Read TAITA BIBLE – Biblia Ilagho Jiboie Kwa Wandu Wose LUKA 7 Bible Online

LUKA 7 - TAITA BIBLE – Biblia Ilagho Jiboie Kwa Wandu Wose bible

LUKA 7

¹Hata iji Jesu wawighoria wandu malagho ghake ghose, ukaghenda Kafarnaumu.

²Nao m'baa umu wa masikari gha Kiroma orekoghe na mzumba wake umkunde, nao orekoghe mkongo kaavui na kufwa.

³Uo m'baa uendasikira wuvoro ghwa Jesu, ukawiduma waghosi wamu wa Wayahudi wimlombe Jesu uche um'boise mzumba wake.

⁴Nawo wiendamchea Jesu, wikamlomba nandighi wikighamba, “Uo wafwana kum'bonyere seji walomba;

⁵angu waikunde mbari yedu, sena orediaghieghe sunagogi.”

⁶Nao Jesu ukaghendanya nawo. Hata iji werevikieghe kaavui na nyumba yake, uja m'baa wa Kiroma ukaduma waghenyi wake kwa Jesu ukighamba, “Bwana, kusakekusumbua, angu ini sifwane kuchelwa ni oho, kungie nyumbenyi kwapo.

⁷Niko hata ini seredimieghe kucha kwako anduangi. Ela oho ghora ilagho jeni tu, na mzumba wapo uchaboa.

⁸Angu hata ini ne mundu niwikilo aisi ya nguma, nanekelo masikari aisi yapo, nani ngamzera uhu, ‘Ghenda,’ wadaghenda, na uhu ngamzera, ‘Choo,’ wadacha; na mzumba wapo nadamzera, ‘Bonya iji,’ nao wadabonya.”

⁹Nao iji Jesu wasikira agho ukashinika, ukawighalukia wandu awo weremnughieghe ukawizera, “Namghoria loli, jingi siwonie irumirio jing'ane huwu anduangi, hata kwa Israeli.”

¹⁰Niko awo weredumiloghe iji werewurieghe nyumbenyi wikamkua uja mzumba wameria kuboa.

¹¹Nyuma kutini, Jesu ukaghenda muzi ghwa Naini; wanughi wake chiaimweri na izungu ibaa ja wandu wikaghendanya nao.

¹²Nao iji orevikieghe kaavui na mbenge ya muzi, wikakwana na izungu ibaa ja wandu wamduka mundu ufue, nao ni mwana wa ititi wa muka ufulo ni mumi wake.

¹³Bwana uendawona uja muka, ukangilwa ni wughoma m'baa, ukamzera, “Leka lila.”

¹⁴Ukacha ukaiwada jeneza, na awo wandu wereidukieghe wikadunga maghu. Jesu ukaghamba, “Mdawana, nakuzera wuka!”

¹⁵Nao uo orekoghe ufue, ukawuka ukazoya kudeda. Na Jesu ukamneka mae.

¹⁶Wikangilwa ni wowa wose wikamkasa Mlungu wikighamba, “Mlodi m'baa wawuka aghadi kodu!” sena “Mlungu wawivikia wandu wake.”

¹⁷Nao sare yake ikaera isanga jose ja Judea na mbai-mbai yaro.

¹⁸Nao wanughi wa Johane wiendawona maza rose Jesu oreribonyereghe,

¹⁹Johane ukawiwanga wawi wa wanughi wake ukawiduma kwa Bwana wimkotie, “Welee, ni oho kumoni kuchagha angu dimmbesere mzima?

²⁰Awo wandu wiendamchea Jesu wikamzera, Johane wadiduma dikukotie, ‘Ni oho kumoni kuchagha angu dimmbesere mzima?’”

²¹Nao saa ija eni Jesu ukaboisa wandu wengi werekoghe na makongo na saka, ukawinga pepo nyingi rizamie, na wengi werekoghe vitungure ukawidimisha kuwona.

²²Jesu ukawitumbulia, “Ghendenyi mumghorie Johane malagho agho mwaghiwona na kughisikira; vitungure wapata kuwona kwawo, watighini waghenda, wandu wiko na sima waeleshwa, na awa wifue madu wasikira, na awo wifue warukishwa, na wakiwa wachililwa Ilagho Jiboie.

²³Warasimilwa uo mundu usekuwagha kwapo.”

²⁴Nao iji wanughi wa Johane wameria kughenda, Jesu ukazoya kuwighoria wandu malagho gha Johane, “Welee, niki moreghendieghe kuchilola kireti? Ni lunyasi lunyavurishwagha ni mbeo?

²⁵Angu morefumieghe kwendawona kii? Ni mundu urwae nguwo righokie? Awa wirwae nguwo righokie na kuja manori weko ngomenyi kwa wazuri.

²⁶Ela niki mfumie kwenda chizighana? Ni mlodi? Ee namzera, ni kuchumba mlodi.

²⁷Uhu Johane nuo moni waghorwa ni Maandiko, ‘Ola namduma mdumi wapo imbiri kwako, uhu uchaakuboisira chia yako.’”

²⁸Namghoria loli, “Kwa awa wose werevaloghe ni waka, ndekuwadie mndungi uko m'baa kumchumba Johane, ela sena uo uko mtini kwa Wuzuri ghwa Mlungu, oko m'baa kumchumba uo.”

²⁹Nao wandu wose chiaimweri na wawadi wushuru iji wasikira agho, wikairumiria hachi ya Mlungu angu werebaputiziroghe kwa wubaputizo ghwa Johane.

³⁰Ela Mafarisayo na walimu wa Sharia wereleghieghe ugho mpango ghwa Mlungu, kwa wundu ghwawo, wikalegha kubaputizwa ni Johane.

³¹Jesu ukachuria kughora, “Niwifwananisha naki wandu wa kivalwa ichi? Nawo wafwanane naki?

³²Wafwanana na wana wiseagha kidombo sokonyi wikiwangana na kuzerana, ‘Deremkabieghe misherembe mkalegha kuvina, derebonyereghe ifwa, mkalegha kulila.’

³³Angu Johane orechieghe usejagha usenywagha anduangi, nenyo mwaghamba, ‘Oko na pepo.’

³⁴Mwana wa Mdamu wachee ukija, ukinywa, nenyo mwaghamba, ‘Zighanenyi mundu wa lwafuo, mmbongeri, na mghenyi wa wawadi wushuru na wakaung'a.’

³⁵Elaima iyo hikima ya Mlungu yawonyerwa kukaia ya loli, ni awo wose wiirumiriagha.”

³⁶Mfarisayo umu oremlombieghe Jesu uche uje vindo kwake. Na Jesu ukacha nyumbenyi kwake ukasea kidombo mezenyi.

³⁷Nao muka umu mkaung'a wa muzi ghuja iji wamanya angu Jesu wacha vindonyi nyumbenyi kwa uo Mfarisayo, ukareda chupa ichue marumba;

³⁸ukakaia kimusi na nyuma kaavui na maghu gha Jesu ukilila, na mbori rake rikamtonyera maghunyi, nao ukaghiaghia kwa iridia jake; ukasusugha maghu ghake na kughishinga agho marumba.

³⁹Uja Mfarisayo oremkaribishireghe uendawona huwo, ukaghamba ngolonyi kwake, “Ngera loli mundu uhu odeeka mlodi, kumangu wamanya uhu nani, na ni muka ufwane wada uhu ummbwadagha angu uo ni mkaung'a.”

⁴⁰Nao Jesu ukaghamba, “Simoni, neko na ilagho jekughoria.” Nao ukatumbulia, “Ghora Mwalimu.”

⁴¹Jesu ukaghamba, “Mundu umu orekoghe na wasile wake wawi, wa imbiri oremlawiagha dinari maghana masanu, na wa kawi mirongo misanu.

⁴²Nao iji walemwa ni kumlipa, ukawileka wose wawi. Idana ni uao uchaamkunda kuchumba?”

⁴³Nao ukatumbulia, “Naghesha ngera ni uja oremlekieghe nyingi.” Nao ukamzera, “Kwatanya hachi.”

⁴⁴Nao ukimghalukia muka ukamzera Simoni, “Kwammbona muka uhu? Kufuma nangia nyumbenyi kwako ndekuninekie machi gheoghosha maghu ghapo, ela uo wanioghosha maghu ghapo kwa mbori rake, na kughiaghia kwa iridia jake.

⁴⁵Ndekunisusughie, ela uo kufuma nangia aha ndesighie kunisusugha maghu ghapo anduangi.

⁴⁶Ndekunishingie chongo chapo mavuda, ela uo ndesighie kughishinga maghu ghapo mavuda anduangi.

⁴⁷Kwa huwu nakuzera, walekwa kaung'a rake nyingi, angu wawonyera lukundo lubaa; ela uhu ulekelwagha katini, wadakunda katini wokoni.”

⁴⁸Nao ukamzera muka, “Kaung'a rako ralekwa.”

⁴⁹Niko awo werekwanyeghe kidombo mezenyi wikazoya kughora ngolonyi kwawo, “Nani uhu ulekagha kaung'a?”

⁵⁰Nao ukamzera muka, “Irumirio jako jakukira, kwende na sere.”