Read TAITA BIBLE – Biblia Ilagho Jiboie Kwa Wandu Wose LUKA 6 Bible Online

LUKA 6 - TAITA BIBLE – Biblia Ilagho Jiboie Kwa Wandu Wose bible

LUKA 6

¹Nao iji orekoghe ukighenda ituku ja Sabato, ukaidiria aghadi ya mbuwa ya ngano; wanughi wake wikadema vanga, wikavizira na kuja.

²Ela Mafarisayo wamu wikaghamba, “Kwaki m'bonyagha maza ririghidwagha kubonywa ituku ja sabato?”

³Jesu ukawitumbulia, “Welee, jingi ndemshomie seji Daudi orebonyereghe iji uo andwamweri na awo werekwanyeghe werezughiloghe?

⁴Orenighirieghe andenyi ya nyumba ya Mlungu ukawusa mikate erefunyiroghe kwa Mlungu, ukaija na kuwineka wandu wake. Nayo yadarighidwa kujighwa ni mndungi, ela wakohani weni.”

⁵Niko ukawizera, “Mwana wa Mdamu nuo Bwana wa Sabato.”

⁶Nao ituku izima ja Sabato, ukangia andenyi ya sunagogi; ukafundisha. Ahoeni korekoghe na mndumu, mkonu ghwake ghwa kiwomi ghukelemere.

⁷Na walimu wa Sharia na Mafarisayo werekoghe wikimlangaria ngera uboisa ituku ja Sabato, wipate shekeria emshitakia.

⁸Ela uo oreghimanyireghe maririkanyo ghawo, nao ukamzera uo mundu mkonu ghwake ghukelemere, “Choo aha imbiri.” Nao ukaghenda na kukaia kimusi aho.

⁹Jesu ukawizera, “Namkotia welee, ni hachi kubonya nicha ituku ja Sabato angu kubonya kiwiwi? Kukira irangi angu kutotesha?”

¹⁰Ukawizighana wose chia rose, ukamzera uja mundu, “Ghorua mkonu ghwako.” Nao ukaghughorua na mkonu ghwake ghukaboa.

¹¹Ela wikachulwa ni machu loli-loli na kuja malagho wikilola wim'bonya wada Jesu.

¹²Matuku agho, Jesu ukajoka mghondinyi kulomba, ukalomba Mlungu kio chee.

¹³Hata iji ndoe yaela ukawiwanga wanughi wake, na aghadi ya awo, ukawisaghua ikumi na wawi na kuwiwanga “Wadumi”.

¹⁴Simoni, uo oremmbangieghe Petro, na mruna Andrea, Jakobo na Johane, Filipo na Bartholomayo,

¹⁵Mathayo na Tomasi, Jakobo wa Alfayo na Simoni uwangwagha Zelote,

¹⁶Juda wa Jakobo, na Juda Iskarioti, nuo ucheewuya mfunyi wake.

¹⁷Nao iji Jesu wasea kufuma mghondinyi andwamweri nawo, ukakaia kimusi andu kwa wurindi chiaimweri na wanughi wake wengi; na izungu ja wandu wifumie Judea yose, Jerusalemu, na pwani ya Tiro na Sidoni, werechieghe kumsikira na kuboiswa makongo ghawo;

¹⁸na awo werekoghe wikijishwa wasi ni pepo ra makakala wikaboiswa.

¹⁹Na izungu jose ja wandu jikalola kumuadada, angu ndighi rake rerekoghe rikimfuma na kuwiboisa wose.

²⁰Nao Jesu ukawizighana wanughi wake ukaghamba, “Mwarasimilwa inyo muko wakiwa, angu wuzuri ghwa mlungunyi ni ghonyu.

²¹Mwarasimilwa inyo muko na njala idana, angu mchaghudishwa. Mwarasimilwa inyo mlilagha idana, angu mchaseka.

²²Mwarasimilwa inyo kasikira wandu wazamilwa ni inyo, na kumlegha, na kumsholia na kujinona irina jenyu, kwa wundu ghwa Mwana wa Mdamu.

²³Boilonyi ngelo iyo, mchumbe chumbe kwa kuboilwa, angu mwawikilwa mafungu mabaa uko mlungunyi. Angu huwo niko weke wawa wawo werewibonyereghe walodi.

²⁴Ela ni bugha konyu inyo muko na mali, angu mwameria kupata wuhoreshi ghonyu.

²⁵Ni bugha konyu inyo mghudagha idana, angu mchasikira njala. Ni bugha konyu inyo msekagha idana, angu mchakaia na wasi na kulila.

²⁶Ni bugha konyu iji wandu wamkuma angu niko koni weke wawa wawo werebonyereghe kwa walodi wa tee.

²⁷“Ela namzera inyo munisikiragha, wikundenyi wamaiza wenyu, muwibonyere nicha awa wizamilwagha ni inyo.

²⁸Wirasimienyi awa wimbwasiragha njowe, muwilombie awa wimdediagha inyo kiwiwi.

²⁹Uhu ukukabagha idumbu iji, kumghalusire ja kawi wori; na uhu ukusokagha ikoti jako, kumsighie na ishati jako wori.

³⁰Uo ose ukulombagha kilambo chingi kumneke, na uhu ukusokagha vilambo vako kusevikotie sena.

³¹Kuwibonyere wandu sa iji koni kukundagha wikubonyere.

³²“Na ngera mwawikunda awa weni wimkundagha inyo, mchapata kukaswa kwa indoki, ikakaia na wakaung'a wadawikunda awa weni wiwikundagha?

³³Sena mkawibonyera nicha awa weni wim'bonyeragha nicha inyo, mchapata kukaswa kwa indoki, ikakaia hata na wakaung'a wadabonya wokoni?

³⁴Na ngera mwawikopesha awa weni widimagha kumlipa, mchapata kukaswa kwa indoki, angu hata na wakaung'a wadakopesha wikiweseria kuwunjirwa.

³⁵Ela wikundenyi wamaiza wenyu, na kuwibonyera nicha; mkopeshe, ela msesuwirie kuwunjirwa kindo chingi; niko mafungu ghenyu ghichaakaia mabaa, sena mchakaia wana wa Uo-Uko-Aighu-Nandighi; angu uo moni ni mucha hata kwa awo wisewadie chawucha ingi na kwa wachoyo.

³⁶Mkaie na wughoma sa iji Ndeyo onyu uko na wughoma.

³⁷“Msaketanya, nenyo ndemchaatanywa anduangi, msakelaumu, nenyo ndemchaalaumilwa anduangi; lekenyi wandu makosa, nenyo mchalekelwa;

³⁸nekenyi wandu, nenyo mchanekwa kipimo kicha, chichandirilo na kusughuswa, hata chidike-dike; niko wichaamneka huwo. Angu kipimo mpimagha, nicho cheni mchaapimilwa.”

³⁹Nao ukawighoria mfwano ghumu sena ukighamba, “Welee, mundu uko kitungure wadima kumghenja kitungure mmbao? Ndewichaachunukia kinenyi wose anguwada?

⁴⁰Mshomi ndemchumbagha mwalimu wake anduangi, ela kula umu ushomeshero nicha, wadakatana na mwalimu wake.

⁴¹Kwaki oho kuchizighanagha kijaghulu chiko andenyi ya iriso ja mwanyinyu, ela ndekuchiwonagha kijaghulu chiko andenyi ya iriso jako kumoni?

⁴²Angu-lee, kuchamzera wada mwanyinyu, ‘Mwanidu, leka nikufunye ichi kijaghulu chiko irisonyi kwako,’ na oho kumoni kusechiwonagha kilingo chiko irisonyi kwako? Muji-kuwi oho, funya kilingo chiko irisonyi kwako kande, niko kuchaawona nicha kufunya kijaghulu chiko andenyi ya iriso ja mwanyinyu.

⁴³“Angu ndekuwadie mudi mucha ghuvagha matunda ghizamie, hata na mudi ghuzamie, kuva matunda mecha anduangi;

⁴⁴angu kula mudi ghuchamanyika kwa matunda gharo. Tini nderiwalwagha minjonyi, hata zabibu kwa mndandangoma anduangi.

⁴⁵Mundu mucha kwa agho mecha gha ngolonyi kwake, wadafunya agho ghiko mecha, na mundu mmbiwi kwa ugho wuwiwi ghuko ngolonyi kwake, wadafunya agho ghiko mawiwi. Angu momu ghwadadeda agho ghichue ngolonyi.”

⁴⁶“Kwaki muniwangagha Bwana, Bwana, msebonyagha agho nimghoriagha?

⁴⁷Uo ose uchagha kwapo na kusikira malagho ghapo na kughibonya, nichammbonyera seji ufwane.

⁴⁸Wafwanana na mundu uaghagha nyumba yake, nao ukakota ndenyi, na kuagha msingi ghwake aighu ya igho; kukacha kusalama kwa machi, na moda ghukaikaba ija nyumba, nayo ndeerenyavurikieghe anduangi, angu ereaghiloghe aighu ya igho.

⁴⁹Ela uo usikiragha malagho ghapo, nao ndebonyagha anduangi, wafwanana na mundu oreaghieghe nyumba yake andoenyi, kuseko na msingi ghungi; na ghuja moda ghukasalama na kuikaba ija nyumba, ikaghwa andonyi; na kunoneka kwaro, kukakaia kubaa.”