Read TAITA BIBLE – Biblia Ilagho Jiboie Kwa Wandu Wose LUKA 10 Bible Online

LUKA 10 - TAITA BIBLE – Biblia Ilagho Jiboie Kwa Wandu Wose bible

LUKA 10

¹Nao nyuma ya agho, Jesu ukawika wazima sena wandu mirongo mfungade, ukawiduma wawi-wawi wimkirie kughenda iyo mizi orekundieghe kuighenda.

²Ukawizera, “Mvono ni mungi, ela wabonyi kazi ni watini, mlombenyi uo Bwana wa mvono uwighenje wabonyi kazi mvononyi kwake.

³Ghendenyi chia enyu; olenyi namduma fwana ya ng'ondi aghadi ya vikwau.

⁴Msakedwa mfuko ghwa pesa, hata kikuchu, hata vadu, sena msemroghuo mndungi chienyi.

⁵Kasikira mwangia nyumba ingi, izerenyi kande, ‘Sere ndeikaie aighu ya nyumba ihi.’

⁶Na ikakaia mndungi wa sere oko andenyi ya nyumba ija, sere enyu ichakaia aighu kwake; ela iji useko, sere enyu ichammburia.

⁷Nenyo kaienyi andenyi ya iyo nyumba cheni, mkija na kunywa ivo vose mchaanekwa, angu yafwana m'bonyi kazi ulipo mafungu ghake. Nenyo msakelunguwa-lunguwa kufuma nyumba ihi hata nyumba ija.

⁸Iji mwangia muzi ghungi, na wandu wamkaribisha, jenyi ivo vindo vose mchaanekwa;

⁹wiboisenyi wakongo wiko ahoeni, muwizere, ‘Wuzuri ghwa Mlungu ghwameria kumchea kaavui.’

¹⁰Ela mkangia muzi ghungi na wandu ndewimkaribishagha, fumenyi chienyi kwawo mghambe,

¹¹‘Hata na teri ya muzi ghonyu iyo yakakadia maghu ghedu damghughuduya, ela sena manyenyi angu Wuzuri ghwa Mlungu ghwameria kucha kaavui.’

¹²Namghoria loli, Sodoma ichakaia baa kutanyonyi kuchumba muzi ghuja.

¹³“Ni bugha kwako Korazini! Ni bugha kwako Bethsaida! Angu weke mwakilimbiti wibonyekie kwako, ngera wedebonyerwa Tiro na Sidoni, kumangu wamerie kuhea koicho, wikirwa nguwo ra magunia na kusea kidombo ivunyi.

¹⁴Ela ichakaia baa kwa Tiro na Sidoni kuchumba inyo Ituku ja Kutanywa.

¹⁵Na oho Kafarnaumu, kwaghamba kujoke kuvike mlungunyi? Kuchaserwa hata Andu kwa Wafu.”

¹⁶Nao Jesu ukawizera wanughi wake, “Uo umsikiragha inyo, uanisikira ini, na uo umleghagha inyo, uanilegha ini, na uo unileghagha ini, uamlegha uo orenidumieghe.”

¹⁷Nao waja wandu mirongo mfungade wikawuya kwa kuboilwa kubaa wikighamba, “Bwana hata pepo rawikilo aisi kodu kwa irina jako.”

¹⁸Nao ukawizera, “Neremmbonieghe Shetani ukipotoka sa luhehia kufuma mlungunyi.

¹⁹Olenyi namneka nguma rekanyanga aighu ya choka na vishushe, na kurisima ndighi rose ra uja m'maiza, hata ndekuwadie kindo chingi chichaam'bonya ilagho jingi anduangi.

²⁰Elaima msakeboilwa kwa iri, wei pepo rawikilo aisi konyu, ela boilonyi angu marina ghenyu ghaandikilo mlungunyi.”

²¹Ngelo ija cheni, Jesu ukaboilwa andenyi ya Roho Mweli, ukaghamba, “Nakuneka chawucha oho Aba, Bwana wa mlungunyi na ndoenyi, angu korewivisireghe wandu wa akili na suku maza iri, kukawifunukuya wanake watini, ee Aba, angu ulo nulo lorekoghe lukundo lwako.

²²Nanekelo vilambo vose ni Aba; hata ndekuwadie mndungi ummanyagha Mwana nani, ela Aba moni, sena mndungi ndemmanyagha Aba nani, ela Mwana moni, na uo ose Mwana uchaamsaghua umfunukuye.”

²³Nao njamenyi ukawighalukia wanughi wake ukawizera, “Warasimilwa awa wiwonagha maza iri muriwonagha inyo!

²⁴Angu namghoria welee, walodi wengi na wazuri werekundieghe kuriwona iri muriwonagha inyo wisedime, na kusikira iri murisikiragha inyo, ela ndewerepatireghe anduangi.”

²⁵Nao mwalimu umu wa Sharia ukacha kumtima ukighamba, “Mwalimu, nibonye wada ima nipate ifwa ja irangi ja kala na kala?”

²⁶Jesu ukamtumbulia, “Yaandikilo wada Sharienyi? Kwashomagha wada?”

²⁷Ukatumbulia, “Kumkunde Bwana Mlungu wako kwa ngolo yako yose, na kwa roho yako yose, na kwa ndighi rako rose, na kwa akili rako rose, na mmbenyu kumkunde sa iji kukukundagha kumoni.”

²⁸Nao ukamzera, “Kwatumbulia nicha, bonya agho na oho kuchakaia moyo.”

²⁹Ela uo ukikunda kukuneka hachi ukamzera Jesu, “Mmbedu nani?”

³⁰Jesu ukamtumbulia, “Mndumu orekoghe ukisea kufuma Jerusalemu kwenda Jeriko, nao chienyi ukawadwa ni viting'a, vikamrua nguwo, na kumkaba na ndighi; wikamsigha kaavui na kufwa.

³¹Nao mkohani umu ukasea ukimaria ija chia, hata iji wammbona, ukaida chia na mbai,

³²wokoni na Mlawi umu ukisea ukammbona, nao moni wori ukaida chia na mbai.

³³Ela Msamaria umu ukidamba charonyi ukavika andu orekoghe, na iji wammbona, ukangilwa ni wughoma,

³⁴ukamghendia na kumfunga ngoru rake, ukamshinga mavuda na divei ukamjosa aighu ya nyamandu yake, ukamreda kwa nyumba epangisha ukamrwarisha.

³⁵Ituku ja kawi, ukafunya pesa dinari iwi, ukamneka uja mundu wa nyumba ukighamba, ‘Mrwarishe mundu uhu, na icho chose kuchaatumia kuchumba aighu yake, ngelo ya kuwuya kwapo nichalipa.’

³⁶Idana kwa awa wandu wadadu, ni uao kumririkanyagha kukaia mmbao wa uja mundu orekabiloghe ni viting'a?”

³⁷Ukatumbulia, “Ni uja oremmbonyereghe wughoma.” Jesu ukamzera, “Ghenda na oho kubonye wokoni.”

³⁸Nao iji Jesu na wanughi wake werekoghe wikighenda chia yawo, ukangia muzi ghumu, na muka umu uwangwagha Marita ukamkaribisha nyumbenyi.

³⁹Nao orekoghe na mruna wa waka uwangwagha Maria, uo oreserieghe kidombo maghunyi kwa Jesu ukighisikiria mafundisho ghake.

⁴⁰Ela Marita orekoghe wasumbuka kwa kudumika nandighi ukamghendia Jesu ukamzera, “Bwana ndekutalagha kuwona angu mwanidu wanisighia wudumiki niekeri? Mzere uche unitesie.”

⁴¹Ela Bwana ukamtumbulia, “Marita, Marita, kwaja wasi na kusumbulwa ni maza nyingi;

⁴²jeekundika ilagho jimweri tu, Maria waasaghua ifungu icha, najo ndechaasokwa ni mndungi anduangi.”