Read TAITA BIBLE – Biblia Ilagho Jiboie Kwa Wandu Wose LUKA 15 Bible Online

LUKA 15 - TAITA BIBLE – Biblia Ilagho Jiboie Kwa Wandu Wose bible

LUKA 15

¹Nao wawadi wushuru na wakaung'a wose werekoghe wikimsoghodera wipate kumsikira.

²Ela Mafarisayo na walimu wa Sharia wikazughunuka wikighamba, “Mundu uhu wadakaribisha wakaung'a na kujanya nawo.”

³Jesu ukawighoria mfwano ughu:

⁴“Ni mnduki konyu uko na ng'ondi ighana, nao ulagharilo ni imweri, usesighagha rija mirongo ikenda na ikenda mlambenyi, na kulola ija ilaghirie, hata uiwone?

⁵Ukameria kuiwona wadaiduka maweghenyi kwake kwa kuboilwa.

⁶Hata iji wavika mzinyi wadawiwanga waghenyi wake na wambao na kuwizera, ‘Boilonyi chiaimweri nani, angu nameria kuiwona ija ng'ondi erenilagharieghe.’

⁷Namghoria huwo koni, kuchakaia na kuboilwa mlungunyi kwa wundu ghwa mkaung'a uheagha, kuchumba wandu wa hachi mirongo ikenda na ikenda wiseko na wundu ghwa kuhea anduangi.

⁸“Angu ni muka uao uko na shilingi ikumi, ukalaghasha imweri, usekoragha taa na kufwagia nyumba na kuilola nicha hata uiwone?

⁹Ukameria kuiwona wadawanga waghenyi wake na wambao na kuwizera, ‘Boilonyi chiaimweri nani, angu nameria kuiwona ija shilingi erenilagharieghe.’

¹⁰Namghoria, huwo koni koko na kuboilwa kwa weke malaika wa Mlungu, kwa wundu ghwa mkaung'a umweri uheagha.”

¹¹Nao ukaghamba, “Mndumu orekoghe na wana wa womi wawi,

¹²uja mtini ukamzera ndee, ‘Aba, niwaghie ifwa japo.’ Niko ukawiwaghia mali rake.

¹³Nyuma ya matuku matini, uja mtini ukakwanya vose orekoghe navo, ukadamba cha isanga ja kula; na aja ukatumia pesa rake kwa maza ra kisha-kisha.

¹⁴Hata iji wameria kuritumia pesa rose, njala mbaa ikangia isanga jija, ukazoya kusowa vindo.

¹⁵Ukaghenda ukaandikwa kazi ni mndumu wa isanga jija, ukamghenja mbuwenyi kwake kulisha nguwe.

¹⁶Nao ukakunda kuja makanda gherejighwagha ni rija nguwe, hata mndungi nderemnekieghe kindo chingi anduangi.

¹⁷Nao iji wapata akili nicha, ukaghamba, ‘Ni wadumiki walinga wa aba wijagha, na kughuda na kusighara, nani aha niatota kwa njala!’

¹⁸Nichawuka nimghendie aba, nimzere, ‘Aba, nabonyere kaung'a imbiri ya Mlungu na imbiri kwako;

¹⁹hata sifwane ini kuwangwa mwanwako anduangi; kunibonye ini sa umu wa wadumiki wako.’”

²⁰Nao ukawuka ukazoya kuwuya kwa ndee. Hata iji orekoghe kula koni, ndee ukammbona ukangilwa ni wughoma, ukamkimbiria na kumshishidia; ukamsusugha.

²¹“Uja mwana ukamzera, ‘Aba, nabonyere kaung'a imbiri ya Mlungu na imbiri kwako, hata sifwane ini kuwangwa mwanwako anduangi.’

²²Ela ndee ukawizera wadumiki wake, ‘Redenyi shwa-shwa ija nguwo iboie kuchumba mumrushe, sena mumngire pete chalenyi kwake, na vadu maghunyi kwake.

²³Sena mrede ija ngache ibandie muibwaghe, dipate kuja na kubonya maseko.

²⁴Angu uhu mwanwapo orekoghe ufue, nao hoyu oko moyo; orekoghe ulagharie, nao hoyu wawoneka.’ Wikazoya kuja na kubonya maseko.

²⁵“Ela ngelo iyo mwanwake m'baa orekoghe mbuwenyi, nao ukiwuya mzinyi, ukasikira ngoma na wandu wikivina.

²⁶Ukammbanga umu wa wadumiki ukamkotia, ‘Ni mazaki iro?’

²⁷Ukamtumbulia, ‘Uja mwanyinyu wacha na ndeyo wam'bwaghia ija ngache ibandie kwa kukaia wampata uko banana.’

²⁸Nao ukajokwa ni machu ukalegha kungia mzinyi. Niko ndee ukafuma na kumvoya ungie.

²⁹Ela ukamtumbulia ndee ukaghamba, ‘Zighana miaka yose ihi nakudumikia na jingi sikosere momu ghwako anduangi, ela jingi ndekuninekie hata ndaghina cheni nibonye maseko na waghenyi wapo.

³⁰Ela uendacha uhu mwanwako unonie mali rako na malaya, uo kwam'bwaghia ija ngache ibandie!’

³¹Ndee ukamzera, ‘Mwana wapo, oho dadakanya matuku ghose, na vose viko vapo ni vako.

³²Ni hachi putu kubonya maseko na kuboilwa, angu uhu mwanyinyu orekoghe ufue, nao hoyu oko moyo; orekoghe ulagharie, nao idana wawoneka.’”