Read TAITA BIBLE – Biblia Ilagho Jiboie Kwa Wandu Wose LUKA 17 Bible Online

LUKA 17 - TAITA BIBLE – Biblia Ilagho Jiboie Kwa Wandu Wose bible

LUKA 17

¹Nao Jesu ukawizera wanughi wake, “Matimo ghengira wandu kaung'enyi suti ghiche, ela ni bugha kwa uo mundu ughiredagha.

²Yakaiagha nicha ngera odefungwa igho jesha singonyi kwake na kukumbwa baharinyi, kuchumba kumshekeria umu wa awa watini, ungie kaung'enyi.

³Mkulindie! Ngera mwanyinyu wabonya kaung'a, kumkanie; iji wahea, kumfue wughoma.

⁴Na ngera wakubonyera kaung'a mando mfungade ituku jimweri, nao ukiwuya kwako mando mfungade ukighamba, ‘Nahea,’ suti kumfue wughoma.”

⁵Nao wadumi wikamzera Bwana, “Dichurie irumirio jedu.”

⁶Bwana ukaghamba, “Ngera modeeka na irumirio jing'ane sa ndembe ya haradali, kumangu mwaghuzera muku ughu, ‘Kuka kuwalo baharinyi’ nagho kumangu ghwamsikira.”

⁷“Welee, ngera mndungi onyu oko na mdumiki olima angu olisha ng'ondi, wadima kumzera iji wacha kufuma mbuwenyi, ‘Choo shwa-shwa kusee kidombo kuje vindo?’

⁸Wulalo ghwa agho ndadamzera, ‘Niboisire vindo, sena kuro nicha kunidumikie, hata nimerie kuja na kunywa; niko konyuma oho kuje na kunywa.’

⁹Huwo-lee, uja bwana uchamfunyira mdumiki chawucha, angu wabonya sa iji wamzera?

¹⁰Na inyo wokoni, kasikira mwabonya ghose mlaghirilo, ghambenyi, ‘Deko wadumiki disewadie fwaida isi, daabonya agho gheni ghidifwanagha kughibonya.’”

¹¹Nao iji Jesu orekoghe ukighenda Jerusalemu, oreidirieghe ghadi na ghadi ya Samaria na Galilaya.

¹²Hata iji orengirieghe mzinyi, ukakwana na wandu wa womi ikumi wiko na sima,

¹³nawo wikikaia kula koni, wikawusira chwaka rawo na kughamba, “Jesu Bwana, kudifue wughoma.”

¹⁴Uendawiwona, ukawizera, “Ghendenyi mkuwonyere mmbeni kwa wakohani.”

¹⁵Hata iji werekoghe wikighenda wikaeleshwa. Umu wawo iji wawona angu waboiswa, ukawuya ukimkasa Mlungu kwa lwaka lubaa;

¹⁶ukaghwa kiwushu-wushu maghunyi kwake Jesu, na kumfunyira chawucha. Nao orekoghe Msamaria.

¹⁷Niko Jesu ukaghamba, “Welee, si wandu ikumi wereelesheroghe anguwada? Waja ikenda weko hao?

¹⁸Ndewonekie ungi owuya na kumkasa Mlungu, ela uhu mghenyi moni?”

¹⁹Jesu ukamzera uja mundu, “Wuka kwende chia yako, irumirio jako jakuboisa.”

²⁰Nao iji wakotelwa ni Mafarisayo ngelo ra kucha kwa Wuzuri ghwa Mlungu, ukawitumbulia, “Wuzuri ghwa Mlungu ndeghuchagha kwa kulangarilwa;

²¹hata ndewichaaghamba, ‘Ola hoghu,’ angu ‘Hoghuja,’ angu wuzuri ghwa Mlungu ghoko aghadi konyu.”

²²Nao ukawizera wanughi wake, “Matuku ghichacha, nenyo mchakunda kujiwona jimu ja matuku gha Mwana wa Mdamu, hata ndemchaajiwona anduangi.

²³Na wandu wichamzera, ‘Olenyi hoja,’ na wamu ‘Olenyi hoyu,’ msakeghenda, hata msakewinugha.

²⁴Angu sa iji koni luhehia lukabagha mawingunyi na kulangala kufuma ii chia na ii chia, niko koni kuchaakaia kucha kwake Mwana wa Mdamu.

²⁵Ela imbiri suti utiriro maza nyingi, na kuleghwa ni kivalwa ichi.

²⁶Sa iji koni gherekoghe matuku gha Nuhu, niko koni kuchaakaia matuku gha Mwana wa Mdamu.

²⁷Werejieghe, wikanywa, wikalowua, wikalowolwa, hata ituku jija Nuhu orengirieghe safinenyi, ikacha gharika na kuwitotesha wose.

²⁸Wokoni sa iji erekoghe matuku gha Loti, werejieghe, wikanywa, wikaghua na kuuza, wikawa na kuagha,

²⁹hata ituku jija Loti orefumieghe Sodoma, modo na kibiriti ghukasea kufuma mlungunyi sa vua na kuwitotesha wose.

³⁰Niko koni ichaakaia ituku Mwana wa Mdamu uwonekagha.

³¹“Ngelo iyo, uo uko nyumbenyi aighu, na vilambo vake viko nyumbenyi kondenyi, usakesea kuvishoa; na wokoni uo uko mbuwenyi, usakewuya mzinyi.

³²Mkumbukenyi mka-Loti.

³³Uo ose ukundagha kujikira irangi jake, uchajilaghasha; ela uo ose ujilaghashagha irangi jake, uchajikira.

³⁴Namghoria, kio chija wandu wawi wichakaia wuli ghumweri, umu uchadalwa na umu uchasighwa.

³⁵Waka wawi wichakaia wikisha chia imweri, umu uchadwalwa na umu uchasighwa. [

³⁶Wandu wa womi wawi wichakaia mbuwenyi, umu uchadalwa, na umu uchasighwa.”]

³⁷Nao wikamzera, “Hao Bwana?” Ukawizera, “Andu koni gharia iko, niko koni nderi rikwanyikiagha.”