Read TAITA BIBLE – Biblia Ilagho Jiboie Kwa Wandu Wose LUKA 22 Bible Online

LUKA 22 - TAITA BIBLE – Biblia Ilagho Jiboie Kwa Wandu Wose bible

LUKA 22

¹Ngelo ya Ndima ya Mikate Isewadie Chachu, iyo iwangwagha Pasaka, erekoghe kaavui.

²Wakohani wabaa na walimu wa Sharia werekoghe wikilola chia em'bwagha Jesu, angu werewiobueghe wandu.

³Niko Shetani ukamngia Juda uwangwagha Iskarioti, nao ni umu wa waja wanughi ikumi na wawi;

⁴ukaghenda noko kwa wakohani wabaa na walindiri wa Hekalu wipatane seji uchaadima kumfunya Jesu kwawo.

⁵Nawo wikaboilwa, wikarumiria kumneka feza.

⁶Juda ukarumiria, nao ukakaia ukilola ngelo ifwane emfunya kwawo izungu ja wandu jisemanyire.

⁷Nao iji javika ituku ja Mikate Isewadie Chachu, najo nijo ituku Mwana wa Ng'ondi wa Pasaka ubwaghwagha,

⁸Jesu ukawiduma Petro na Johane ukighamba, “Ghendenyi mudiboisire Ndima ya Pasaka dipate kuja.”

⁹Nawo wikamkotia, “Kwakunde diiboisire hao?”

¹⁰Nao ukawizera, “Iji mwangia mzinyi, mchakwana na mundu udwae mtungi ghwa machi, mnughenyi hata iyo nyumba uchaangia,

¹¹nenyo mumzere mundu wa nyumba, ‘Mwalimu wakukotia welee, chumba cha waghenyi cheko hao andu nichaaijia Pasaka na wanughi wapo?’

¹²Nao uchammbonyera chumba kibaa gorofenyi chipambilo nicha; ahoeni wikenyi nicha.”

¹³Wikaghenda wikawona wokoni sa iji Jesu orewighorieghe, wikaiboisa Pasaka.

¹⁴Ngelo yaro iendavika, Jesu ukasea kidombo kuja andwamweri na wadumi wake,

¹⁵ukawizera, “Nekoghe na bea mbaa eja Pasaka andwamweri nenyo imbiri ya kutirirwa kwapo.

¹⁶Angu namzera, sichaaija sena, hata ituku jija ichaakatishwa kwa Wuzuri ghwa Mlungu.”

¹⁷Nao ukachiwada kikombe, hata iji wameria kufunya chawucha ukaghamba, “Koonyi ichi mmbaghiane mmbose,

¹⁸nani namzera angu sichaanywa divei sena, hata Wuzuri ghwa Mlungu ghumerie kucha.”

¹⁹Ukawada mkate, ukafunya chawucha, ukaghuchikanya ukawineka ukighamba, “Ughu nigho mumbi ghwapo [ghufunywagha kwa wundu ghonyu, bonyenyi huwu kwa kunikumbuka ini.”

²⁰Na wokoni nyuma ya vindo ukawada kikombe ukighamba, “Kikombe ichi ni ilaghano iwishi kwa bagha yapo idikagha kwa wundu ghonyu.]

²¹Ela zighanenyi uhu unifunyagha dekwanye aeni aha mezenyi.

²²Mwana wa Mdamu uaendabwaghwa sa iji koni orepangiloghe, ela ni bugha kwa uo mundu umfunyagha.”

²³Nao wikazoya kukotiana weni na weni nani uchaabonya ilagho ijo.

²⁴Nao ikawuka nganyi aghadi ya wanughi wei nani uririkanywagha kukaia m'baa wawo.

²⁵Jesu ukawizera, “Wazuri wa iro mbari zima wakaia na nguma aighu ya wandu wawo na awo wibonyagha nguma wadawangwa, ‘Wabonyi nicha.’

²⁶Ela konyu inyo ndemchaakaia huwo anduangi; angu uo uko m'baa konyu, uchakaia sa mtini, na kilongozi uchakaia sa mdumiki.

²⁷Angu aho m'baa ni uao? Ni uja uko kidombo kujenyi angu ni uja wawuyadumika? Si uja uko kidombo vindonyi anguwada? Ela ini neko aghadi konyu sa uja udumikagha.

²⁸“Ni inyo mduanye nani ngelo rose ra matimo ghapo;

²⁹na sa iji koni Aba uniwikie wuzuri, na ini wori nammbikia wuzuri,

³⁰mpate kuja na kunywa mezenyi kwapo, kwa wuzuri ghwapo; na kusea kidombo vifumbinyi va nguma, mkiritanya iro mbari ikumi na iwi ra Israeli.”

³¹“Simoni, Simoni! Ola Shetani wawusa rusa emtima inyo, na kumuela-ela sa iji ngano ielwagha.

³²Ela nakulombia oho irumirio jako jisakesia, hata iji kwameria kunighalukia kuwimangishe wanyinyu.”

³³Petro ukatumbulia, “Bwana, neko tayari kughendanya na oho kifungonyi na hata kifonyi wori.”

³⁴Jesu ukamtumbulia, “Niakughoria loli Petro, idime iji, njogholo ndeichaadeda kusemerie kunikana kadadu kukaia ndekuniichi anduangi.”

³⁵Nao Jesu ukawizera wanughi wake, “Iji neremdumieghe msedwae kikuchu angu mfuko angu vadu, moresowieghe kindo chingi?” Wikatumbulia, “Hata.”

³⁶Jesu ukawizera, “Ela idana namzera, uo uko na kikuchu angu mfuko udo, na uhu usewadie lufu ndeuze nguwo yake ukughuye lufu.

³⁷Angu namghoria, suti Maandiko agha ghikatie, ‘Oretaliloghe andwamweri na wakosi,’ na kula iandiko jiandikilo kwa wundu ghwapo, suti jikatisho.”

³⁸Wanughi wikaghamba, “Bwana, chufu iwi heri.” Ukatumbulia, “Rakata.”

³⁹Nao Jesu ukafuma, na sa iji koni mzango ghwake ghorekoghe, ukaghenda cha Mghondi ghwa Mizeituni, na wanughi wake wikamnugha.

⁴⁰Hata iji wameria kuvika, Jesu ukawizera wanughi wake, “Lombenyi msechengia matimonyi.”

⁴¹Nao ukawisigha ukaghenda sa wukula ghwa kukumba igho, ukadunga ngokoro ukalomba ukighamba,

⁴²“Aba ngera kwakunda, niinjire ichi kikombe, ela isakekaia sa iji nikundagha, ela ikaie sa iji kukundagha oho.” [

⁴³Nao malaika wa Bwana ukamchea kufuma mlungunyi kumfungisha ndighi.

⁴⁴Nao moni ukikaia na wasi m'baa, ukalomba kwa kufunga ndighi, hata marughudia ghake ghikakaia ghikitonya andoenyi sa matanda mabaa gha bagha.]

⁴⁵Nyuma ya kumeria malombi ghake, ukawichea wanughi wake ukawikua walala kwa wasi.

⁴⁶Nao ukawizera, “Kwaki mlalagha? Wukenyi mlombe msengie matimonyi.”

⁴⁷Nao iji orekoghe ukighora, Juda, nao ni umu wa waja wanughi ikumi na wawi ukabusa, ukijilongoza izungu; nao ukamchea Jesu ukamsusugha.

⁴⁸Ela Jesu ukamzera, “Wele Juda, kuamfunya Mwana wa Mdamu kwa kumsusugha?”

⁴⁹Nao iji wanughi wake wawona maza iro wikamkotia, “Bwana, diwideme na chufu?”

⁵⁰Umu wa wanughi ukamdema mzumba wa Mkohani M'baa, ukamdumbua kudu kwa mkonu ghwa kiwomi.

⁵¹Niko aho Jesu ukaghamba, “Basi yakata.” Nao ukamuadada uja mundu, ukam'boisa kudu kwake.

⁵²Niko Jesu ukawizera wakohani wabaa, walindiri wa Hekalu, na waghosi awa werechieghe kummbwada, “Welee, mwaacha kuniwada mdwae chufu na rungu sa iji neeka kiting'a?

⁵³Iji nerekwanyeghe nenyo Hekalunyi kula ituku ndemoreniwadieghe, ela ihi ni ngelo enyu, nayo ni ndighi ra kira.”

⁵⁴Nao wikammbwada Jesu, na kumghenja nyumbenyi kwa Mkohani M'baa; Petro ukanugha nyuma kwa kula.

⁵⁵Aho korekoghe na modo ghwakorwa ghadi na ghadi ya waza, na Petro ukaseanya kidombo chiaimweri na awo werekoghe wikioda modo.

⁵⁶Mwai umu mdumiki iji wammbona Petro ukioda modo ukamkuya meso ukaghamba, “Uhu mundu nao moni okwanyeghe na Jesu.”

⁵⁷Ela Petro ukakana ukaghamba, “E muka, simwichi putu mundu uhu.”

⁵⁸Nyuma kapindi, mundu umu sena ukammbona ukaghamba, “Na oho wori ko umu wawo.” Ela Petro ukatumbulia, “E mundu, si ini ungi!”

⁵⁹Nao sa nyuma ya saa imweri, mundu umu ukachuria kughora, “Kwa loli mundu uhu okwanyeghe na Jesu, angu uo moni wori ni Mgalilaya!”

⁶⁰Ela Petro ukakana ukaghamba, “E mundu, simanyagha agho kughighoragha anduangi.” Nao ahoeni ukighora, njogholo ikadeda.

⁶¹Bwana ukaghaluka ukazighana Petro, na Petro ukakumbuka seji Bwana oremzerieghe, “Kio ichi cheni, imbiri ya njogholo kudeda, kuchanikana kadadu.”

⁶²Nao ukafuma shighadi ukalila nandighi.

⁶³Awo wandu werekoghe wikimlindia Jesu, wikamseka na kumkaba.

⁶⁴Wikamfunga meso na kitambaa na kumkotia, “Loda! Nani wakukaba?”

⁶⁵Wikamdukana kwa malagho mengi.

⁶⁶Nao iji ndoe yaela, wabaa, wakohani wabaa, walimu wa Sharia, wikakwanyika chia imweri, wikamreda Jesu Mwandunyi.

⁶⁷Wikamkotia, “Dighorie ngera oho ko Kristo.” Ela Jesu ukawitumbulia, “Hata ngaduamghoria ndemrumiriagha anduangi,

⁶⁸na hata ngamkotia ikoto ndemdimagha kujitumbulia anduangi.

⁶⁹Ela kufuma idana, Mwana wa Mdamu uchasea kidombo chia ya mkonu ghwa kiwomi ghwa Mlungu Uwadie Ndighi Rose.”

⁷⁰Niko aho wose wikaghamba, “Huwo ni kughamba oho ko Mwana wa Mlungu?” Ukawitumbulia, “Inyo mwaghamba angu ini nuo moni.”

⁷¹Nao wikaghamba, “Deko na hajaki ya washahidi wamu wazima? Hoku dasikira diweni ukighora kwa momu ghwake moni.”