Read TAITA BIBLE – Biblia Ilagho Jiboie Kwa Wandu Wose WUKUMBUSO 13 Bible Online

WUKUMBUSO 13 - TAITA BIBLE – Biblia Ilagho Jiboie Kwa Wandu Wose bible

WUKUMBUSO 13

¹“Mlodi ungi, angu mtambushiri ndodo ukawuka aghadi konyu, nao ubonye mwakilimbiti angu alama,

²na loli ikatie. Ukaghamba wei mnughe milungu mizima muitase, milungu mseiichi,

³msemsikire. BWANA Mlungu onyu waawuyamtumia kumtima eri upate kumanya ngera mwamkunde BWANA Mlungu onyu kwa ngolo renyu rose, na kwa roho renyu rose.

⁴Mumnughe BWANA Mlungu onyu na kumuobua; mmbwadie memu yake na kumsikira; na inyo mumtase na kumaziriana nao.

⁵Ela uja mlodi angu mtambushiri ndodo, uchabwaghwa; angu wafundisha maza remlegha BWANA Mlungu onyu, uo oremfunyireghe isanga ja Misri; ukamkombua kufuma nyumba ya wuzumba. Mundu ufwane huwo ni mmbiwi, nao waawuyatima kumfunya kwa chia ya irangi BWANA umnekie. Suti ubwagho eri muinjikie ugho wuwiwi.

⁶“Mwanyinyu wa mayo, angu mwana wako wa womi angu wa waka, angu muka wako umoni kumkunde, angu mghenyi wako wa ngolonyi, ukakusesea kwa kiviso wei muendetasa milungu mizima iyo hata weke ndeyo wisereiichighi;

⁷umu wawo wadima kukushashira muitase milungu mizima ya wandu wimmarie chia rose; ikaiagha weko kaavui nenyo angu kula nenyo;

⁸mserumirie hata kumsikiria; hata kusemmbonie wughoma ghungi, angu kumsigha ukuvise.

⁹Ela kukaie wa imbiri kuzoya kum'bwagha, konyuma niko wandu wose wimngirie.

¹⁰Kum'bwaghe na magho, kwa kukaia wadalola kukutanya na BWANA Mlungu wako, uo orekufunyireghe isanga ja Misri kufuma nyumba ya wuzumba.

¹¹Niko Waisraeli wose wichaasikira na kuobua, nawo jingi ndewiwuyabonya wuwiwi sa ugho sena aghadi konyu anduangi.

¹²“Kukasikira ilagho jingi aighu ya muzi ghumu ghonyu ghwa iyo BWANA Mlungu onyu umnekagha muikaie,

¹³wei wandu wamu wa kisha wa mzenyu waghendie na kuwilaghasha wandu wa ugho muzi wikighamba, wei wighende kutasa milungu mizima, iyo mseiichi,

¹⁴kukotie nicha. Iji kwawona loli ilagho ijo jizamie jabonyekie aghadi konyu,

¹⁵muwibwaghe wandu wa ugho muzi na lufu; mughunone muzi putu, chiaimweri na mfugho raro.

¹⁶Vilambo vose mwaviwada, muvitumbanye ghadi na ghadi ya ugho muzi andu kuko kuelie, na kughukora muzi chiaimweri navo, sa kizongona chekora chose kwa BWANA Mlungu onyu, nagho ghuchawuya ighacho kwa kala na kala, hata ndeghuchaaghwa sena.

¹⁷Mseshoo kindo chingi cha ivo vimerie kutanywa vipate kutoteshwa; eri BWANA upate kuhoresha machu ghake, na kumfuya wughoma, nao um'bonye mchurikie sa iji koni orewilaghirieghe weke ndeyo,

¹⁸ikakaia mchasikira seji BWANA Mlungu onyu ughambagha, kwa kughiwadia malaghiro ghake ghose nimlaghiragha idime, na kubonya agho ghiko gha hachi imbiri ya BWANA Mlungu onyu.