Read TAITA BIBLE – Biblia Ilagho Jiboie Kwa Wandu Wose LUKA 23 Bible Online

LUKA 23 - TAITA BIBLE – Biblia Ilagho Jiboie Kwa Wandu Wose bible

LUKA 23

¹Niko wandu wose wikawuka kimusi na kumghenja Jesu kwa Pilato.

²Wikazoya kumshitakia wikighamba, “Dammbwadie mundu uhu ukilaghasha mbari edu kwa kuwighiria wandu wisemfunyire Kaisari kodi, na kughamba wei uo ni Kristo mzuri.”

³Pilato ukamkotia, “Welee, oho ko mzuri wa Wayahudi?” Jesu ukatumbulia, “Oho kwaghamba.”

⁴Pilato ukawizera wakohani wabaa na izungu, “Siwonagha ikosa jingi kwa mundu uhu anduangi.”

⁵Ela awo wikachuria kughora kwa ndighi, “Wadawikumba wandu sheshe kwa mafundisho ghake isanga jose ja Judea, kufuma Galilaya, hata aha.”

⁶Nao iji Pilato wasikira agho ukakotia, “Welee, uhu mundu ni Mgalilaya?”

⁷Uendamanya angu Jesu waafuma isanga jibonyerwagha nguma ni Herode, ukamghenja kwake, nao moni ngelo iro orekoghe ukikaia Jerusalemu.

⁸Nao iji Herode wammbona Jesu, ukaboilwa loli-loli, kwa kukaia orekoghe ukisikira malagho ghake, nao kwa ngelo ndacha, orekoghe ukikunda kummbona. Ukasuwiria kummbona Jesu ukibonya mwakilimbiti umu.

⁹Kwa huwo ukamkotia makoto malazi, ela Jesu nderemtumbulieghe anduangi.

¹⁰Wakohani wabaa, na walimu wa Sharia werekaieghe kimusi kaavui wikamshitakia kwa kufunga ndighi.

¹¹Niko Herode andwamweri na masikari ghake wikamseka Jesu na kumsholia, wikamrusha nguwo iboie, wikammbunja kwa Pilato.

¹²Na ituku jija jeni, Herode na Pilato wikabonya wughenyi, angu koimbiri werekoghe na wumaiza.

¹³Niko Pilato ukawikwanya chiaimweri wakohani wabaa, vilongozi na wandu,

¹⁴ukawizera, “Inyo mwaniredia uhu mundu mkighora wei waawuyalaghasha wandu, na nyuma ya kuzighana malagho ghake imbiri konyu siwonie ikosa jingi kwake kwa agho mumshitakiagha nagho anduangi.

¹⁵Hata Herode wori, ndewonie ikosa jingi kwake anduangi; niko wammbuja kodu. Mundu uhu ndebonyere ilagho jingi jimfwanagha kifwa anduangi.

¹⁶Kwa huwu nichamkaba na kiboko na kumfungua.” [

¹⁷Idana kwa kula Ndima ya Pasaka erekoghe suti Pilato uwifunguye mfungwa umweri.]

¹⁸Ela wose wikaghora kwa lwaka lubaa, “Mwinje noko uhu kudifunguye Baraba!”

¹⁹(Baraba orefungiloghe kwa wundu ghwa kubonya sheshe mzinyi na kubwagha)

²⁰Nao Pilato ukikunda kumfungua Jesu ukaghora na jija izungu sena;

²¹ela awo wikachuria kughora kwa chwaka mbaa, “Msulubishe! Msulubishe!”

²²Nao Pilato ukawizera indo ja kadadu, “Ela wabonya ikosaki? Ini siwonie ikosa jingi kwake jimfwanagha ufo anduangi; kwa huwu nichamkaba na kiboko na kumfungua.”

²³Ela wikachuria kukema na chwaka mbaa, usulubisho; na kutua chwaka rawo rikasima.

²⁴Niko Pilato ukatanya wibonyero sa iji wikunde.

²⁵Ukawifunguya uo mundu weremkundeghe, nao orebonyereghe sheshe na kubwagha, ukamfunya Jesu kwawo wim'bonye seji wikunde.

²⁶Nao masikari wikamghenja Jesu noko, hata iji werekoghe wikighenda wikakwana na mndumu wa Kurene uwangwagha Simoni, orekoghe wafuma mashambenyi; wikammbwada, wikamdukishira ghuja msalaba umnughe Jesu na nyuma.

²⁷Na izungu ibaa ja wandu jikamnugha andwamweri na waka wamu werekoghe wikikema mchungu na kumlilia.

²⁸Jesu ukaghaluka na nyuma ukawizera, “Inyo waka wa Jerusalemu, msakenililia ini, ela mkulilie mmbeni na wana wenyu.

²⁹Angu matuku ghichacha wandu wichaaghora, ‘Warasimilwa awa wiko kolowi, na awa wisevae, na awa wiseongoshere jingi.’

³⁰Niko wichazoya kuizera mighondi mibaa, ‘Dighuyenyi,’ na ija mitini ‘Difinikirenyi,’

³¹angu ngera waghubonyera huwu mudi mmbishi, ichakaia wada kwa ghuja ghuomie?”

³²Wandu wamu wawi wawiwi weredwaloghe wipate kusulubishwa andwamweri na Jesu.

³³Hata iji werevikieghe andu kuwangwagha “Ngoma ya chongo,” ahoeni wikamsulubisha; na awo wawiwi umu chia ya mkonu ghwake ghwa kiwomi, na umu chia ya mkonu ghwake ghwa kiwaka.

³⁴Nao Jesu ukaghamba, “Aba, wifuye wughoma angu ndewimanyire iji wijibonyagha anduangi.” Wikawagha nguwo rake kwa kurikabia kura.

³⁵Na wandu wikakaia kimusi wikizighanira; ela wabaa wikamsholia wikighamba, “Orewikirieghe wazima, ndekukire uo moni; ikakaia loli ni Kristo wa Mlungu msaghulwa wake.”

³⁶Na masikari wori wikamseka, wikacha wikimredia siki

³⁷wikighamba, “Ngera koko mzuri wa Wayahudi, kukukire kumoni!”

³⁸Na naighu yake koreandikiloghe maandiko agha: “UHU NUO MZURI WA WAYAHUDI.”

³⁹Nao umu wa waja wawiwi weresulubishiroghe msalabenyi ukamsholia ukighamba, “Welee, oho suo moni Kristo? Kukukire kumoni chiaimweri nesi.”

⁴⁰Ela uja mmbiwi mmbao ukamkemia ukighamba, “Oho ndekumuobuagha Mlungu kwa kukaia kwatanywa karakara na uo moni?

⁴¹Isi loli daakabwa kwa hachi, ela mundu uhu ndebonyere ikosa jingi anduangi.”

⁴²Nao ukaghamba, “Ee Jesu, kunikumbuke idime kuchagha kwa wuzuri ghwako.”

⁴³Jesu ukamzera, “Nakughoria loli, idime iji kuchakaianya andwamweri nani Andu Kucha Warumunyi.”

⁴⁴Nao sa saa irandadu, korekoghe na kira isanga jose, hata saa ikenda.

⁴⁵Iruwa ndejerefunyireghe miengere yaro anduangi; na pazia ya Hekalu ikarashuka vibelele viwi.

⁴⁶Nao Jesu ukikema na lwaka lubaa ukaghamba, “Aba, naiwika roho yapo mikonunyi kwako.” Umeria kughora huwo ukameria moyo.

⁴⁷Uja m'baa wa masikari uendawona agho gherebonyekieghe, ukamkasa Mlungu ukighamba, “Kwa loli mundu uhu orekoghe mhachi.”

⁴⁸Na izungu jose ja wandu werekoghe kimusi wikizighanira, wimeria kuwona agho gherebonyekieghe, wikaghala cha mzinyi wikikukaba-kaba laghenyi kwa wasi.

⁴⁹Na wandu wose weremmanyireghe Jesu andwamweri na waja waka weremnughieghe kufuma Galilaya, werekaieghe kimusi kula koni wikizighanira.

⁵⁰Korekoghe na mndumu uwangwagha Josefu, mundu wa muzi ghumu ghwa Wayahudi ghuwangwagha Arimatea. Orekoghe mwanachama wa Mwandu, mundu mucha na wa hachi;

⁵¹uo ndererumirianeghe na njama yawo, hata na ibonyo jawo anduangi; nao orekoghe ukighuweseria Wuzuri ghwa Mlungu.

⁵²Mundu uhu ukamghendia Pilato na kughulomba mumbi ghwa Jesu.

⁵³Ukaghusera ugho mumbi, ukaghurighiria nguwo ya kitani, na kughungira kaburinyi erekoteroghe ighonyi; nayo jingi ndeererikiloghe mndungi anduangi.

⁵⁴Erekoghe ni mramko kasanu, Ituku ja Kukutumbanya; na Sabato erekoghe ikizoya.

⁵⁵Awa waka weremnughieghe Jesu kufuma Galilaya, werenughaneghe na Josefu, wikaiwona kaburi na seji mumbi ghwa Jesu ghorewikiloghe.

⁵⁶Niko wikawuya kuboisa marumba na mavuda. Na ituku ja Sabato wikahora karakara na Sharia.