Read TAITA BIBLE – Biblia Ilagho Jiboie Kwa Wandu Wose WUKUMBUSO 10 Bible Online

WUKUMBUSO 10 - TAITA BIBLE – Biblia Ilagho Jiboie Kwa Wandu Wose bible

WUKUMBUSO 10

¹“Ngelo rija BWANA orenizerieghe, ‘Dumbua vishawalata viwi va magho sa vija va imbiri, kuche mghondinyi; sena kubonye Sanduku ya mbau,

²nani nichaandika agho malagho gherekoghe aighu ya ivo vishawalata va magho va imbiri kuvibarie; na ivo vishawalata va magho kuviwike sandukunyi.’

³“Niko ngabonya sanduku ya mbau ra mudi ghwa mgholeka, ngadumbua vishawalata viwi va magho sa vija va imbiri na kujoka navo mghondinyi.

⁴Nao BWANA ukaandika aighu ya vija vishawalata va magho maandiko ghaja gheni sa ghaja gha imbiri, iyo Memu Ikumi; iyo oremnekieghe iji orededagha andenyi ya modo ituku morekwanyikieghe mghondinyi, ukanineka.

⁵Niko ngaghaluka na kusea mghondinyi, ngavingira ivo vishawalata va magho andenyi ya ija sanduku, sa iji koni BWANA orenilaghirieghe; navo vadakaia aho.”

⁶(Wandu wa Israeli, weredambieghe kufuma viriwa va wandu wa Jaakani hata Mosera. Nao Haruni ukafuya aho, ukarikwa; na mwana wake Eleazari ukawada wukohani wulalo ghwake.

⁷Kufuma aho wikaghenda Gudgoda, na kufuma Gudgoda wikaghenda Jotbatha; aho korekoghe na meda ya machi.

⁸Ngelo ija, BWANA oresaghueghe kichuku cha Lawi widukeghe Sanduku ya Ilaghano ja BWANA; widumikeghe imbiri ya BWANA, na kufunyagha irasimio kwa irina jake hata idime.

⁹Kwa huwo Lawi ndene ifungu angu ifwa jingi chiaimweri na waruna; BWANA nuo ifwa jawo sa iji koni BWANA Mlungu onyu oremzerieghe.)

¹⁰“Nerekoghe mghondinyi matuku mirongo ina kio na dime sa imbiri, na ngelo ija BWANA ukanisikira wokoni; ndeerekoghe nia yake kumtotesha anduangi.

¹¹Nao BWANA ukanizera, nizoye charo ngimkiria imbiri, eri mpate kungia na kujiwada isanga ijo orewighemieghe weke ndeyo kukaia uchawineka.

¹²“Idana inyo wandu wa Israeli, sikirenyi seji BWANA Mlungu onyu ukunde. Mnekenyi ishima na kumuobua, M'bonye seji ukundagha; mumkunde na kumdumikia kwa ngolo renyu rose;

¹³msikire malaghiro ghake nimlaghiragha idime, kwa wundu ghwa wucha ghonyu.

¹⁴Mlungunyi koighu ni kwa BWANA; ndoenyi na vose viko andenyi yaro wokoni ni vake.

¹⁵Ela sena BWANA orewikundieghe weke ndeyo kwa ngolo, ukamsaghua inyo kivalwa chawo, na kummbika aighu ya wandu wose, seji iko idime.

¹⁶Kwa huwo, kufuma idana, m'bonyo wawishi ngolonyi konyu, mseduo mghilikie.

¹⁷Angu BWANA Mlungu onyu ni Mlungu wa milungu, na BWANA wa weke bwana; ni m'baa wa kudima, nao ni Mlungu oobosha; usemtalagha mndungi kuchumba mmbao, hata ndehongwagha anduangi.

¹⁸Wadabonya maza riko ra loli kwa wana wakiwa na waka wakiwa, nao wadamkunda mghenyi, na kumneka vindo na nguwo.

¹⁹Kwa huwo mumkunde mghenyi, angu inyo morekoghe waghenyi isanga ja Misri.

²⁰Mumuobuo BWANA Mlungu onyu, mumdumikie na kumaziriana nao, na kubonya ighemi kwa irina jake.

²¹Mumkase; uo ni Mlungu onyu; inyo mwawonie kwa meso ghenyu maza mbaa reobosha uribonyere kwa wundu ghonyu.

²²Weke ndeyo wa kala wedesea Misri wiko wandu mirongo mfungade, ela idana BWANA Mlungu onyu wam'bonyere mkakaia sa nyerinyeri ra mlungunyi kwa wungi.