukamsigha.

³⁹Nyuma ya matuku ghaja, Maria ukawuka na kughenda shwa-shwa cha muzi ghumu ghwa mighondinyi ya isanga ja Judea.

⁴⁰Nao ukangia nyumbenyi kwa Zakaria, ukamroghua Elizabeti.

⁴¹Elizabeti uendasikira kuroghua kwa Maria, kana kakoo kikachumba kifunyi kwake, nao ukachulwa ni Roho Mweli;

⁴²ukaghamba kwa lwaka lubaa, “Kwarasimilo oho kuchumba waka wose, na uo mwana kuchaamva warasimilwa.

⁴³Kwaki nanekwa ilagho iji, ja kuchelwa ni mae Bwana wapo?

⁴⁴Angu iji nasikira kuroghua kwako, kana kakoo kachumba kwa kuboilwa kifunyi kwapo.

⁴⁵Warasimilwa uo muka urumirie, angu agho ughorelo ni Bwana ghichakatishwa.”

⁴⁶Nao Maria ukaghamba, “Irangi japo jamkasa Bwana,

⁴⁷na roho yapo yaboilwa ni Mlungu Mkiri wapo;

⁴⁸angu wanitala ini mzumba wake usefwane. Angu zighana kufuma idana vivalwa vose vichaniwanga mrasimilwa.

⁴⁹Angu Uo-Uwadie-Ndighi wanibonyera maza mbaa, na irina jake jaelie.

⁵⁰Wughoma ghwake ghwadakaia hata vivalwa na vivalwa, kwa awo wimuobuagha.

⁵¹Waghughorua mkonu ghwake ghwa ndighi, wawisaghisa wang'eti kwa maririkanyo gha ngolo rawo.

⁵²Awo wibonyagha nguma wawiinja vifumbinyi kwawo, na kuwijosa awo wikuserie.

⁵³Awa wiko na njala wawighudisha na vindo vicha, na wazuri wawisigha mikonu miduu.

⁵⁴Wamtesia Israeli mdumiki wake, kwa kukumbuka wughoma ghwake.

⁵⁵Sa iji koni orewighorieghe weke wawa wedu, Abrahamu na kivalwa chake kwa kala na kala.”

⁵⁶Nao Maria ukakaia kwa Elizabeti sa meri idadu, nao ukaghenda cha mzinyi kwake.

⁵⁷Ngelo ya Elizabeti eva iendavika, ukava mwana wa womi.

⁵⁸Wambao na wakwawo wikasikira seji Bwana um'bonyere wughoma na kum'bonyera nicha na ndighi, nawo wikaboilwa chiaimweri nao.

⁵⁹Hata ituku ja wunyanya, wikacha kumshamisha, wikakunda kummbanga Zakaria kunughana na irina ja ndee;

⁶⁰ela mae ukaghamba, “Hata, si ijo jingi, ela uchawangwa Johane.”

⁶¹Nao wikaghamba, “Kwa kichuku chako ndekuwadie mndungi uwangwagha ijo irina.”

⁶²Wikamkunyiria ndee wikikunda kumanya uwangwa wada.

⁶³Nao ukalomba kibau cheandikia, ukaandika, “Irina jake ni Johane.” Na wose wikashinika.

⁶⁴Ahoeni momu ghwake ghukatambuka na lumi lwake lukafunguka, ukadeda ukimkasa Mlungu.

⁶⁵Wambao wose wikangilwa ni wowa. Na malagho ghikaereshwa andu kose chughongonyi ra Judea;

⁶⁶na awo wose wereghisikireghe wikaghiwika ngolonyi kwawo wikighamba, “Mwana uhu uchakaia mundu ufwane wada?” Angu mkonu ghwa ndighi ra Bwana ghorekoghe andwamweri nao.

⁶⁷Niko Zakaria ndee uja mwana, ukachulwa ni Roho Mweli ukaloda ukighamba;

⁶⁸“Ndekaso Bwana Mlungu wa Israeli, angu wawivikia wandu wake na kuwikombua.

⁶⁹Sena wadiwusiria ing'oni jekira, nyumbenyi kwa mdumiki wake Daudi.

⁷⁰Sa iji koni oreghorieghe kokala, kwa memu ya walodi wake wielie;

⁷¹angu uchadikira kufuma kwa wamaiza wedu; na kwa mikonu ya wose widimenyagha;

⁷²uwibonyere wughoma orewilaghirieghe weke aba, kwa kujikumbuka ilaghano jake ja wueli.

⁷³Ighemi oremghemieghe Aba odu Abrahamu ja kudineka isi kukaia,

⁷⁴iji dakirwa kufuma mikonunyi kwa wamaiza wedu, dichamdumikia kuseko na wowa,

⁷⁵kwa wueli na hachi imbiri kwake matuku ghose gha irangi jedu.

⁷⁶Na oho, mwanwapo, kuchawangwa mlodi wa Uo-Uko-Aighu-Nandighi, angu kuchamkiria Bwana kum'boisira chia yake;

⁷⁷na kuwineka wandu wake kumanya kukia, kwa kulekwa kaung'a rawo;

⁷⁸kwa chia ya wughoma mungi ghwa Mlungu odu, ngelo mwengere ghuchaadichea kufuma aighu,

⁷⁹kuwilangalishira awo wiko kidombo kirenyi, na andenyi ya kiju cha kifwa; na kulongoza mighendo edu kwa chia ya sere.”

⁸⁰Nao uja mwana ukazoghua, na kukaia nandighi rohonyi kwake; ukakaia kireti, hata ituku ucheewoneka worinyi kwa wandu wa Israeli.