Read TAITA BIBLE – Biblia Ilagho Jiboie Kwa Wandu Wose WUKUMBUSO 16 Bible Online

WUKUMBUSO 16 - TAITA BIBLE – Biblia Ilagho Jiboie Kwa Wandu Wose bible

WUKUMBUSO 16

¹“Mghutale mori ghwa Abibu, kwa kuwika Pasaka ya BWANA Mlungu onyu; angu ugho mori ghwa Abibu nigho BWANA Mlungu wako orekufunyireghe nagho nakio isanga ja Misri.

²Mumfunyire BWANA Mlungu onyu kizongona cha Pasaka cha ng'ondi angu cha ng'ombe, andu BWANA uchaakusaghua kukaie komtasira.

³Msakeijanya na mikate ingirilo chachu. Mchaijanya na mikate isengirilo chachu iyo mikate ya matiriro kwa matuku mfungade; angu morefumieghe Misri kwa shwa-shwa, eri mkumbukeghe seji morefumieghe Misri, matuku ghose gha irangi jenyu.

⁴Mndungi usewoneke na chachu nyumbenyi konyu andenyi ya isanga jenyu jose kwa matuku mfungade; hata nyama ingi ya icho kizongona mfunyagha luma lwa kenyi iselale hata nakesho.

⁵Msefunye kizongona cha Pasaka andenyi ya muzi ghungi ghwa iyo mizi BWANA Mlungu onyu umnekagha,

⁶ela ahoeni BWANA Mlungu onyu uchakusaghua kukaie andu komtasira; aho niko mchaafunya kizongona cha Pasaka luma lwa kenyi iruwa jikineng'ena, sa ija ngelo morefumagha Misri.

⁷Mchidoghose na kuchija andu BWANA Mlungu onyu uchaakusaghua; nakesho mmbuye hemenyi konyu.

⁸Muje mikate isengirilo chachu kwa matuku arandadu. Ituku ja mfungade, jichakaia jekwanyika kwa wundu ghomtasa BWANA Mlungu onyu; ituku ijo msakebonya kazi.

⁹“Mtale njumwa mfungade kufuma ituku mwazoya kukuwida viro.

¹⁰Nao m'bonye Ndima ya Makuwido kwa wundu ghwa BWANA Mlungu onyu; mumredie mafunyo ghenyu kwa ngolo, kunughana na seji BWANA Mlungu onyu umrasimie.

¹¹M'boilo imbiri ya BWANA Mlungu onyu, chiaimweri na wana wenyu wa womi na wa waka, na wadumiki wenyu wa womi na wa waka, na Mlawi uko mzinyi konyu, na mghenyi omara-mara, na mwana usewadie ndee, na mka mkiwa uko aghadi konyu, andu BWANA ukusaghue kukaie komtasira.

¹²Mkumbuke angu morekoghe wazumba Misri, nenyo mlindie kuriwadia sharia iri.

¹³“M'bonye Ndima ya Viwanda matuku mfungade nyuma ya kutumbanya viro venyu na kukama zabibu renyu putu.

¹⁴M'boilo ndimenyi chiaimweri na wana wenyu wa womi na wa waka, na wadumiki wenyu wa womi na wa waka, na Mlawi, na mghenyi omara-mara, na mwana usewadie ndee, na muka mkiwa; awo wiko mizinyi konyu.

¹⁵Mum'bonyere BWANA Mlungu onyu iyo ndima kwa matuku mfungade andu uchaakusaghua, kwa kukaia BWANA Mlungu onyu uchakurasimia kwa mavalo ghenyu ghose; na kwa kazi renyu rose mchaabonya; na oho kuchulo ni kuboilwa.

¹⁶“Wandu wenyu wose wa womi wichaghenda kumtasa BWANA Mlungu onyu mando adadu kwa mwaka, andu BWANA uchaakusaghua. Ngelo ya Ndima ya Mikate isewadie Chachu, na ngelo ya Ndima ya Makuwido, na ngelo ya Ndima ya Viwanda. Wiseghende kumtasa BWANA mikonu miduu.

¹⁷Kula mundu uchafunya seji udimagha kunughana na seji BWANA Mlungu wake umrasimie.

¹⁸“Mmbike watanyi na wabaa andenyi ya mizi yenyu yose mnekwagha ni BWANA Mlungu onyu, kunughana na vichuku venyu, wipate kutanya wandu kwa hachi.

¹⁹Msede hachi ya mndungi; msetanye kwa kutala wandu; hata mserumirie kutuwa, kwa kukaia kutuwa kwadaturua meso gha wandu wiko na suku, na kulaghasha hachi ra wandu.

²⁰Mnughe hachi iekeri; mpate kudua moyo na kupata ifwa ja ijo isanga BWANA Mlungu onyu umnekagha.

²¹“Msewe mudi ghungi ghotasira mlungu ghwa waka Ashera mbai na mbai ya madhabahu ya BWANA Mlungu onyu;

²²hata msedunge nguro ingi ya igho etasira mlimu; radamzamia Mlungu onyu.