Read TAITA BIBLE – Biblia Ilagho Jiboie Kwa Wandu Wose WUKUMBUSO 17 Bible Online

WUKUMBUSO 17 - TAITA BIBLE – Biblia Ilagho Jiboie Kwa Wandu Wose bible

WUKUMBUSO 17

¹“Msemfunyire BWANA Mlungu onyu vizongona va ng'ombe angu ng'ondi viko na itiko jingi ijo jose; ilagho ijo jadamzamia BWANA Mlungu onyu.

²“Mndungi ukawoneka aghadi konyu ubonyagha mawiwi imbiri ya BWANA Mlungu onyu kwa kunona ilaghano jake andenyi ya imu ya mizi yenyu iyo BWANA Mlungu umnekagha, ukaiagha wa womi angu wa waka,

³nao ughende uidumikie milungu mizima na kuitasa, angu kutasa iruwa angu mori na nyerinyeri, malagho nighikanie;

⁴mkasikira malagho agho, mghizighane nicha. Ikakaia ni loli putu kukaia ilagho ijo jizamie jabonyekie andenyi ya Israeli,

⁵mumrede uo mundu angu uo muka ubonyere ilagho ijo iwiwi mbengenyi, na kumlasa na magho hata ufo.

⁶Mundu uchabwagha kwa wushuhuda ghwa wandu wawi angu wadadu; ela ndedimagha kubwaghwa kwa wushuhuda ghwa mundu umweri.

⁷Awo washahidi niwo wichaazoya kumlasa na magho, ima wandu wazima winughie. Kwa chia iyo, mchainja wuwiwi aghadi konyu.

⁸“Mwandu ghungi ghukakaia ghukurie msedimagha kughutanya mizinyi konyu, sa mwandu ghobwagha angu kulola hachi aghadi ya mundu na mmbao, angu kushoghonuana, mghende andu BWANA Mlungu onyu uchaakusaghua;

⁹mkavika kwa mkohani Mlawi, na mtanyi uko kazinyi ngelo iyo, muwikotie; nawo wichaghutanya.

¹⁰Niko aho mchabonya seji wimzeragha kunughana na kutanya kwawo. Mlindie m'bonye sa iji koni mwalaghirwa.

¹¹Mmbuse sa iji koni wadumbua wikamghoria, nao moobonya woruwo.

¹²Mundu ukang'eta, na kulegha kumsikira mtanyi angu mkohani uo udumikagha imbiri ya BWANA Mlungu wako, uchabwaghwa; na kwa chia iyo, mchainja wuwiwi kwa Israeli.

¹³Na wandu wose wichasikira na kuobua, nawo ndewichawuyang'eta sena anduangi.

¹⁴“Mkameria kungia ijo isanga BWANA Mlungu onyu umnekagha mjiwuse na kukaia andenyi yaro, nao mkunde kukaia na mzuri sa wandu wa mbari rose rimmarie chia rose;

¹⁵mkaie na wuloli kukaia ni mundu usaghulo ni BWANA; sena ukaie ni umu wa wamzenyu weni msewike mghenyi ungi useko mwanyinyu.

¹⁶Umanye usekaie na farasi nyingi ra ijeshi jake, angu kuwibonya wandu wiwuye Misri kwendachuria farasi rikaie nyingi; kwa kukaia BWANA waleghie jingi msewuye ijo isanga.

¹⁷Uo mzuri usekaie na waka wengi, uchemsigha BWANA; hata usekaie na mali nyingi ra feza na dhahabu.

¹⁸“Ukazoya kubonya nguma, usesowe kopi ya sharia sa iji koni iandikilo sharienyi na mafundisho gha Mlungu ghiko na wakohani Walawi.

¹⁹Ukaie nacho eri uchishomeghe matuku ghose gha irangi jake. Ukufundishe kumuobua BWANA Mlungu wake na kuiwadia sharia kwa wuloli ghose.

²⁰Ichamtesia usechekujosa aighu ya waruna, hata kulemwa ni kumsikira BWANA. Huwo uchabonya nguma luma, chiaimweri na kivalwa chake andenyi ya Israeli.