Read TAITA BIBLE – Biblia Ilagho Jiboie Kwa Wandu Wose LUKA 12 Bible Online

LUKA 12 - TAITA BIBLE – Biblia Ilagho Jiboie Kwa Wandu Wose bible

LUKA 12

¹Ngelo iyo, iji maelfu mengi gha wandu gherekwanyikieghe, hata wikakaia wikiwadiana weni na weni, Jesu ukazoya kuwighoria wanughi wake imbiri ukighamba, “Mkulindie na chachu ya Mafarisayo nayo ni kuja kuwi.

²Angu ndekuwadie kindo chingi chifinikiro, chisechaawoneka worinyi, hata ilagho jingi jivisiro jisechaamanyika anduangi.

³Kwa huwu, ijo jose morejighorieghe kirenyi, jichasikirwa mwengerenyi, na ijo jose jerehohoreloghe vumbenyi va ndenyi, jichachilwa aighu nyumbenyi.

⁴“Nani namghoria inyo waghenyi wapo, msakewiobua awa wibwaghagha mumbi na nyuma wisedimagha kubonya ilagho jingi izima anduangi.

⁵Ela nichammbonyera uo ufwane kuobolwa, muobuonyi uo nyuma ya kubwagha, uko nandighi rekumba jehanamunyi, ee namghoria, muobuonyi Uo.

⁶Welee, mbeumbeu isanu nderiuzwagha kwa magome awi anguwada? Hata huwo, imweri ndeiliwikagha imbiri ya Mlungu anduangi.

⁷Hata maridia gha vongonyi konyu ghamerie kutalwa putu. Msakeobua, inyo moko na zoghori mbaa kuchumba mbeumbeu nyingi.

⁸“Nani namghoria loli, angu kula mundu uchaanirumiria ini imbiri ya wandu, Mwana wa Mdamu wori uchamrumiria imbiri ya weke malaika wa Mlungu.

⁹Ela uo unikanagha imbiri ya wandu, Mwana wa Mdamu wori uchamkana imbiri ya weke malaika wa Mlungu.

¹⁰Na uo ose uchaaghora ilagho aighu ya Mwana wa Mdamu uchalekwa, ela uo uchaamsholia Roho Mweli, ndechaalekwa anduangi.

¹¹Nenyo iji wamreda sunagoginyi, na kwa wabaa, na kwa awo wibonyagha nguma, msakesumbuka mchatumbulia wada, angu mchaghora wada;

¹²angu Roho Mweli uchamfundisha saa ija cheni seji mchaatumbulia.”

¹³Nao mndumu andenyi ya jija izungu ukamzera, “Mwalimu, mzere mwanidu diwaghe ifwa jedu.”

¹⁴Jesu ukatumbulia, “Ee mundu, nani orenibonyereghe nikaie mtanyi angu mmbaghanyi aghadi konyu?”

¹⁵Nao ukawizera, “Manyenyi mkulindie na iriso, angu irangi ja mundu ndejiko andenyi ya ugho wungi ghwa mali uko naro anduangi.”

¹⁶Nao ukawighoria mfwano ughu: “Ndoe ya mndumu uko na mali, erevaeghe loli-loli;

¹⁷nao ukizoya kupima moni ukaghamba, ‘Nibonya wada nisewadie andu kowika viro vapo?’

¹⁸Ukaghamba, ‘Nichabonya huwu, nicharivuchua nganya rapo, na kuagha zima mbaa andu nichaakumba viro vapo vose, na vilambo vapo.

¹⁹Nani nichajizera irangi japo, Ee irangi, koko na vindo vingi viwikilo va miaka mingi, idana hora, kuje, kunyo, kuboilo’

²⁰Ela Mlungu ukamzera, ‘Ee mkelu, ichi kio cheni, roho yako ichakundwa, na ivo vindo vako kuvibonyere vichawuya vani?’

²¹Ni huwo koni kwa uo ukuwikiagha moni mali, useko na mali ingi kwa Mlungu anduangi.”

²²Nao Jesu ukawizera wanughi wake, “Kwa huwu namzera inyo, msakejisumbukia irangi jenyu, wei mchajaki, angu mimbi yenyu wei mcharwaki.

²³Angu irangi jachumba vindo, na mumbi ghwachumba marwao.

²⁴Ririkanyenyi ngorusa nderilimagha, hata nderikuwidagha, hata kukwanya nganyenyi anduangi, na Mlungu wadarilisha. Na inyo ndemko wa zoghori kuchumba iro nyonyi anguwada?

²⁵Nani konyu kwa kusumbukia irangi jake, udimagha kujichuria wulacha mkonu ghumweri?

²⁶Ikakaia msedimagha kukubonyera ijo jiko itini sa iji, kwaki mughisumbukiagha agho mazima?

²⁷Ririkanyenyi mboi iji rizoghuagha, nderibonyagha kazi hata nderilukagha anduangi, nani namzera, hata Solomoni moni kwa wubaa ghwake ghose, ndererushiroghe nicha sa imu ya mboi iro anduangi;

²⁸Idana ikakaia Mlungu warirusha huwu nyasi ra mlambenyi riko idime na kesho raoma, na kukorwa modo, uchachumbaki kumrusha inyo wandu wa irumirio itini.

²⁹Kwa huwu, msakelola mchajaki, angu mchanywaki, hata msakeja wasi.

³⁰Angu mbari rose ra wurumwengu radalola vilambo ivo, ela Ndeyo onyu wamanya angu moko na bea navo.

³¹Ela lolenyi kande Wuzuri ghwa Mlungu, na vilambo ivo vose uchamneka.

³²“Msakeobua inyo chagha kitini, angu yam'boie Ndeyo onyu kumneka ugho wuzuri.

³³Uzenyi ivo muko navo, mfunye makuwio, mkubonyere mmbeni vikuchu viserashukagha, mkuwikie mali mlungunyi andu risechaasia jingi, na vitoi viseiwagha, hata soya ingi isenonagha anduangi.

³⁴Angu andu koni mali rako riko, niko koni na ngolo yako ichaakaia wori.

³⁵“Fungenyi viwonu venyu, mkaie nicha, na taa renyu riakeghe,

³⁶nenyo mkaie sa wandu wimmbeseragha bwana wawo uwuye kufuma arusinyi; hata iji wacha, na kukongoda mnyango, wimrughuye shwa-shwa.

³⁷Warasimilwa awa wadumiki bwana wawo uchaawikua wikicheresha, namghoria loli, uchakufunga uo moni, na kuwisera kidombo mezenyi upate kuwidumikia.

³⁸Ukacha kio ghadi, angu ndoe ikiela na kuwikua huwo, warasimilwa awo wadumiki.

³⁹Ela manyenyi ngera mundu wa nyumba odemanya ni saa iao uchaachelwa ni vitoi, kumangu nderedimagha kuisigha nyumba yake ibaro anduangi.

⁴⁰Nenyo wokoni kaienyi nicha, angu Mwana wa Mdamu uchacha kwa saa mseimanyagha anduangi.”

⁴¹Nao Petro ukamzera, “Bwana, mfwano ughu ni kwa wundu ghodu isi, angu ni kwa wandu wose?”

⁴²Bwana ukamzera, “Idana mdumiki mucha na wa akili ni uao, uo Bwana wake uchaammbika aighu ya nyumba yake, uwiwaghie wadumiki wambao vindo vawo, kwa ngelo yaro?

⁴³Warasimilwa uja mdumiki iji bwana wake wacha na kumkua ukibonya wokoni.

⁴⁴Namghoria loli, uchammbika ukaie m'baa wa vilambo vake vose.

⁴⁵Ela uja mdumiki ukaghamba moni ngolonyi kwake, Bwana wapo waamuka, nao uzoye kuwikaba wadumiki wambao wa waka na wa womi, na kuja na kunywa na kuwongia,

⁴⁶bwana wa mdumiki uja uchacha ituku userejisuwirieghe, na saa useimanyagha, nao uchamdumbua vipande vipande na kummbika chiaimweri na awo wiserumiriagha;

⁴⁷na uja mdumiki orelumanyireghe lukundo lwa bwana wake, nao nderekuwikieghe moni nicha angu kulubonya lukundo lwa bwana wake, uchakabwa na ndighi.

⁴⁸Ela uo useremanyireghe, na kubonya agho ghimfwanagha ukabo, uchakabwa kutini. Uo unekelo kwa wungi, kwake vichakotelwa kwa wungi; na kwa uo mundu wiwikagha kwa wungi, wichamkotia kwa wungi wokoni.

⁴⁹“Nachee kukora modo ndoenyi, nani naboilwagha saki ngera ghwadaaka!

⁵⁰Neko na wubaputizo nibaputizwagha nagho, nani naja wasi saki hata ghukatie!

⁵¹Muaghesha necha kureda sere ndoenyi? Hata, siko kungi; ela ni mawaghanyiko!

⁵²Kufuma idana wandu wasanu wa nyumba imweri wichawaghanyika; wadadu kwa wawi, na wawi kwa wadadu witangalanagha.

⁵³Wichawaghanyika na kutangalana, ndee mwana na mdawana wake, mdawana na ndee, muka na mwai wake, mwana wa waka na mae, mkeku na mka-mwanwake, mkamwana na mkekwake.”

⁵⁴Nao Jesu ukajizera izungu ja wandu sena, “Iji mwajiwona iwingu jikijoka cha magharibi, mwadaghamba shwa wori, ‘Vua iacha;’ nayo loli yadacha.

⁵⁵Na iji mwasikira mbeo ikiweta kufuma kusinyi, mwadaghamba, ‘Kuchakaia na iruwa jibirie;’ najo loli jadabia.

⁵⁶Inyo waji-kuwi, mwaichi kutambua vimu kwa kuzighana ndoenyi na mlungunyi, kwaki sena mlemwagha ni kutambua maza ra ngelo iri?”

⁵⁷“Kwaki msetanyagha mmbeni agho ghiko gha hachi?

⁵⁸Iji kwakaghendanya na mshitaki wako kotinyi, tima kupatana nao chienyi, usechekughenja kwa mtanyi, na mtanyi ukughenje kwa asikari, na asikari ukungire kifungonyi.

⁵⁹Nakughoria loli, ndekuchaafuma aho hata kumerie kulipa senti ya kutua!”