Read TAITA BIBLE – Biblia Ilagho Jiboie Kwa Wandu Wose LUKA 4 Bible Online

LUKA 4 - TAITA BIBLE – Biblia Ilagho Jiboie Kwa Wandu Wose bible

LUKA 4

¹Nao Jesu ukawuya kufuma Jordani wachulwa ni Roho Mweli, ukaghenjwa kireti ni Roho, matuku mirongo ina,

²ukitimwa ni Ibilisi. Matuku agho nderejieghe kilambo chingi anduangi; hata iji ghameria kukatia, ukasikira njala.

³Nao Ibilisi ukamzera, “Ngera koko Mwana wa Mlungu, kujizere iji igho jiwuye mkate.”

⁴Jesu ukamzera, “Yaandikilo ‘Mdamu ndechaakaia moyo kwa mkate ghoni anduangi.’”

⁵Nao Ibilisi ukamghenja andu kuko ighu, na shwa wori ukammbonyera mawuzuri ghose gha wurumwengunyi, ukamzera,

⁶“Nichakuneka nguma iri rose na wubaa ghwaro, angu nanekelo, nani nadamneka uo ose nimkundagha,

⁷ikakaia kwanitasa, ivi vose vichawuya vako.”

⁸Jesu ukamzera, “Yaandikilo, ‘Kuchamtasa Bwana Mlungu wako, sena kuchamdumikia uo moni uekeri.’”

⁹Nao Ibilisi ukamdwa hata Jerusalemu, ukammbika mdonyi ghwa Hekalu, ukamzera, “Ngera koko Mwana wa Mlungu, kukuchunuo kumoni andonyi,

¹⁰angu yaandikilo, ‘Uchawilaghira weke malaika wake wikulindie,

¹¹sena wichakuambaria mikonunyi kwawo, kusechekuwa kughu kwako ighonyi.’”

¹²Jesu ukatumbulia, “Yaghorelo, ‘Kusakemtima Bwana Mlungu wako.’”

¹³Nao iji Ibilisi waghimeria matimo ghake ghose, ukamsigha Jesu kwa ngelo.

¹⁴Nao Jesu ukawuya Galilaya uko nandighi ra Roho Mweli, na sare yake ikaera mbai-mbai kose isangenyi.

¹⁵Nao ukafundisha andenyi ya sunagogi rawo ukikaswa ni wose.

¹⁶Nao ukacha Nazareti andu oreleleloghe, ukangia sunagoginyi ituku ja Sabato karakara na mzango ghwake.

¹⁷Ukawuka kimusi ushome, ukanekwa chuo cha mlodi Isaya, ukachikuchua ukawona andu kuandikilo,

¹⁸“Roho wa Bwana oko aighu kwapo, angu orenishingieghe mavuda niwichilie wakiwa Ilagho Jiboie. Wanidumie niwighorie wafungwa malagho gha kufungulwa kwawo, na vitungure kupata kuwona kwawo, kuwifungua awa wikorongwagha;

¹⁹na kughutangaza mwaka ghwa Bwana ghurumirikie.”

²⁰Nao ukachikucha chuo, ukammbunjira mdumiki; hata umeria kusea kidombo, wandu wose werekoghe andenyi ya sunagogi wikamkuya meso.

²¹Ukazoya kuwizera, “Idime maandiko agha ghapata kukatia madunyi konyu.”

²²Na wose wikamghora nicha, wikishinika kwa wundu ghwa agho malagho gha mvono orekoghe ukighighora; wikaghamba, “Welee, uhu suo moni mwana wa Josefu?”

²³Nao ukawizera, “Kwa loli mchaghutumia mfwano ughu aighu kwapo: ‘Mghanga, kukuboise kumoni, agho disikire wei kwaghibonyere Kafarnaumu, ghibonye aha isangenyi jako wori.’”

²⁴Ukaghamba, “Namghoria loli, ndekuwadie mlodi ungi urumirikiagha isangenyi jake jeni.

²⁵Ela namghoria loli, korekoghe na waka wakiwa wengi Israeli, matuku gha Elija; iji mlungunyi korefungiloghe kusenyeshe vua miaka idadu na meri irandadu, na njala mbaa ikangia isanga jose.

²⁶Na Elija nderedumiloghe kwa ungi wawo, ela kwa muka umu mkiwa orekoghe Zarefathi isanga ja Sidoni.

²⁷Sena korekoghe na wandu wa sima wengi Israeli matuku gha mlodi Elisha, hata ndekuwadie ungi wawo oreelesheroghe, ela Naamani Msiria.”

²⁸Nao iji wasikira agho, wose werekoghe andenyi ya sunagogi wikajokwa ni machu.

²⁹Wikawuka na kumfunya shighadi ya muzi, wikamghenja mghondinyi andu muzi ghwawo ghoreaghiloghe, na kumreda kichechemukonyi wipate kumchunua kijimijimi.

³⁰Ela Jesu ukaida aghadi kwawo, ukaghenda chia yake.

³¹Nao ukasea cha Kafarnaumu muzi ghwa Galilaya. Nao orekoghe ukiwifundisha ituku ja Sabato;

³²wikashinulwa ni mafundisho ghake, angu orekoghe ukideda kwa nguma.

³³Nao ahoeni sunagoginyi, korekoghe na mundu uko na roho ya pepo ya makakala, nao ukakema na lwaka lubaa,

³⁴“Aa! Kwakunde kudibonya wada oho Jesu wa Nazareti? Kwaacha kuditotesha? Ini nakuichi oho ko uja Mweli wa Mlungu.”

³⁵Ela Jesu ukaikania ukaghamba, “Nyama kima kufume kwake!” Nao ija pepo imeria kumghusha aghadi kwawo, ikamfuma, isem'bonyere ilagho jingi.

³⁶Wandu wose wikashinika na kuzerana, “Ni ilaghoki iji? Angu kwa nguma nandighi wadalaghira pepo ra makakala, naro radafuma?”

³⁷Nao sare yake ikaera mbai-mbai kose isangenyi.

³⁸Jesu ukawuka ukafuma sunagoginyi, ukangia nyumbenyi kwa Simoni. Nao Simoni mkekwake orekoghe na homa mbaa, wikamghoria Jesu.

³⁹Ukacha ukakaia kaavui na wuli ghwake, ukaikania ija homa, nayo ikamsigha; ukawuka shwa wori ukawidumikia.

⁴⁰Nao iji iruwa jerekoghe jikineng'ena, wose werekoghe na wakongo wengi wiko na makongo mazima mazima wikawireda kwake, nao ukawiwikiria mikonu wose ukawiboisa.

⁴¹Na pepo nyingi rikawifuma wandu wengi rikikema na kughamba, “Oho ko Mwana wa Kristo!” Ela ukarikania na kurighiria kudeda, angu reremmanyireghe uo kukaia Kristo.

⁴²Nao iji ndoe yaela, ukafuma ukaghenda andu kusewadie wandu. Wandu wikamlola na kumchea, wikakunda kumghiria usakefuma kwawo.

⁴³Ela ukawizera, “Yanifwana kuchila iji Ilagho Jiboie ja Wuzuri ghwa Mlungu kwa mizi mizima wori, angu kwa wundu ughu niko neredumiloghe.”

⁴⁴Nao ukakaia ukichila sunagoginyi ra Judea.